လူမှုကွန်ရက်မှာ ဆဲဆို စော်ကားသူတွေကို ဆက်သွယ်ရေး ပုဒ်မ ၆၆ (ဃ) နဲ့ တရားစွဲဆို အရေးယူ အပြစ်ပေးတဲ့ ဖြစ်စဉ်တွေ ခပ်စိပ်စိပ် တွေ့လာရတယ်။ ကြက်ဖကြီး၊ ဦးဖာ၊ ချစ်သမီး၊ မောင်ဆောင်းခ တို့ တို့ကအစ နေပြည်တော်က ကိုနေလင်းအောင်၊ ဦးမျိုးရန်နောင်သိမ်း၊ ဒေါက်တာ သန်းထွဋ်အောင်၊ ဦးဝေဖြိုးတို့အဆုံး အားလုံး ပုဒ်မ ၆၆ (ဃ) နဲ့ တရားစွဲဆို ခံခဲ့ရသူတွေ ဖြစ်တယ်။ ဒီဥပဒေ ပြဋ္ဌာန်းပြီးနောက်ပိုင်း အရင်အစိုးရ လက်ထက်မှာလည်း တရားစွဲဆို အရေးယူခံခဲ့ကြရသူတွေ ရှိသလို လက်ရှိအစိုးရ လက်ထက်မှာလည်း တရားစွဲဆိုခံ ထားကြရ သူတွေ ရှိတယ်။
သမ္မတ၊ နိုင်ငံတော် အတိုင်ပင်ခံပုဂ္ဂိုလ် တပ်မတော် ကာကွယ်ရေး ဦးစီးချုပ်ကို “စော်ကား”ရေးသားတယ်ဆိုပြီး ပုဒ်မ ၆၆ (ဃ) နဲ့ တရားစွဲဆို ခဲ့တာ ဖြစ်ပါတယ်။
ပုဒ်မ ၆၆ (ဃ) နဲ့ တရားစွဲဆိုကြတဲ့ အခါ (ရန်ကုန်တိုင်း ဝန်ကြီးချုပ် ဦးဖြိုးမင်းသိမ်းက လွဲ) နစ်နာသူ ကိုယ်တိုင်က တရားစွဲဆိုတာ မဟုတ်ပဲ အခြားသူက တရားစွဲဆိုကြပါတယ်။ ပြစ်မှုထင်ရှားတယ် လို့ တရားရုံးက ဆုံးဖြတ်ခဲ့ရင် ၃ နှစ်ထက် မပိုသော ထောင်ဒဏ်ဖြစ်စေ ငွေဒဏ် ဖြစ်စေ ချမှတ်နိုင်တယ်လို့ ဖွင့်ဆိုထားတယ်။ ဒီပုဒ်မက ရဲအရေးပိုင်တဲ့ အမှုဖြစ်ပြီး အာမခံမရပါဘူး။
ဥပဒေရဲ့ ရည်ရွယ်ချက် က နိုင်ငံဖွံ့ဖြိုး တိုးတက်စေဖို့ ဆက်သွယ်ရေး နည်းပညာတွေကို ထိရောက်စွာ အသုံးပြုရေး အတွက် ပြဋ္ဌာန်းခဲ့တာပါ။ ဒါပေမယ့် လူမှုကွန်ရက်မှာ မိမိခံစားချက်ကို ရေးသားဖြန့်ဝေကြရာက ပုဒ်မ ၆၆ (ဃ) နဲ့ တရားစွဲဆို အရေးယူတဲ့ ဖြစ်စဉ်တွေ ဖြစ်ခဲ့ရတာပါ။ အလဲဗင်းမီဒီယာကတော့ ရန်ကုန်တိုင်းဝန်ကြီးချုပ် လဒ်စားတယ်လို့ စွပ်စွဲချက်ကြောင့် ဖြစ်ပါတယ်။
ပုဒ်မ ၆၆ (ဃ) က လွတ်လပ်စွာ ရေးသားပြောဆိုခွင့်ကို ကန့်သတ်ထားသလားလို့ မေးခွန်း ထုတ်ကြသူတွေ ရှိပါတယ်။ ၂၀၀၈ အခြေခံဥပဒေ ပုဒ်မ ၃၅၄ မှာ “လူတိုင်းသည် ပြဋ္ဌာန်းထားသည့် ဥပဒေများနှင့် မဆန့်ကျင်လျှင် လွတ်လပ်စွာ ရေးသားခွင့် ထုတ်ဖော်ပြောဆိုခွင့် ရှိသည်” လို့ ရေးသားထားပါတယ်။ လွတ်လပ်စွာ ထုတ်ဖော်ပြောဆို ရေးသားခွင့် ရှိပေမယ့် လွတ်လပ်စွာ ဆဲရေးတိုင်းထွာ စော်ကားခွင့် မရှိလို့ ပုဒ်မ ၆၆ (ဃ) ရှိဖို့ လိုအပ်တယ် လို့ ဆိုကြသူ တွေလည်း ရှိပါတယ်။ တဖက်ကလည်း ဝေဖန်ပြောဆိုမှုတွေကို စော်ကားတယ်ဆိုပြီး ၆၆ (ဃ) နဲ့ လိုသလို သုံးနိုင်တယ်လို့လည်း ပြောကြတယ်။
