ABC
မြန်မာနိုင်ငံက ဘာသာရေးနဲ့ လူမျိုးရေး ပဋိပက္ခမှာ ပါဝင်သူ မွတ်စလင်လူမျိုး ၇ ဦး ကို တရားရုံးက ထောင်ဒဏ် ၂နှစ်ကနေ ၂၈ နှစ် အထိ ကျခံဖို့ အမိန့်ချမှတ်လိုက်ပါတယ်။
ထောင်ဒဏ်အမိန့်ချမှတ်ခံရတဲ့ တရားခံ မွတ်စလင်လူမျိုး ၇ ဦးဟာ မိတ္ထီလာမှာဖြစ်ခဲ့တဲ့ပဋိပက္ခမှာ ဗုဒ္ဓဘာသာ ရဟန်းတော် တပါးအား သတ်မှုနဲ့ ဖမ်းဆီးတရားစွဲဆိုခံထားခဲ့ရတာဖြစ်ပါတယ်။
သူတို့ကို လူသတ်မှု၊ လူသတ်ဖို့အတွက် တိုက်တွန်းနှိုးဆော်မှု၊ တမင်တကာကြံရွယ်မီးရှို့မှု နဲ့ ပြည်သူပိုင် ပစ္စည်းတွေကို ထိခိုက်ဖျက်ဆီးမှုတို့နဲ့ ထောင်ဒဏ်ကျခံရတာ ဖြစ်တယ်လို့ တရားရုံးကဆိုပါတယ်။ သူတို့ရဲ့ရှေ့နေတွေကတော့ အယူခံဝင်ဖို့အတွက် လုပ်ဆောင်သွားမယ်လို့တော့ပြောပါတယ်။
တရားခံ ၇ ဦးထဲက အဓိက တဦးကတော့ ထောင်ဒဏ် တသက်တကျွန်းနဲ့ ညီမျှတဲ့ ထောင်ဒဏ် အနှစ် ၂၀ ကျခံရမှာဖြစ်သလို တခြားအမှုတွေနဲ့ နောက်ထပ် ထောင်ဒဏ်လေးနှစ် ကျခံရမှာဖြစ်ပါတယ်။
အစိုးရရဲ့ အဆိုအရ ပြီးခဲ့တဲ့မတ်လ မတ္ထီလာ ပဋိပက္ခမှာ အနည်းဆုံး လူ ၄၄ဦး သေဆုံးခဲ့တယ်လို့ သိရပါတယ်။
မိတ္ထီလာပဋိပက္ခသတင်းအပြည့်အစုံ
မြန်မာနိုင်ငံ မိတ္ထီလာမြို့မှာဖြစ်ပွားခဲ့တဲ့ ပဋိပက္ခအတွင်း ရဟန်းတော် တပါးဖြစ်တဲ့ ဆရာတော် ဦးသောဘိတကို သတ်ဖြတ်ခဲ့သူတွေအဖြစ် စွပ်စွဲ ခံထားရသူ ၇ဦးကို မတ်လ ၂၁ရက်နေ့မှာ မိတ္ထီလာခရိုင်တရားရုံးက ပြစ်ဒဏ်တွေချမှတ်လိုက် တယ်လို့ သိရပါတယ်။
ဆရာတော်ဦးသောဘိတကို သတ်တဲ့အမှုမှာ အားလုံး ၁၃ဦးပါဝင်နေတဲ့အထဲက ၇ ဦးကို ခရိုင်တရားရုံးက အမိန့် ချလိုက်တာဖြစ်ပြီး အဓိကတရားခံတွေဖြစ်တဲ့ ၄ဦးကတော့ ခုချိန်ထိ လွတ်မြောက်နေဆဲဖြစ်ပါတယ်။ မိတ္ထီလာခရိုင်တရားရုံးနဲ့ မြို့နယ်တရားရုံးက ပြစ်ဒဏ်တွေချမှတ်ခဲ့တာနဲ့ပတ်သက်ပြီး အမှုမှာလိုက်ပါ ဆောင်ရွက်ခဲ့တဲ့ ရှေ့နေများကွန်ယက်က ဦးသိန်းသန်းဦးက အခုလိုပြောပြပါတယ်။
“မိတ္ထီလာခရိုင်တရားရုံးက ဆရာတော် ဦးသောဘိတကို လုပ်ကြံသတ်ဖြတ်တဲ့အမှုနဲ့ ပတ်သက်ပြီးတော့ ခရိုင်တရားရုံးနဲ့ မြို့နယ်တရားရုံးက အပြစ်ပေးလိုက်တာ”
