ရခိုင်ပြည်နယ် ရမ်းဗြဲလေးတောင်ဒေသတွင် ဆောင်းသီးနှံ အဖြစ် မတ်ပဲစိုက်သူ တောင်သူများ တိုးတက်များပြားလာသည်ဟု သတင်းရရှိသည်။
နိုင်ငံခြားပို့ကုန်တစ်ခုအဖြစ် ဈေးကွက်ခိုင်မာသော မတ်ပဲကို ရန်ကုန်တိုင်း၊ ပဲခူးတိုင်း ၊ ဧရာဝတီ တိုင်းတို့တွင် စပါးရာသီအပြီး ဆောင်းသီးနှံအဖြစ် လယ်သမားအများစုမှ တွင်တွင်ကျယ်ကျယ် စိုက်ပျိုးနေကြသော်လည်း ရခိုင်ပြည်နယ်တွင်မူ စိုက်ပျိုးသူ မရှိသလောက် နည်းပါးနေကြောင်း လေးတောင်ဒေသတွင် မတ်ပဲဖြစ်ထွန်းရေး အတွက် ကြိုးပမ်းဆောင်ရွက်နေသူ ဦးသန်းဝင်းက ပြောသည်။
သို့အတွက်သူ့အနေဖြင့် လွန်ခဲ့သော ၂၀၁၅ ခုနှစ်က ရန်ကုန်မှပြန်ပြီး လေးတောင်ဒေသသို့ သွားရောက်ကာ မတ်ပဲ ကို စတင် စမ်းသက် စိုက်ပျိုးခဲ့ကြောင်း၊ လွန်ခဲ့သောနှစ်က စိုက်ပျိုး ရာသီချိန် နောက်ကျသဖြင့် အမြတ်မရှိခဲ့သော်လည်း အတွေ့အကြံများစွာ ရရှိခဲ့ကြောင်း၊ ဒေသအတွင်းမှ လယ်သမားများကလည်း မတ်ပဲစိုက်ပျိုးမှုကို စိတ်ဝင်စားမှုများ ရှိလာသဖြင့် ယခုနှစ်တွင် လေးတောင် ဒေသတွင် မတ်ပဲစိုက်သူ များလာကြောင်း သူက ပြောဆိုသည်။
“ ရန်ကုန်တိုင်း၊ ပဲခူးတိုင်း ၊ ဧရာဝတီတိုင်း တစ်ခွင်စိုက်ပျိုးနေကြတာ မြေကွက်လပ်မရှိတော့ဘူး။ ကျွန်တော်တို့ ဒေသမှာတော့ စပါးသီးနှံစိုက်ပျိုးပြီးရင် လယ်တွေကို ဒီအတိုင်း ပလပ် ထားကြတာ ကသာ များတယ်။ ဒါကလည်း ရခိုင် တောင်သူ လယ်သမားတွေကို ဘယ်သီး နှံကို ဘယ်လို ရာသီမှာ စိုက်ပျိုးရင် ဘယ်လို ၀င်ငွေရမယ်ဆိုတာကို ပညာပေးတာ၊ ဟောပြော ဆွေးနွေးတာ၊ အထောက်အပံ့ပေးတာ၊ လိုအပ်တဲ့ အရာတွေကို အထောက်အကူ ပေးတာတို့ဟာ အစိုးရ ခေတ်အဆက်ဆက် ထိရောက်စွာ အားပေး ကူညီမှုက မရှိသလောက် ဖြစ်နေခဲ့တယ်။ ဒါကြောင့် စပါးသီးနှံစိုက်ပြီးရင် ဘာသီးနှံ မစိုက်တော့ဘဲ ဒီအတိုင်း လယ်တွေကို ရခိုင်မှာ ပစ်ထားကြတယ်” ဟု ဦးသန်းဝင်းက ပြောဆိုသည်။
ဆောင်းသီးနှံစိုက်ပျိုးပါက ၀င်ငွေမည်သို့ကောင်းနိုင်သည်ကို လယ်သမားအများ သိရှိကြခြင်း မရှိသလို ဆောင်သီးနှံစိုက်ပျိုးနိုင်ရေးအတွက် လုံလောက်သော ဗဟုသုတ၊ နည်းပညာများလည်း မရရှိခဲ့ကြဟု သူကဆိုသည်။
ယင်းအကြောင်းအချက်များကြောင့် လယ်သမားအများစုမှာ စပါးသီးနှံ စိုက်ပျိုးမှု တစ်ခုတည်းကို မှီခို အားထားနေရသဖြင့် ၀င်ငွေအ လွန်နည်းပါးကာ ဆင်းရဲတွင်း နက်မြဲသာ နက်နေကြရသည်ဟု ဦးသန်းဝင်းက ပြောဆိုသည်။
လေးတောင်ဒေသခံ ဦးသန်းဝင်းသည် ရန်ကုန်မြို့တွင် နေထိုင်ပြီး INGO ၀န်ထမ်းတစ်ဦးဖြစ်ခဲ့သူ ဖြစ်ကာ ထိုအဖြစ်ဆိုးများကို ကျော်လွှားရန်နှင့် ရည်ရွယ်ပြီး လွန်ခဲ့သည့် ၂၀၁၅ ခုနှစ် ဆောင်းရာသီ ကာလ အတွင်း လေးတောင်ဒေသသို့ သွားရောက်ပြီး မတ်ပဲ စတင်စိုက်ပျိုး စမ်းသပ်ခဲ့သည်ဟု ဆိုသည်။
