“တိုင်းပြည်တခုရဲ့ လွတ်လပ်စွာ သတင်းရယူ ရေးသားဖော်ပြခွင့် သတင်းလွတ်လပ်ခွင့်က အဲဒီတိုင်းပြည် ဒီမိုကရေစီ ဘယ်လောက် ထွန်းကားတယ်ဆိုတာကို ပြသတာပဲဖြစ်တယ်”
ပြီးခဲ့တဲ့ ရက်ပိုင်းကပဲ ကျင်းပပြီးစီးသွားတဲ့ မြန်မာသတင်းသမဂ္ဂညီလာခံမှာ နိုင်ငံတကာက မြန်မာသတင်းသမားများ၊ နိုင်ငံရေးသမားများ၊ လူမှုအဖွဲ့အစည်းများမှ ပုဂ္ဂိုလ်များ ၀ိုင်းဝန်းဆွေးနွေးကြတဲ့ “သတင်းလွတ်လပ်ခွင့်နဲ့ ဒီမိုကရေစီရေး” အကြောင်း ဆွေးနွေးခန်းတခုမှာ ဗွီအိုအေသတင်းဌာနက အယ်ဒီတာ ဦးကျော်ဇံသာ ပြောကြားခဲ့တဲ့ စကားဖြစ်ပါတယ်။
မြန်မာသတင်းသမဂ္ဂညီလာခံဟာ ၀ါရင့်သတင်းသမားကြီးတွေ၊ ၀ါရင့်နိုင်ငံရေးသမားကြီးတွေနဲ့ မျိုးဆက်သစ်သတင်းသမားတွေ အကောက်အယူ အားပြိုင်ကြတဲ့ ညီလာခံတခုဖြစ်ပါတယ်။ ဒီညီလာခံမှာ ဗွီအိုအေသတင်းဌာက မြန်မာ့ဝါရင့်နိုင်ငံရေးသမားကြီး ဖြစ်တဲ့ ဒီမိုကရက်တစ်ပါတီက ဦးသုဝေ၊ နိုင်ငံရေးအကျဉ်းသားဟောင်း ဒေါက်တာခင်ဇော်ဝင်းတို့ကို ပြည်တွင်းကနေ ဖိတ်ကြားပြီး စကားဝိုင်း ဆွေးနွေးပွဲတခု စီစဉ်ခဲ့ပါတယ်။
ပြည်တွင်းနိုင်ငံရေးသမားတွေကို ဖုန်းနဲ့ မေးမြန်းရုံလောက်ပဲ အခြေအနေပေးတဲ့ အချိန်အခါမျိုးမှာ ဦးသုဝေလို ပြည်တွင်းက နိုင်ငံရေးသမားကြီးကို အခုလို မြန်မာသတင်းသမဂ္ဂညီလာခံမှာ လူကိုယ်တိုင် တွေ့ဆုံမေးမြန်းခွင့်ရမှာဆိုတော့ ပြည်ပအခြေစိုက် သတင်းဌာနတွေအနေနဲ့ ရတဲ့အခွင့်အရေးကို လက်လွတ်မခံနိုင်ကြပါဘူး။ ဗွီအိုအေကလည်း ညီလာခံတက်ရောက်လာတဲ့ သတင်းဌာနက ပုဂ္ဂိုလ်တွေကို လွတ်လပ်စွာ သတင်းရယူ ဖော်ပြခွင့်ပြုပြီး တက်ရောက်လာသူအားလုံးကို ပါဝင်ဆွေးနွေးမေးမြန်းကြဖို့ ဖိတ်ခေါ်ခဲ့ပါတယ်။
“ကျနော့်အနေနဲ့ ဘာမှ အကန့်အသတ်မရှိဘူး။ လွတ်လပ်စွာ သတင်းရယူနိုင်ပါတယ်။ ဓာတ်ပုံ ရိုက်ယူနိုင်ပါတယ်။ အခုချိန်မှာပဲ တိုက်ရိုက်လွှင့်ထုတ်နိုင်သူတွေ ရှိရင်လည်း ကြိုဆိုပါတယ်” လို့ ဗွီအိုအေ မြန်မာဌာနမှူး ဦးသန်းလွင်ထွန်းက ကြေညာပြီး စကားဝိုင်းဆွေးနွေးပွဲကို စတင်လိုက်ပါတယ်။
