မင်းမင်း
နေပြည်တော်၊ MICC-2မှာ နိုဝင်ဘာ ၅ရက်ကကျင်းပတဲ့ ကလေးစာပေပွဲတော် ဖွင့်ပွဲအခမ်းအနားကို တက်ရောက်လာတဲ့ နိုင်ငံတော်သမ္မတဦးထင်ကျော်ဟာ သူ့ရဲ့ ဖခင်ဖြစ်သူ စာရေးဆရာကြီး မင်းသုဝဏ်ရဲ့ စာတွေ၊ ကဗျာတွေအကြောင်း ကလေးတွေကို ပြောပြရင်း ဝမ်းနည်းပြီး မျက်ရည်ကျခဲ့ပါတယ်။
ဖခင်ဖြစ်သူ စာရေးဆရာကြီးမင်းသုဝဏ်ဟာ ကလေးကဗျာတွေ၊ ပုံပြင်တွေများစွာကို ရေးသားခဲ့သူဖြစ်တဲ့အကြောင်း စာပေပွဲတော်ကို တက်ရောက်လာတဲ့ ရာပေါင်းများစွာသော ကလေးငယ်တွေကို သမ္မတဦးထင်ကျော်က ပြောပြရင်း ဝမ်းနည်းပြီး မျက်ရည်ကျခဲ့တာ ဖြစ်ပါတယ်။
အသက် ၉၆နှစ်အရွယ်မှာ ကွယ်လွန်ခဲ့တဲ့ စာရေးဆရာကြီး မင်းသုဝဏ်ဟာ ကလေးစာပေ၊ ပုံပြင်နဲ့ ငှက်အကြောင်းတွေ အများကြီးရေးသားသွားခဲ့တယ်လို့ ပြောကြားရင်း “သူ(မင်းသုဝဏ်)မရှိတော့ပေမယ့် ဒီပုံက…” ဆိုပြီး ကလေးကဗျာတွေနဲ့အတူ ဗီနိုင်းမှာ ယှဉ်တွဲပြထားတဲ့ ဖခင်ဖြစ်သူရဲ့ ဓာတ်ပုံကို ညွှန်ပြရင်း သမ္မတ ဦးထင်ကျော်က စကားဆက်ပြောဖို့ကြိုးစားပေမယ့် ဆို့နင့်သံပါလာပြီး မျက်ရည်ကျလာတာပါ။
ကြာချိန်အားဖြင့် စက္ကန့် ၃၀လောက် မျက်ရည်ကျပြီးတဲ့နောက်မှာတော့ “သားတို့သမီးတို့ကို ဘယ်လောက်ချစ်တယ်၊ သားတို့သမီးတို့ကို ဘယ်လောက်တန်ဖိုးထားတယ်ဆိုတာကို သိစေချင်လို့ပါပဲ။ ဒါပဲ သားတို့သမီးတို့နော်။ ကျေးဇူးတင်ပါတယ်” လို့ပြောရင်း အမှာစကားကို နိဂုံးချုပ်လိုက်ပြီး ကလေးစာပေတွေ ပြသ၊ ရောင်းချထားတဲ့ ပြခန်းတွေကို လှည့်လည် ကြည့်ရှုပါတယ်။
No comments:
Post a Comment