မြန်မာ နိုင်ငံတွင် ယခုနှစ် အတွင်း ကျင်းပမည့် ရွေးကောက် ပွဲသည် နိုင်ငံရေး အရ ပါဝင်သင့် သူအားလုံး ပါဝင်ပြီး ပွင့်လင်း မြင်သာသည့် ရွေးကောက် ပွဲဖြစ်ရမည်ဟု ကုလ သမဂ္ဂအတွင်း ရေးမှူးချုပ် မစ္စတာ ဘန်ကီမွန်းက ယမန်နေ့က ပြောကြားလိုက်သည်။အမေရိကန်ပြည်ထောင်စု နယူးယောက်မြို့ရှိ ကုလသမဂ္ဂရုံးချုပ်တွင် မတ်လ (၂၅) ရက်၌ ကျင်းပသည့် ကုလသမဂ္ဂ အတွင်းရေးမှူးချုပ်၏ မြန်မာ့အရေးမိတ်ဆွေနိုင်ငံများ အစည်းအဝေးအပြီး သတင်းထောက်များနှင့်တွေ့ဆုံရာတွင် မစ္စတာဘန်ကီမွန်းက ပြောကြားခဲ့ခြင်းဖြစ်သည်။
“အခုရွေးကောက်ပွဲဟာ မြန်မာပြည်သူအားလုံးအတွက် တည်ငြိမ်ရေး၊ ဒီမိုကရေစီနှင့် ဖွံ့ဖြိုးတိုးတက်ရေးကို ဦးတည်လုပ်ဆောင်ရမှာဖြစ်တယ်။ ဒါဟာ ဒေါ်အောင်ဆန်းစုကြည်အပါအ၀င် နိုင်ငံရေးအကျဉ်းသားအားလုံး ပြန်လွှတ်ပေးရေးနဲ့ အခြေခံလွတ်လပ်မှုတွေကို လေးစားဖို့ပါပဲ” ဟု မစ္စတာဘန်ကီမွန်းက ပြောကြားလိုက်ပြီး ရွေးကောက်ပွဲတွင် လွတ်လပ်စွာပါဝင်နိုင်ခွင့် အခြေအနေများကို အစိုးရက ဖန်တီးပေးရမည်ဖြစ်ကြောင်း ပြောဆိုခဲ့သည်ဟု ကုလသမဂ္ဂ သတင်းထုတ်ပြန်ချက်တွင် ဖော်ပြထားသည်။
ဒေါ်အောင်ဆန်းစုကြည်သည် နေအိမ်အကျယ်ချုပ် (၆) နှစ် ပြည့်တော့မည့် ယမန်နှစ် မေလတွင် ၎င်း၏နေအိမ်သို့ တိတ်တဆိတ် ဝင်ရောက်ခဲ့သော အမေရိကန်နိုင်ငံသား ဂျွန်ဝီလျံ ယက်ထောကြောင့် ရုံးတင်တရားစွဲဆိုခြင်းခံခဲ့ရပြီး နေအိမ်အကျယ်ချုပ် နောက်ထပ် (၁၈) လ ချမှတ်ခံနေရခြင်းဖြစ်သည်။
စစ်အစိုးရက ယခု ထုတ်ပြန်ထားသည့် ရွေးကောက်ပွဲဥပဒေသစ်နှင့် နိုင်ငံရေးအခင်းအကျင်းများတွင် သက်ဆိုင်သည့် နိုင်ငံရေးအင်အားစုများ အားလုံး မပါဝင်နိုင်သည့်အတွက် စိုးရိမ်ပူပန် ဖြစ်မိသည်ဟုလည်း ကုလသမဂ္ဂအတွင်းရေးမှူးချုပ်က သတင်းထောက်များကို ပြောဆိုခဲ့သည်။
ပြီးခဲ့သည့်မတ်လ (၈) ရက်တွင် ထုတ်ပြန်ခဲ့သည့် စစ်အစိုးရ၏ ရွေးကောက်ပွဲဥပဒေများမှ နိုင်ငံရေးပါတီများ မှတ်ပုံတင်ခြင်း ဥပဒေတွင် ပါတီထောင်လိုသူများသည် ထောင်ဒဏ်ကျခံနေရသူ မဖြစ်စေရ၊ ထောင်ဒဏ်ကျခံနေရသူ များသည်လည်း ပါတီဝင်ဖြစ်ခွင့်မရှိဟု ဖော်ပြထားသည်။
မြန်မာနိုင်ငံတွင် နိုင်ငံရေးအခြေအနေများ သိသိသာသာ တိုးတက်ဖြစ်ထွန်းမှုများ မရှိသည့်အတွက် ၎င်းအနေဖြင့် စိတ်ပျက်လက်ပျက်ဖြစ်ရသည်ဟုလည်း ယမန်နေ့သတင်းစာရှင်းလင်းပွဲတွင် မစ္စတာဘန်ကီမွန်းက ထုတ်ဖော်ပြောကြားခဲ့သည်။
ပြီးခဲ့သည့် ဇူလိုင်လအတွင်း မြန်မာနိုင်ငံသို့သွားရောက်ခဲ့စဉ်တွင် ဗိုလ်ချုပ်မှူးကြီးသန်းရွှေအား နိုင်ငံရေးအကျဉ်းသားများ လွှတ်ပေးရေးအပါအ၀င် နိုင်ငံရေးအရ ထင်သာမြင်သာရှိသည့် လုပ်ဆောင်ချက်များ ပြုလုပ်ရန် တိုက်တွန်းခဲ့ကြောင်း၊ သို့သော် လက်တွေ့တွင် ကတိပေးပြောဆိုချက်များကို အကောင်အထည်ဖော်ရာတွင် အလွန်နှေးကွေးလွန်းနေကြောင်း ၎င်းက ဆက်လက်ပြောကြားလိုက်သည်။
ဒေါ်အောင်ဆန်းစုကြည်အပါအ၀င် နိုင်ငံရေးအကျဉ်းသားများ ပါဝင်နိုင်မှုမရှိသည့် ရွေးကောက်ပွဲသည် အများယုံကြည် လက်ခံနိုင်မှု ရရှိလိမ့်မည်မဟုတ်ဟုလည်း မစ္စတာ ဘန်ကီမွန်းက ပြောဆိုလိုက်သည်။
ယမန်နေ့ကပြုလုပ်သည့် မြန်မာ့အရေးမိတ်ဆွေနိုင်ငံများနှင့် အစည်းအဝေးတွင် မြန်မာပြည်သူလူထု၏ လူနေမှုဘ၀ မြင့်မားတိုးတက်စေရေးအတွက် အလေးထားလုပ်ဆောင်ရန် လိုအပ်ကြောင်း ဆွေးနွေးတင်ပြကြကြောင်း၊ အဆိုပါကိစ္စသည်
“မြန်မာနိုင်ငံရဲ့ နိုင်ငံရေးမှာ လူသားချင်းစာနာထောက်ထားမှု၊ ဖွံ့ဖြိုးမှု စတဲ့ စိမ်ခေါ်မှုတွေကို တန်းတူအနေနဲ့ အထူးအလေးထား ရင်ဆိုင်ဖြေရှင်းသင့်တယ်ဆိုတဲ့ အမြင်ဖြစ်ပါတယ်” ဟု ကုလသမဂ္ဂအတွင်းရေးမှူးချုပ် ဘန်ကီမွန်းက ပြောကြားကြောင်း သတင်းထုတ်ပြန်ချက်တွင် ဖော်ပြထားသည်။
No comments:
Post a Comment