ဒီအချိန်မှာပဲ တက်ရောက်လာကြတဲ့ သတင်းသမားများက ကင်မရာ အကြီးအသေး ကိုယ်စီကိုင်ပြီး စကားဝိုင်းဆွေးနွေးပွဲ ပြုလုပ်ရာ စားပွဲအနီးကို အပြေးအလွှား ရောက်ရှိလာကြပါတော့တယ်။ တီဗွီသတင်းထောက်တဦးက စားပွဲဝိုင်းဆွေးနွေးဝိုင်း အလယ်မှာ ၀င်နေရာယူပြီး ဆွေးနွေးပွဲ တက်ရောက်လာတဲ့ ၀ိုင်းထိုင်သူတွေကြားမှာ မတ်တပ်ရပ်ပြီး အပီအပြင် ရိုက်ကူးပါတော့တယ်။ ဓာတ်ပုံဆရာများကလည်း တီဗွီကင်မရာရှေ့က ပိတ်ကာကာ အပီအပြင် ရိုက်ကူးကြပါတော့တယ်။
နိုင်ငံတကာ စကားဝိုင်းဆွေးနွေးပွဲတွေမှာ တက်ရောက်သတင်းရယူသူ ဓာတ်ပုံ၊ ဗွီဒီယိုသတင်းထောက်တွေကတော့ ဆွေးနွေးပွဲ တက် ရောက်လာသူတွေကို အနှောင့်အယှက်မဖြစ်အောင် စည်းကမ်းအတိအကျလိုက်နာပြီး သတ်မှတ်နေရာကသာ ဓာတ်ပုံရိုက်ကြ၊ ဆွေးနွေး သူတွေရှေ့က ဖြတ်ချင်ရင်လည်း အတတ်နိုင်ဆုံး အနှောင့်အယှက်မဖြစ်အောင် ကိုယ်ကိုကိုင်းပြီး ငုံ့ပြီး ကုန်းကုန်းကွကွ ပိပိရိရိ ရယူကြ တာ တွေ့ရပါတယ်။
မြန်မာသတင်းသမားတွေကတော့ စင်မြင့်ပေါ်တက်လျှောက်နေတဲ့ ကိုယ်ဟန်ပြ မောင်မယ်တွေလို၊ မော်ဒယ်တွေလို လွတ်လွတ်လပ်လပ်ကြီးကို ဓာတ်ပုံ၊ ဗွီဒီယိုတွေ ရိုက်ကူးခဲ့ကြတာ တွေ့ရပါတယ်။ စကားဝိုင်းဆွေးနွေးပွဲ တက်ရောက်လာသူများက ဦးဆောင်ဆွေးနွေးနေသူတွေနဲ့ ဓာတ်ပုံ၊ တီဗွီရိုက်ကူးသူတွေကို အလယ်မှာထားပြီး ၀ိုင်းထိုင်နေရတဲ့အတွက် ပန်ချီဆရာ မျက်စိနဲ့ကြည့်ရင် စကားဝိုင်းဆွေးနွေးပွဲနဲ့မတူဘဲ ရုပ်ရှင်ရိုက်ကွင်းတခုကို ထိုင်ကြည့်နေကြရသလို ဖြစ်နေပါတယ်။ဆွေးနွေးပွဲက အကြိတ်အနယ်ပင်။ တက်ရောက်လာသူ အများစုရဲ့ အားတက်သရော ဆွေးနွေးမေးမြန်းသမျှကို ဦးဆောင်ဆွေးနွေးသူများက ပြန်လှန်ချေပဆွေးနွေးပြီး အချိန် (၂) နာရီလောက်အကြာမှာ ဆွေးနွေးပွဲကို အပြီးသတ် ရပ်နားလိုက်ပါတယ်။
