မေလ ၁၂ ရက်နေ့ နံနက် ၁၀ နာရီခန့်တွင် သမ္မတလာရောက်သည့် လမ်းကြောင်းရှိ တံခွန်တိုင် လေးမျက်နှာဘုရား လေးထပ်ဗိုလ် ဘုရားရှေ့တွင် သမ္မတကြီး ကျန်းမာပါစေ၊ သက်တော်ရာကျော် ရှည်ပါစေ၊ နိုင်ငံ့အကျိုး သယ်ပိုး ဆောင်ရွက်နိုင်ပါစေ၊ လှိုက်လှဲစွာ ကြိုဆိုပါ၏ စသည့် စာတန်းများပါသော ဂျပ်စက္ကူ များသာမက မြရည်နန္ဒာ အိမ်များ ဖျက်ဆီး ခံခဲ့ရသည့် ပုံများပါသော ဗီနိုင်းများကို ကိုင်ဆောင်ကာ လူ ၃၀ ကျော်တို့က ကြိုဆိုခဲ့စဉ် ရဲများက ဝင်ရောက် ဟန့်တားခဲ့ခြင်း ဖြစ်သည်။
မြရည်နန္ဒာရပ်ကွက်ရှိ အိမ်ခြေ ၅၀၀ ကျော်ကို လွန်ခဲ့သည့် ၂၀၁၂ ခုနှစ် စက်တင်ဘာလ ၁၇ ရက်နေ့က ကျူးကျော် နေထိုင်သည့် အိမ်ယာများဟု ဆိုကာ အစိုးရ အာဏာပိုင်များက ဝင်ရောက် ဖျက်ဆီးခဲ့ပြီး နေအိမ် ဖျက်ဆီးခံရသူများထဲမှ ၁၂ ဦးကို ဝတ္တရား နှောင့်ယှက်မှု အပါအဝင် ပုဒ်မ ၃ ခုတပ်၍ တရားစွဲဆိုထားကြောင်း သိရသည်။
လူများက သမ္မတအား ကြိုဆိုနေသည်ကို ပြည်ကြီးတံခွန် ရဲများက ကားများ၊ ဆိုင်ကယ်များနှင့် ၀င်ရောက်ကာ ကြိုဆိုနေသည့် လူအုပ်ကြားထဲ ၀င်ရောက်ပြီး သမ္မတကို မကြိုဆိုရန် ပြောဆိုကြောင်း၊ ကိုင်ဆောင်ထားသည့် စာရွက်စာတန်းများကို ဆွဲယူ သိမ်းဆည်း ခဲ့ကြောင်း၊ ကြိုဆိုနေသူ များကို သမ္မတ ကြိုဆိုသည့်နေရာတွင် ဆက်လက်မနေရန် ပြောဆိုခဲ့ကြောင်း၊ ယင်းနောက် ကြိုဆိုသည့် အဖွဲ့များ ပြန်ရာလမ်း တလျှောက်တွင် ကားများ၊ ဆိုင်ကယ်များနှင့် လိုက်ပါခဲ့ကြောင်း၊ ကြိုဆိုသည့် အဖွဲ့များ ခေတ္တနားနေသည့် ပြည်ကြီး တံခွန်မြို့နယ် ရတနာပုံ တက္ကသိုလ်အနီး ဗေဒါသင်တန်းကျောင်းထဲမှ အပြင်မထွက်ရန် ရဲများက ပိတ်ဆို့ထားခဲ့ကြောင်း ကြိုဆိုသည့် အဖွဲ့များက ပြောဆိုသည်။
“ကျနော်တို့က သမ္မတကို ကြိုဆိုခွင့် မရဘူးဆိုတော့ ပြန်လာတယ်။ လမ်းမှာ ဖုန်းပြောတာတောင်မှ ဖုန်းမပြောရဘူး၊ လမ်းတွေ ပိတ်နေမှာစိုးလို့ မြန်မြန်သွား ဆိုပြီး နွားမောင်းသလို အမောင်းခံရတယ်။ သူတို့က ကျနော်တို့ နောက်ကနေ ထပ်ကြပ်မကွာ လိုက်လာကြတာ။ နောက်ပြီး