လေးတောင်ဒေသတွင် လယ်ဧက မြောက်များစွာရှိသော်လည်း လုပ်ကိုင်မယ့်သူ လူမရှိ၍ စပါးသီးနှံကိုတောင်မှ မစိုက်ပျိုးနိုင်ဘဲ ဖြစ်နေသည်ဟု သိရသည်။ ယခုနှစ် လေးတောင်ဒေသတွင် ဆောင်းတွင်းကာလ၌ ၎င်းမြေများအပေါ်တွင် အချိန်မီ ဆောင်းသီးနှံ မတ်ပဲ စိုက်ပျိုးနိုင်ရန်အတွက် လိုအပ်ချက်များကို ဖြည့်စွက်ပြီး စတင်ဆောင်ရွက် နေပြီဖြစ်ကြောင်းလဲ သိရသည်။
လေးတောင်ဒေသတွင် မတ်ပဲစိုက်ပျိုးရေးမှာ အလားအလာကောင်းများရှိနေသဖြင့် ဦးသန်းဝင်း၏ ဖိတ်ကြားချက်အရ ရခိုင်သဟာယအသင်း (ရန်ကုန်) နှင့် ရခိုင်ပြည်နယ်အစိုးရအဖွဲ့၏ ဖွံ့ဖြိုးရေး အကြံပေးပညာရှင်များဖြစ်ကြသော ဒေါက်တာ တင်မာအောင် နှင့် ဒေါ်မြစပါယ်ညွန့်တို့ ကိုယ်တိုင် ရမ်းဗြဲ ၊ လေးတောင်ဒေသသို့ များမကြာမီက ကွင်းဆင်းလေ့လာခဲ့သည်ဟု သိရသည်။
ဒေါက်တာ တင်မာအောင် နှင့် ဒေါ်မြစပါယ်ညွန့်တို့ လေးတောင်ဒေသမှ လယ်သမား ၁၄ ဦးသို့ ဆောင်းသီး နှံမတ်ပဲ စိုက်ပျိးနိုင်ရန် လိုအပ်သော စိုက်ပျိုးရေး အထောက်အကူများ ပေးအပ်ရန် သဘောတူခဲ့ပြီး ယခုအခါ မျိုးပဲ (စင်ကာပူ) အထွက်တိုး မတ်ပဲမျိုးများကို စတင်ဖြန့်ဝေပေးနေပြီ ဖြစ်ကြောင်း သိရသည်။
ရခိုင်ပြည်နယ်အနှံ့ မတ်ပဲ ဆောင်းသီးနှံကို ငါးနှစ်အတွင်းလွှမ်းမိုးစေရမည်ဆောင်ပုဒ်ဖြင့် လယ်သမားများဝင်ငွေတိုးလာစေရန် ရည်ရွယ်ကာ ပြုလုပ်နေသော မတ်ပဲ စိုက်ပျိုးရေးကို ရခိုင်သဟာယအသင်း (ရန်ကုန်) နှင့် ဒေါ်တင်မာအောင်၊ ဒေါ်မြစံပါယ်ညွှန့်တို့မှ အားပေး ထောက်ခံ ကူညီသွားမည်ဟုလဲ သိရသည်။
၎င်းအပြင် ထွန်စရိတ် ၊ မြေသြဇာ ၊ ပိုးသတ်ဆေး ၊ ရိတ်သိမ်းစရိတ်စသည်တို့ ထောက်ပံ့ ပေးပြီး ပဲထွက်ရောင်းချပြီးပါမှ ထုတ်ပေးငွေများကို အတိုးမယူ ပြန်လည်ပေးဆပ်ကြရန်လည်း သဘောတူညီမှုများ ရရှိထားပြီ ဖြစ်ကြောင်းသိရသည်။
လွန်ခဲ့သောနှစ်က မတ်ပဲစိုက်ပျိုးမှုကို မျက်မြင်သိရှိထားသော လေးတောင်ဒေသခံ လယ်သမား တစ်ချို့ကလည်း မိမိဘာသာ ကုန်ကျခံပြီး တစ်ဧက၊ နှစ်ဧက စသည်ဖြင့် စမ်းသက် စိုက်ပျိုးနိုင်ရန် စတင် ထွန်ယက်စိုက်ပျိုးရန်ပြင်ဆင်နေကြပြီး အရေအတွက်လည်း တိုးတက် များပြား လာနေသည်ဟု သိရသည်။
မတ်ပဲကို စတင်မိတ်ဆက်စိုက်ပျိုးသူ ဦးသန်းဝင်းမှ သူ၏ မျှော်မှန်း ပြောချက်မှာ နောင် ငါး နှစ် အတွင်း ရမ်းဗြဲမြို့နယ်တစ်ခွင်အပြင် ရခိုင်ပြည်နယ် တစ်ချို့ ဒေသများတွင် မတ်ပဲ စိုက်ပျိုးရေး လွှမ်းစေရမည်ဟု ပြောဆိုသည်။
သို့သော် ဒေသအတွင်းက လယ်သမားဝင်ငွေတိုးလာစေရန် နိုင်ငံတော်အစိုးရ၏ပံ့ပိုး ကူညီ အထောက်အကူပေးမှု၊ ပူးပေါင်းဆောင်ရွက်မှုများ အကြီးအကျယ် လိုအပ်နေသည်ဟု ဦးသန်းဝင်းက ပြောဆိုသည်။
No comments:
Post a Comment