ဆွေးနွေးပွဲကို ရပ်နားလိုက်ပေမယ့် ဗွီအိုအေက တာဝန်ယူ စီစဉ်ဖိတ်ကြားတဲ့ နိုင်ငံရေးသမားကြီး ဦးသုဝေ အပါအ၀င် ဒေါက်တာခင်ဇော်ဝင်းနဲ့ အန်စီယူဘီမှ ဦးမောင်မောင်တို့ကတော့ သတင်းထောက်များ၊ အမှတ်တရ ဓာတ်ပုံရိုက်သူများကြားက မထွက်နိုင်သေးဘဲ တရုန်းရုန်းနဲ့ အလုပ်ဖြစ်နေကြပါတယ်။ ဒီမြင်ကွင်းကို ကြည့်ပြီး မြန်မာသတင်းမီဒီယာသမားများ အခွင့်အရေးကို မိမိရရ အသုံးချတတ်လေခြင်းလို့ အားကျမိပါရဲ့။ ဂုဏ်ယူမိပါရဲ့။
ဒါတင် ဘယ်ကမတုန်း။ အဲဒီနေ့ ညနေမှာပဲ အွန်လိုင်းမီဒီယာတခုမှာ ဦးသုဝေနှင့် အင်တာဗျူးဆိုပြီး တီဗွီသတင်းတပုဒ် အမြန်ဆုံး တက်လာနိုင်ခဲ့တယ်။ တီဗွီသတင်းက ညီလာခံမှာ ဗွီအိုအေကလုပ်တဲ့ သတင်းမဟုတ်ဘဲ သီးသန့်တွေ့ဆုံ မေးမြန်းခန်းဖြစ်ပါတယ်။
ညီလာခံတက်နေတဲ့ သတင်းဌာနအသီးသီးက သတင်းထောက်တွေ၊ နိုင်ငံရေးလှုပ်ရှားသူတွေက ဦးသုဝေ အပါအ၀င် ဒေါက်တာခင်ဇော်ဝင်းတို့ကို ညီလာခံရဲ့ တခြားဆွေးနွေးပွဲ အစီအစဉ်တွေကိုပါ တက်ရောက်ပြီး ပါဝင်ဆွေးနွေးဖို့ မျှော်လင့်ခဲ့ကြတာပါ။ ဒါပေမယ့် ဦးသုဝေက သူ့ဆွေးနွေးပွဲတခုပဲ ညီလာခံမှာ တွေ့လိုက်ရပြီး နောက်ရက်တွေမှာ အရိပ်အယောင်တောင် မတွေ့ရတော့ပါဘူး။ ထို့နည်းတူပဲ ဗွီအိုအေ မြန်မာဌာနမှူးကိုလည်း ညီလာခံစားပွဲဝိုင်းမှာ မတွေ့ရတော့ဘဲ ပျောက်ခြင်းမလှ ပျောက်သွားကြတာကို တွေ့ရပါတယ်။
ဝါရင့်သတင်းသမားကြီးတွေ စုံညီတဲ့ ဒီညီလာခံမှာ လူငယ်သတင်းသမားတွေအနေနဲ့ ၀ါရင့်နိုင်ငံရေးသမားကြီးတွေ၊ သတင်းသမားကြီးတွေရဲ့ အတွေးအမြင် ရှုမြင်သုံးသပ်ပုံတွေကို မြင်ချင်ကြားချင်ပေမယ့် သူတို့ကို ညီလာခံဆွေးနွေးပွဲမှာ အရိပ်ကလေးတောင် မမြင်ရဆိုသလို ဖြစ်ခဲ့ကြပါတယ်။
ညီလာခံနောက်ဆုံးနေ့ ပြီးသွားလို့ အစည်းအဝေးခန်းမက ထွက်လာတဲ့အခါ ဗွီအိုအေ မြန်မာဌာနမှူး ဦးသန်းလွင်ထွန်းကိုတွေ့တော့ ညီလာခံမှာ ပျောက်ချက်သားကောင်းနေတာကို မေးမိပါတယ်။ သတင်းဌာနကြီးတခုရဲ့ ဌာနမှူးတဦးက ညီလာခံဆွေးနွေးပွဲမှာ ဒိုင်ခံဆွေးနွေးမနေသင့်ဘူးလား။ သို့ပေမယ့် မဝေဖန်ခင် ချီးကျူးစကားဆိုတတ်တဲ့ မကောင်းလှတဲ့အကျင့်နဲ့ သူ့ကို စကားစမြည်ပြောဖြစ်ပါတယ်။