ကျနော်တို့က ဗေဒါသင်တန်းကျောင်းမှာ ခဏနားနေတဲ့အချိန် သမ္မတလာတဲ့ ခရီးလမ်းကြောင်း မပြီးသေးသမျှ ဒီအထဲကနေ မထွက်ရဘူးဆိုပြီး တယောက်မှ ထွက်ခွင့်မပေးဘဲ ပိတ်ထားခဲ့တယ်။ ကျနော်တို့ အဲဒီအထဲမှာ ထမင်းမစားရဘဲ ၄ နာရီနီးပါး အပိတ်ခံခဲ့ရတာပါ” ဟု ဆိုင်ကယ်ဝပ်ရှော့ လုပ်ငန်း လုပ်ကိုင်နေသူ ကိုကျော်သီဟက ရှင်းပြသည်။
ဗေဒါသင်တန်းကျောင်းတွင် စတင်နားနေသည့် အချိန်မှာ ၁၁ နာရီခွဲဖြစ်ပြီး သမ္မတ လမ်းကြောင်းပြီးဆုံးသည့် နေ့လယ် ၃ နာရီကျော်မှ အပြင်သို့ ထွက်ခွင့်ရခဲ့ကြောင်း၊ သမ္မတခရီးစဉ်အတွင်း လူထုကို ရဲအင်အားများစွာဖြင့် ပိတ်ထားခဲ့ကြောင်း သိရသည်။
ယင်းဖြစ်စဉ်နှင့် ပတ်သက်ပြီး ပြည်ကြီးတံခွန် ရဲစခန်းသို့ ဖုန်းဆက်မေးမြန်းရာတွင် စခန်းမှူးက ဖြစ်စဉ် ကြီးကြီးမားမား မရှိခဲ့ကြောင်း၊ လုံခြုံရေး အရသာ ဆောင်ရွက်ခဲ့ခြင်း ဖြစ်ကြောင်း ဧရာဝတီသို့ ပြန်လည်ဖြေကြားခဲ့သည်။
“ကျနော်တို့က သမ္မတ မန္တလေးလာတယ် ဆိုတာ ပြည်သူလူထုနဲ့ တွေ့မယ်လို့ ကြားမိတယ်။ အဲဒါကြောင့် သမ္မတသွားတဲ့ လမ်းတလျှောက်ကို လိုက်ပြီး သူပြည်သူတွေနဲ့ တွေ့တဲ့အချိန် ဘာတွေ လိုအပ်သေးလဲ မေးရင် တင်ပြချင်တာတွေ ရှိတယ်။ တကယ်လို့ သမ္မတက စာရေးတင်ဆိုရင်လည်း ဖြစ်စဉ်တွေကို ကွန်ပျူတာ စာစီထားတဲ့ စာ သမ္မတလက်ထဲ ထည့်ဖို့ တခါတည်း ပါလာ ပြီးသားပါ” ဟု မြရည်နန္ဒာရပ်ကွက် ကွင်းအမှတ် ၅၃၇ တွင် အိမ်များ ဖျက်ဆီးခံခဲ့ရစဉ် ပါဝင်ခဲ့သည့် ကိုမျိုးညွန့်က ပြောသည်။
ကိုမျိုးညွန့်နှင့် အတူ မြရည်နန္ဒာရပ်ကွက်တွင် အိမ်များ ဖျက်ဆီးခံရသူ ၃၀ ကျော်တို့သည် သမ္မတ၏ မန္တလေးခရီးစဉ်ကို ကြိုဆိုခွင့် မရခဲ့ကြပေ။
မန္တလေးသို့ ရောက်ရှိခဲ့သည့် သမ္မတကို ကြိုဆိုသော စာတန်းများ ရေးသားထားသည့် ဗီနိုင်းများ၊ ဂျပ်စက္ကူများအား ရဲများက ၀င်ရောက် ဖျက်ဆီး လုယူခဲ့ကြောင်း ကိုယ်တိုင်ကြုံတွေ့ခဲ့ရသူ မသင်းက “ကျမတို့က သမ္မတကို ကြိုဆိုဖို့ စောင့်နေတာပါ။ ဒါကို ရဲတွေက ဒေါသတကြီးနဲ့ ကျမတို့ဆီကို ၀င်လာပြီး လက်ထဲမှာ ကိုင်ထားတဲ့ စာရွက်တွေကို ဆွဲလုတယ်။ ဗီနိုင်းတွေ ဆွဲသိမ်းတယ်။ နောက်ပြီး ကျမတို့ကိုလည်း သမ္မတကို ကြိုဆိုတဲ့ နေရာမှာ မနေဖို့ နှင်ထုတ်တယ်။ ကျမက ပြည်သူထဲက ပြည်သူမို့လို့ သမ္မတကို ကြိုလို့မရဘူးလားလို့ ရဲတွေကို မေးတဲ့အခါ ကြိုလို့ မရဘူး၊ အခုပဲ ဒီနေရာကနေ ချက်ခြင်း ထွက်ဆိုပြီး ကျမတို့ကို နှင်ထုတ်ခဲ့တာပါ” ဟု ဆိုသည်။
ဦးသိန်းစိန်သည် ၎င်းသမ္မတဖြစ်ပြီး သက်တမ်း ၃ နှစ်မြောက်တွင် မန္တလေးသို့ ပထမဆုံး လာရောက်ခြင်းဖြစ်ပြီး မန္တလေးတိုင်း ဒေသရှိ လူနေမှုဘ၀ မြှင့်တင်နိုင်ရန်အတွက် အသေးစားချေးငွေ ဘဏ်များ တည်ထောင်ရန် လာရောက် ဆောင်ရွက်ခဲ့ခြင်း ဖြစ်ကြောင်း သိရသည်။
“သမ္မတ ဆိုတာကလည်း ပြည်သူတင်တာပဲလေ။ ကိုယ်တင်တဲ့ သမ္မတကို ကိုယ်တိုင် ကြိုဆိုခွင့် မရဘူးလား။ ပြည်သူတွေ တင်ထားတဲ့ သမ္မတကို ပြည်သူတွေက ကြိုဆိုတာ ပြည်သူ့ဝန်ထမ်းတွေက အင်အားသုံးပြီး တားဆီးပိတ်ပင်တယ်။ အဲဒါမျိုး ဖြစ်သင့်လားဗျာ။ ကျနော် တကယ် စိတ်မကောင်းပါဘူး” ဟု ကိုမျိုးညွန့်က ပြောသည်။
သမ္မတ ဦးသိန်းစိန်သည် မေလ ၁၂ ရက်နေ့က နံနက် ၈ နာရီခန့်တွင် မန္တလေးမြို့သို့ ရောက်ရှိလာပြီး မန္တလေး အမျိုးသား ကဇာတ်ရုံတွင် ကျင်းပသည့် “ကျေးလက်ဒေသ ဖွံ့ဖြိုးရေးနှင့် လူမှုစီးပွားဘဝ မြှင့်တင်ရေး” အခမ်းအနားသို့ တက်ရောက် မိန့်ခွန်း ပြောကြားခဲ့သည်။ သမ္မတနှင့်အတူ ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင်နှင့် အစိုးရ အဖွဲ့ဝင် ဝန်ကြီးများ လိုက်ပါခဲ့ပြီး အဆိုပါ အခမ်းအနားတွင် ကျေးလက်ဒေသ ဖွံ့ဖြိုးရေးနှင့် လူမှုစီးပွားဘဝ မြှင့်တင်ရေးအတွက် အသေးစားချေးငွေအဖြစ် အသုံးပြုရန် ကျပ် ၅. ၅ ဘီလီယံကို ပေးအပ်ကာ လယ်ယာသုံး စက်ကိရိယာများကို အရစ်ကျ စနစ်ဖြင့် ရောင်းချပေးစေခဲ့သည်။ ယင်းနောက် သမ္မတနှင့် အဖွဲ့သည် အမရပူရ ဆောင်းဒါးယက်ကန်း၊ ရန်ကုန် – မန္တလေး ကားလမ်းပေါ်ရှိ နို့ချက်စက်ရုံတို့သို့ ၀င်ရောက် လေ့လာခဲ့ပြီး ပြန်လည် ထွက်ခွာသွားခဲ့သည်။
No comments:
Post a Comment