မျိုးချစ်သူ/ ၃၀ မတ် ၂ဝ၁ဝ
ရန်ကုန်တွင် ယနေ့မှစ၍ လုံခြုံရေးတိုးမြှင့်တော့မည်ဖြစ်ကြောင်း အာဏာပိုင်အဖွဲ့တခုဖြစ်သော တယကမှ အရာရှိကြီးတဦးက ပြောသည်။
အမျိုးသားဒီမိုကရေစီအဖွဲ့အနေဖြင့် ပါတီမှတ်ပုံမတင်ကြောင်းနှင့် ရွေးကောက်ပွဲမ၀င်ကြောင်း ယမန်နေ့က အတိအလင်း ကြေညာလိုက်ပြီးနောက် ယင်းသို့ လုံခြုံရေးတိုးမြှင့်ရန် စီစဉ်ခြင်းဖြစ်ကြောင်း သိရသည်။
“အန်အယ်လ်ဒီက ရွေးကောက်ပွဲမ၀င်ဘူးဆိုတော့ ဥပဒေအရ တရားမ၀င်တဲ့ပါတီ ဖြစ်သွားပြီ။ ဒါ့ကြောင့် အချိန်မရွေး ရွေးကောက်ပွဲကို ပုန်ကန်မှုတွေ လုပ်နိုင်တယ်။ ဒါကိုကြိုတင်ကာကွယ်ရမယ်။ ကျနော်တို့အနေနဲ့ကတော့
အထက်အမိန့်ကို လိုက်နာဖို့ပါပဲ” ဟု ထိုအရာရှိက ပြောသည်။
ရန်ကုန်တွင် လုံခြုံရေးများ အင်အားပြမှုကို တနေ့လျှင်တကြိမ် ပုံမှန် နေ့ကင်းအဖြစ် လှည့်လည်ဆောင်ရွက်ကြောင်း၊ ကင်းလှည့်ရာတွင် ၀တ်စုံပြည့်ရဲများက လက်နက်များ အစုံအလင်ဖြင့် ရဲ (police) ကား အနည်းဆုံး (၃) စီးမှ (၅) စီးထိ အသုံးပြုကြောင်း၊ ထို့အပြင် မြို့နယ်အလိုက် ကြက်ခြေနီ၊ အရန်မီးသတ်များနှင့် ကြံ့ဖွံ့အသင်းဝင်များကိုလည်း အလှည့်ကျ ညကင်းအဖြစ် ဆောင်ရွက်စေရန် စီစဉ်ထားကြောင်း သိရသည်။
နအဖသည် လွန်ခဲ့သော ၂၀၀၈ ခုနှစ် မေလ၌လည်း ဖွဲ့စည်းပုံအခြေခံဥပဒေ မဲဆန္ဒခံယူပွဲအတွက် လုံခြုံရေးကို အပြည့်အ၀ အသုံးပြုဆောင်ရွက်ခဲ့သည်။
“ရန်ကုန်မှာက ပြီးခဲ့တဲ့ တပ်မတော်နေ့က စပြီးတော့ လုံခြုံရေးပိုပြီးချတာ တွေ့ရတယ်။ မီးပွိုင့်တွေမှာ အများဆုံးပဲ။ လာသမျှကားတွေကို လိုက်တားတယ်၊ စစ်တယ်။ ဘာ့ကြောင့် အခုလို စစ်ဆေးတယ်ဆိုတာကို လုံခြုံရေးဆောင်ရွက်နေသူတွေ မသိဘူး။ လုံခြုံရေးဆောင်ရွက်နေသူတွေကတော့ ယာဉ်ထိန်းရဲ၊ မီးသတ်၊ ကြက်ခြေနီ၊ ကြံ့ဖွံ့တွေဖြစ်တယ်” ဟု ရန်ကုန်မြို့ခံတဦးက ပြောသည်။
ရန်ကုန်တွင် ၀တ်စုံပြည့်ရဲများ ရဲကားများနှင့် လှည့်လည်မှုပြုလုပ်တိုင်း ပြည်သူတို့က ကျေနပ်မှုမရှိကြကြောင်း မင်္ဂလာတောင်ညွန့်နေသူများက ပြောသည်။
“အလကားနေရင်း လှည့်ပြီးတော့ အင်အားပြနေတာ၊ အလုပ်မရှိ အလုပ်ရှာလုပ်နေတာ။ သူတို့လုပ်တာနဲ့ လူတွေ နေရင်းထိုင်ရင်း စိုးရိမ်နေရတယ်” ဟု အဆိုပါမြို့နယ်တွင် နေထိုင်သူတဦးက ပြောသည်။
No comments:
Post a Comment