အခုတစ်ပတ်ထဲမှာပဲ မြန်မာ့ဆက်သွယ်ရေးဝန်ကြီး ဦးမြတ်ဟိန်းနဲ့ ဂျပန်နိုင်ငံ ပြည်ထဲရေးနဲ့ ဆက်သွယ်ရေးဝန်ကြီး ယိုရှိတာကာ ရှင်ဒို တို့ဂျပန်နိုင်ငံမှာ တွေ့ဆုံဖို့ရှိနေပြီး စာပို့စနစ်တိုးတက်ရေးအကူအညီပေးဖို့ ဆွေးနွေးအတည်ပြုသွားဖို့ ရှိနေတယ်ဆိုတာ သိရတဲ့အကြောင်း ဂျပန်နိုင်ငံ ကျိုဒိုသတင်းဌာနက ဖေါ်ပြခဲ့ပါတယ်။
မြန်မာနိုင်ငံရဲ့ စာပေးပို့ဖြန့်ဝေတဲ့စနစ်ကို အထောက်အကူပြုဖို့အပြင် စာပို့စနစ်ကို ပိုပြီးမြန်ဆန်လာစေဖို့အတွက် ဖြန့်ဝေရမယ့်စာအိတ်တွေကို စာပို့သင်္ကေတတွေသုံးပြီး အလိုအလျောက် စီပေးတဲ့စနစ်နဲ့ စာအိတ်စီတဲ့ စက်တွေကို စပြီးအသုံးပြုနိုင်ဖို့အတွက် ဂျပန်နိုင်ငံက ကူညီသွားမှာဖြစ်တယ်လို့ ဆိုပါတယ်။
တချိန်ထဲမှာပဲ ဂျပန်ဝန်ကြီးချုပ် ရှင်ဇိုအာဘေး ကလည်း မြန်မာနိုင်ငံကို လာရောက်လည်ပတ်မှာဖြစ်တယ်လို့ ပြီးခဲ့တဲ့ သောကြာနေ့က ကြေညာခဲ့ပါတယ်။ ဂျပန်ဝန်ကြီးချုပ်ဟာ လာမယ့်သောကြာနေ့မှာ မြန်မာနိုင်ငံကိုဆိုက်ရောက်မှာဖြစ်တယ်လို့ သိရပါတယ်။
၁၉၇၇ ခုနှစ် သြဂုတ်လမှာ အဲဒီအချိန်က ဂျပန်ဝန်ကြီးချုပ် တာကဲယို ဖူကူဒါ မြန်မာနိုင်ငံကိုလာရောက်ခဲ့ပြီးကတည်းက ဂျပန်ဝန်ကြီးချုပ်အဆင့် မြန်မာနိုင်ငံကို လာရောက်လည်ပတ်ခြင်း မရှိခဲ့တဲ့အတွက် ရှင်ဇိုအာဘေးဟာ ၃၆ နှစ်တာကာလအတွင်းမှာ မြန်မာနိုင်ငံကို ပထမဦးဆုံးလာရောက်လည်ပတ်မဲ့ ဂျပန်ဝန်ကြီးချုပ်ဖြစ်ပါတယ်။
ရှင်ဇိုအာဘေးအနေနဲ့ ဂျပန်နိုင်ငံက မြန်မာနိုင်ငံကို ပေးနေတဲ့ အထောက်အကူတွေနဲ့ မြန်မာနိုင်ငံရဲ့ ဒီမိုကရေစီရေးပြုပြင်ပြောင်းလဲမှုဖြစ်စဉ်နဲ့ စီးပွားရေးဖွံ့ဖြိုးတိုးတက်စေဖို့ ကူညီနေတာတွေကို မြှင့်တင်ရေးအတွက် လာရောက်တာဖြစ်တယ်လို့လည်း ဆိုပါတယ်။
ဝန်ကြီးချုပ်ရှင်ဇိုအာဘေးနဲ့အတူ ဂျပန်နိုင်ငံက ထိပ်တန်းစီးပွားရေးကိုယ်စားလှယ်အဖွဲ့တစ်ဖွဲ့လည်း လိုက်ပါလာမှာဖြစ်တယ်လို့ ဂျပန်အစိုးရရဲ့ထုတ်ပြန်ချက်မှာ ပါရှိတယ်လို့လည်း သိရပါတယ်။
ရှင်ဇိုအာဘေးဟာ သူ့ရဲ့ခရီးစဉ်အတွင်းမှာ မြန်မာသမ္မတ ဦးသိန်းစိန်နဲ့ တွေ့ဆုံဆွေးနွေးမှာဖြစ်သလို အတိုက်အခံ အမျိုးသားဒီမိုရေစီပါတီခေါင်းဆောင် ဒေါ်အောင်ဆန်းစုကြည်နဲ့တွေ့ဆုံသွားဖို့ ရှိနေတယ်လို့လည်း သိရပါတယ်။
ရှင်ဇိုအာဘေးဟာ ပြီးခဲ့တဲ့လကပဲ ဒေါ်အောင်ဆန်းစုကြည်ကို ဂျပန်နိုင်ငံမှာ တွေ့ဆုံခဲ့အပြီး အခုတစ်ခါမှာတော့ မြန်မာနိုင်ငံမှာ တွေ့ဆုံဖို့ရှိနေတာ ဖြစ်ပါတယ်။
No comments:
Post a Comment