မြန်မာနိုင်ငံမှာ ဇွန်လကြရင် ကျင်းပမယ့် ကမ္ဘာ့စီးပွားရေးညီလာခံကိုတော့ တက်ရောက်နိူင်မှာ မဟုတ်ကြောင်း ဒါပေမယ့် မြန်မာနိုင်ငံကို လည်ပတ်ဖို့ အခွင့်အရေး နောက်တခေါက် မဆုံးရှုံးလိုတဲ့အတွက် သြစတြေးလျ ပါလီမာန်က လုပ်ငန်းတွေ ပြီးတာနဲ့ ဇွန်လအတွင်းမှာပဲ မြန်မာနိုင်ငံကို လည်ပတ်မယ်လို့ ပြောပြခဲ့ပါတယ်။
မြန်မာနိုင်ငံမှာ ဖြစ်နေတဲ့ အပြောင်းအလဲတွေကို အားပေးအားမြောက်ပြုလိုပြီး မြန်မာနိုင်ငံအပေါ် ကူညီထောက်ပံ့မှုတွေ တိုးမြင့်ဖို့ ရှိတယ်လို့လည်း ပြောပါတယ်။
နိုင်ငံခြားရေး ဝန်ကြီးက သြစတြေးလျအစိုးရအနေနဲ့ မြန်မာနိုင်ငံမှာ ဖြစ်နေတဲ့ တိုးတက်မှုတွေအပေါ် စိတ်ဝင်တစားရှိနေတဲ့အကြောင်း၊ မြန်မာနိုင်ငံရဲ့ ပြည်သူ့စွမ်းရည်ကို မြှင့်တင်ပေးလိုတဲ့အကြောင်းနဲ့ လာမယ့် သုံးနှစ်အတွင်း မြန်မာနိုင်ငံအပေါ် ကူညီထောက်ပံ့ငွေ ၂ ဆ တိုးမြင့်ပေးဖို့ ရှိတယ်လို့လည်း ပြောပါတယ်။
သြစတြေးလျနိုင်ငံအနေနဲ့ နိုင်ငံခြားထောက်ပံ့ကူညီမှုကို ဒေါ်လာ ၅.၇ ဘီလီယံအထိ ပေးဖို့ စံချိန်သစ်တင်လိုက်ပြီး မြန်မာနိုင်ငံအပေါ် ပေးတဲ့ ကူညီထောက်ပံ့မှုက တစ်နှစ်ကို ဒေါ်လာ ၆၄.၂ သန်း ကနေ ၂၀၁၃-၂၀၁၄ ခုနှစ်မှာတော့ ဒေါ်လာ ၈၂ သန်းအထိ တိုးမြင့် ထောက်ပံ့ဖို့ ရှိတယ်လို့ ပြောပါတယ်။
သြစတြေးလျနိုင်ငံအနေနဲ့ မြန်မာနိုင်ငံအပေါ် ထောက်ပံ့ကူညီမှု အများဆုံးပေးတဲ့ နိုင်ငံဖြစ်လာမှာ ဖြစ်ပါတယ်။ ဗြိတိန်နိုင်ငံက တနှစ်ကို ဒေါ်လာ ၇၅ သန်းကျော် ထောက်ပံ့နေတာဖြစ်ပြီး အမေရိကန်နိုင်ငံကလည်း တစ်နှစ်ကို ဒေါ်လာ ၇၅.၄ သန်း ထောက်ပံ့ဖို့ ရည်ရွယ်နေကြောင်း သိရပါတယ်။
သြစတြေးလျနိုင်ငံက ထောက်ပံ့မယ့် ဒေါ်လာငွေ ၈၂ သန်းကို မြန်မာနိုင်ငံရဲ့ ပညာရေး၊ ပြည်သူ့စွမ်းရည် တိုးတက်ရေးနဲ့ အမျိုးသမီး ကျန်းမာရေး ကဏ္ဍတွေမှာ အများဆုံးအသုံးပြုသွားမှာဖြစ်ပြီး မြန်မာနိုင်ငံက ပညာတော်သင်တွေကိုလည်း တိုးမြင့် ခေါ်ယူမယ်လို့ သိရပါတယ်။
သြစတြေးလျနိုင်ငံခြားရေးဝန်ကြီး ဘော့ဘ်ကားရ်ဟာ ပြီးခဲ့တဲ့နှစ် ဇွန်လကပဲ မြန်မာနိုင်ငံကို လာရောက်လည်ပတ်ခဲ့ပြီး သမ္မတဦးသိန်းစိန် အပါအဝင် မြန်မာထိပ်တန်းအစိုးရအရာရှိတွေနဲ့ ဒေါ်အောင်ဆန်းစုကြည်သာမက ၈၈ မျိုးဆက်ကျောင်းသားအဖွဲ့၊ တိုင်းရင်းသား ခေါင်းဆောင်အပြင် တခြား လူမှုအသင်းအဖွဲ့ကိုယ်စားလှယ်တွေနဲ့လည်း တွေ့ဆုံခဲ့ပါတယ်။
No comments:
Post a Comment