“ဦးသန်းလွင်ထွန်းတို့ ဦးသုဝေကို ဖိတ်ပြီး လုပ်တဲ့ ဆွေးနွေးပွဲက တကယ်ကို အသက်ဝင်တယ်နော်။ အားလုံးလည်း စိတ်ဝင်စားတယ်။ နောက် ချင်းမိုင်အခြေစိုက် သတင်းဌာနတွေဆို ချက်ချင်း တီဗွီသတင်းတွေ တက်တယ်။ ဒါပေမယ့် ဦးသန်းလွင်ထွန်းကို ညီလာခံရဲ့ တခြားဆွေးနွေးပွဲတွေမှာ မတွေ့ဘူးနော်” လို့ ပြောလိုက်တယ်။
“ဟုတ်တယ်ခင်ဗျ။ ကျနော် ဦးသုဝေ ပျောက်နေလို့ လိုက်ရှာနေရတယ်ခင်ဗျာ။ ဒါနဲ့ ဘယ်သတင်းဌာနမှာ တီဗွီသတင်း တက်တာလဲဗျ” လို့ ထူးထူးဆန်းဆန်း ကျမကို ပြန်မေးခွန်းထုတ်နေပါတယ်။
သတင်းဌာနတွေက ဦးသုဝေကို ခေါ်ယူဖိတ်ကြား ရိုက်ကူးမှုများ လုပ်ဆောင်နေကြလေရာ ဦးသုဝေမှာ ပျောက်ခြင်းမလှ ပျောက်ပျောက်သွားပြီး နေထိုင်စားသောက် ခရီးသွားလာရေးအတွက် တာဝန်ယူထားရတဲ့ ဗွီအိုအေ မြန်မာဌာနမှူးမှာ လူခွဲတွေ စေလွှတ်ပြီး ဦးသုဝေ ရှာပုံတော်ဖွင့်နေရကြောင်း သိလိုက်ရပါတယ်။
ညီလာခံကျင်းပနေတဲ့ ဟိုတယ်မှာ သတင်းဌာနကြီးတခုက အခန်းတခန်းငှားပြီး ဦးသုဝေနဲ့ အခြားနိုင်ငံရေးသမားတွေကို စကားဝိုင်းဆွေးနွေးပွဲ ပြုလုပ်နေတာ ဗွီအိုအေ မြန်မာဌာနမှူး မသိရှိဘဲ ချင်းမိုင်မြို့ထဲမှာရှိတဲ့ သတင်းဌာနတွေကို လိုက်လံမေးမြန်းနေရကြောင်း အံ့သြဖွယ်သိရှိလိုက်ရပါတယ်။
မေးခွန်းများ ရှိနေပါတယ်။ ဒီလိုစကားဝိုင်းဆွေးနွေးပွဲ ရိုက်ကူးမှုများ၊ တွေ့ဆုံမေးမြန်းမှုများကို ဒီမိုကရက်တစ်ပါတီမှ ဦးသုဝေကို တာဝန်ယူဖိတ်ကြားထားတဲ့ ဗွီအိုအေ မြန်မာဌာနမှူးက ဘာကြောင့်များ မသိရှိရပါလိမ့်။ သေချာတာတခုကတော့ အခြားသူများ ညီလာခံစင်မြင့်မှာ မြန်မာ့နိုင်ငံရေး၊ သတင်းမီဒီယာအရေး၊ အကြောင်းအရာ အမျိုးမျိုးကို အကြိတ်အနယ် ဆွေးနွေးနေချိန်မှာ ညီလာခံကန့်လန့်ကာ နောက်ကွယ်မှာတော့ ဗွီအိုအေ မြန်မာဌာနမှူးခမျာမှာ လူမသိ သူမသိ ဒီမိုကရက်တစ်ရှာပုံတော် ဖွင့်နေခဲ့ရသည် ဆိုခြင်းပင် …။
No comments:
Post a Comment