သီပေါမြို့နယ် နမ့်လန် ကျေးရွာအုပ်စုရှိ မြို့မဈေးမီးလောင်မှုကြောင့် ဆိုင်ခန်း ၅၄၅ ခန်း လောင်ကျွမ်း ပျက်စီးခဲ့ပြီး ကျပ်သိန်းပေါင်း ၂၄၀၀ ကျော် ဆုံးရှုံးခဲ့ရကြောင်း နမ့်လန် ကျားခေါင်းပါတီ ဥက္ကဌ စိုင်းဆမ်လျန်းက ပြောသည် ။
နိုဝင်ဘာလ ၆ ရက်နေ့ ညနေ ၆ နာရီခန့်ကနမ့်လန်ဈေးကြီး မီးလောင်ခဲ့ခြင်းဖြစ်ပြီး ၂ နာရီကြာလောင်ကျွမ်းမှုအတွင်း ဈေးကြီးတခုလုံး လောင်ကျွမ်းပြာကျခဲ့သည်။ ည ၈ နာရီကျော်မှသာ မီးညွန့်ကျိုးသွားကြောင်းဆိုပါသည် ။
‘ မီးစလောင်တဲ့ ဆိုင်က မီးကြွင်းမီးကျန် ကျန်နိုင်တဲ့ ဆိုင်မျိုးလည်း မဟုတ်ဘူး။ ကုန်စုံဆိုင်ဆို တော့ လေ။ အခုထိ လူ ၅ ယောက်လောက်ကို ခေါ်စစ်ဆေးနေတယ်။ တစ်ချို့ကလည်း ရှို့မီးလို့ အသံထွက်နေတယ်။ ဘာကြောင့်ဆိုတာလည်း အဖြေမပေါ်သေးဘူး ‘ ဟု စိုင်းဆမ်လျန်းက ဆိုသည် ။
ညနေပိုင်းဈေးပိတ်ချိန်တွင် မီး စတင်လောင်ကျွမ်းခြင်းဖြစ်ရာ ဆိုင်တွင်း ပစ္စည်းများ အချိန်မှီ မသယ်နိုင် ထုတ်နိုင်ဘဲ ဆုံးရှုံးမှုများရှိခဲ့ကြောင်း ဒေသခံစိုင်းနောင်ကလည်း ပြောသည် ။
” ကျနော့အမျိုးတွေဆို ဆိုင်တွေအားလုံးပါသွားတာ။ ၅ ဆိုင်စလုံးပဲ ။ ဒီဒေသက လူအများစုက တောင်သူလူထုလေ။ ဒီနှစ် ပြောင်းတွေက ခွက်ခွက်လှန်အောင်ရှုံးနေပြီး မီးကပါ ထပ်လောင်တော့ ဒေသခံတွေ ဒုက္ခရောက်တာပေါ့ “ဟု စိုင်းနောင်က မှတ်ချက်ပြုသည် ။
နမ့်လန်မြို့မဈေး မီးလောင်မှုတွင် ဒေသတွင်းလူထုနှင့်အတူ သီပေါ၊ ကျောက်မဲ ၊ လားရှိုး ၊ မိုင်းခေးတို့မှ မီးသတ်ကား ၁၀ စီးကျော် လာရောက်ငြိမ်းသတ်ခဲ့ရသည်ဟု သိရသည် ။
မီးလောင်ကျွမ်းမှုအရင်းအမြစ်မသိရသေးကြောင်း၊ လောင်ကျွမ်းပြာကျမှုအား ရှင်းလင်းရန်အချိန် ၁၅ ရက်ခန့်ယူရမည်ဖြစ်ကြောင်း ပါတီဝင်အကြီးအကဲများကပြောဆိုနေကြပါသည် ။
No comments:
Post a Comment