ဒီဥပဒေက ရဲအရေးပိုင်ခွင့် ရှိတဲ့ ဥပဒေဖြစ်ပြီး အာမခံ မရနိုင်တာကြောင့် တရားစွဲဆို ခံရသူအနေနဲ့ ဖြေရှင်းခွင့် မရနိုင်ဘဲ လတ်တလော အချုပ်ကျခံရမှာ ဖြစ်တယ်။ ဒီနေရာမှာ ဥပဒေက ရှိသင့်သော်လည်း အာမခံ ပေးနိုင်တဲ့ ဥပဒေဖြစ်ဖို့ လိုတယ်လို့ တောင်းဆိုကြသူတွေရှိသလို အလဲဗင်းကိစ္စမှာဆို အသရေဖျက်မှုနဲ့ တရားစွဲနိုင်ပေမယ့် အာဏာပိုင်တွေက အာမခံ မပေးချင်လို့ ဒီ ၆၆ (ဃ)နဲ့ပဲ စွဲတာလို့ ဆိုနေကြသူတွေလည်း ရှိပါတယ်။
နိုင်ငံတကာမှာလည်း ဆက်သွယ်ရေး ဥပဒေ ပုဒ်မ Cybercrime Law တွေ ရှိပါတယ်။ ဒါပေမယ့် နိုင်ငံတော်ရဲ့ အင်စတီကျူးရှင်းတွေနဲ့ ပုဂ္ဂလိက ပိုင်ဆိုင်မှုတွေရဲ့ နည်းပညာဆိုင်ရာ လုံခြုံရေးကို ချိုးဖောက်ဝင်ရောက်မှ ဒါမှမဟုတ် လူမျိုးရေး ဘာသာရေး အဓိကရုဏ်းတွေ ဖြစ်အောင် လှုံ့ဆော်ရေးသားမှ ဒါမှမဟုတ် လိင်အမြတ်ထုတ်မှု အထူးသဖြင့် ကလေးသူငယ်တွေအပေါ် ကျူးလွန်သူတွေကို ပစ်မှတ်ထား ဖော်ထုတ် အရေးယူပါတယ်။
အခု လူပြောများတဲ့ ၆၆ (ဃ) နဲ့ ပတ်သက်လို့ကတော့ ဒီဗီဘီမှာ အိပ်ဖွင့်ပေးစာ ရေးခဲ့တဲ့ သင့်ဘဝ စာရေးဆရာ တင်မောင်သန်းရဲ့ ကောက်ချက်လေး သဘောကျမိသဗျ။ သူက “နိုင်ငံတနိုင်ငံအနေနဲ့ နယ်ပယ်အသစ်ထဲကို ဝင်ရတဲ့အခါ မိမိကိုယ်ကိုယ် နှိမ့်ချ၊ လေ့လာသင်ယူ၊ နားလည် သည်းခံ ခွင့်လွှတ်၊ အပြန်အလှန်ထိန်းသိမ်းပေးဆိုတဲ့ စိတ်ဓာတ်တွေက အရေးကြီးလှပါတယ်။ စနစ်ဟောင်းကို စနစ်အသစ်နဲ့ အစားထိုးတဲ့အခါ၊ အဟောင်းနဲ့ မလွှဲမရှောင်သာ စရမှာဖြစ်ပေမယ့် အနှစ်နှစ်အလလက ခိုင်ခံ့ခဲ့တဲ့ အဲဒီစနစ်ဟောင်းကြီးထဲ အစိုးရအသစ်က ခေါင်း စ ဝင်မိသွားမှာကိုတော့ အစိုးရိမ်ကြီး စိုးရိမ်မိလေရဲ့” တဲ့။
ကျနော်ကတော့ အစိုးရအနေနဲ့ နိုင်ငံတည်ဆောက်ရေးနဲ့ ပြုပြင်ပြောင်းလဲရေးတွေမှာ အာရုံစိုက်ပြီး အချိန်နဲ့ ပြည်သူ့ဘဏ္ဍာကို အသုံးချစေချင်တာပါပဲ။ ဆဲဆိုပုတ်ခတ်ခြင်းလို အသေးအဖွဲတွေကို အာရုံမစိုက်စေချင်ပါ။
တဘက်မှာလည်း လွတ်လပ်စွာ ထုတ်ဖော်ပြောဆိုခွင့်နဲ့ လွတ်လပ်စွာ ဆဲရေးတိုင်းထွာ စော်ကားခွင့် မတူဘူးလို့ ယုံကြည်ပါတယ်။ မည်သူ့ကို မဆို အပြုသဘောနဲ့ ဝေဖန်ခွင့် ရှိသော်ငြား လူမျိုး တမျိုးနဲ့ တမျိုး၊ ဘာသာတရားတခုနဲ့ တခု အပေါ်မှာ စွပ်စွဲပြစ်တင် ပုတ်ခတ်တာ မလုပ်သင့်ပါဘူး။ အဖွဲ့အစည်း အသင်းအပင်း တခုခု အပေါ်မှာလည်း မဟုတ်မမှန် လုပ်ကြံစွပ်စွဲတာတွေ မလုပ်ကြဖို့ လိုအပ်ပါတယ်။
အထူးသဖြင့် လူမှုကွန်ရက်ကို အသုံးပြုကြသူတွေ အနေနဲ့ အမုန်းစကားတွေ ရုန့်ရင်းကြမ်းတမ်း တာတွေ မဖြန့်ဝေမိဖို့ လိုပါ တယ်။ ရုန့်ရင်းကြမ်းတမ်း ရိုင်းစိုင်းသူတွေကို လူရာမသွင်းမိဖို့ အရေးကြီးပါတယ်။ အဲဒီလိုလူတွေ မိတ်ဆွေစာရင်းမှာ ပါနေရင် အမြန်ပယ်ဖျက် ပစ်ကြပါ။ ရိုင်းစိုင်းတာကို လက်မခံကြောင်း ပြပါ။
No comments:
Post a Comment