တရားခံတွေထဲက တစ်ဦးဖြစ်တဲ့ အဏ္ဏ၀ါ (ခေါ်) မြတ်ကိုကို အား ပြစ်မှုဆိုင်ရာဥပဒေ ပုဒ်မ ၃၀၂ ဖြစ်တဲ့ လူသတ်မှုနဲ့ နှစ် ၂၀ နဲ့ညီမျှတဲ့ တသက်တကျွန်း ထောင်ဒဏ်ချခံရတဲ့အပြင် ဘာသာ သာသနာကို အသရေပျက်အောင်လုပ်မှုနဲ့ နောက်ထပ် ထောင်ဒဏ် ၄နှစ် အားလုံးပေါင်း ၂၄နှစ်ကျခံဖို့ တရားရုံးက အမိန့်ချမှတ်လိုက်တယ်လို့ ဆိုပါတယ်။
ကျန်တဲ့ တရားခံတွေကတော့ လူသတ်မှုကို အားပေးကူညီမှု၊ ဆူပူလှုံ့ဆော်မှု၊ ပြည်သူပိုင်ပစ္စည်းဖျက်ဆီးမှု၊ ပညာရေးရုံးမီးရှို့မှုတွေနဲ့ တရားစွဲခံထားရတာဖြစ်ပြီး သူတို့ကို ထောင်ဒဏ် ၂နှစ်ကနေ ၂၈နှစ်ထိချခဲ့တယ်လို့သိရပါတယ်။ တရားခံတဦးဖြစ်ပြီး အသက်မပြည့်သေးတဲ့ ညီညီနိုင်ကိုတော့ မိတ္ထီလာမြို့နယ် ကလေးသူ ငယ်တရားရုံးက လူသတ်မှုကို အားပေးကူညီမှုနဲ့ ထောင်ဒဏ် ၇နှစ်ကျခံဖို့ အမိန့်ချမှတ်ခဲ့ပါတယ်။
မိတ္ထီလာမြို့မှာဖြစ်ပွားခဲ့တဲ့ ပဋိပက္ခတွေကြောင့် မိတ္ထီလာမြို့နယ်အတွင်းက မြို့နယ် ၄မြို့မှာထုတ်ပြန်ခဲ့တဲ့ သမ္မတရဲ့ ဥပဒေကဲ့သို့အာဏာတည်တဲ့အမိန့်ဟာ ရက်ပေါင်း ၆၀ပြည့်သွားပြီးဖြစ်တဲ့အတွက် ပြည်ထောင်စုလွှတ်တော်ခေါ်ယူခဲ့ပြီး အမိန့်ကို နောက်ထပ် ရက်ပေါင်း ၆၀ ထပ်မံတိုးဖို့ လွှတ်တော်က မေလ ၂၁ရက်နေ့မှာ အ တည်ပြုလိုက်တယ်လို့ သိရပါတယ်။
ဒီကိစ္စနဲ့ ပတ်သက်ပြီးဒေါ်အောင်ဆန်းစုကြည်အပါအ၀င် လွှတ်တော်ကိုယ်စားလှယ် ၁၃ဦးက ဆွေးနွေးခဲ့ကြပြီး လွှတ်တော်က မဲခွဲပြီး အတည်ပြုဆုံးဖြတ်ခဲ့ကြတာဖြစ်တယ်လို့ လွှတ်တော်မှာ ထောက်ခံဆွေးနွေးခဲ့တဲ့ အမျိုးသား လွှတ်တော် ကိုယ်စားလှယ် ဒေါက်တာအေးမောင်က အခုလိုပြောပါတယ်။
“တည်ငြိမ်အေးချမ်းနေပြီဆိုပေမဲ့လည်း လွတ်တော် ခေါ်တဲ့ အကြောင်းရင်းကတော့ ရက်ပေါင်း ၆၀ကြာတဲ့အခါမှာ နိုင်ငံတော်သမ္မတထုတ်ပြန်တဲ့ ဥပဒေကဲ့သို့ သော အာဏာတည်တဲ့အမိန့်ကို ကျနော်တို့ ပြည်ထောင်စုလွှတ်တော်က အတည်ပြုပေးဖို့ လိုပါတယ်၊ ကျနော်တို့က ကာလသတ်မှတ်ပေးရပါတယ်၊ လက်ရှိကာလကို သတ်မှတ်မလား၊ နောက်ရက်ပေါင်း ၆၀ တိုးမလားဆိုတဲ့အခါမှာ နောက် ရက်ပေါင်း ၆၀ တိုးပေးခြင်းအားဖြင့် ပိုပြီးတော့ ဆီလျော်သင့်တော်မယ်ဆိုပြီး ဆုံးဖြတ်ခဲ့လို့ပါ။”
သမ္မတထုတ်ပြန်ခဲ့တဲ့ ဥပဒေကဲ့သို့ အာဏာတည်တဲ့အမိန့်ဟာ မိတ္ထီလာခရိုင်းအတွင်းက မြို့နယ် ၄မြို့နယ်မှာပဲ ထုတ်ပြန်ခဲ့တာဖြစ်ပြီး ကျန်တဲ့ဒေသတွေမပါဝင်ဘူးလို့လည်း ဒေါက်တာအေးမောင်က ပြောတဲ့အကြောင်း ရေဒီယိုသြစတြေးလျသတင်းထောက် မြတ်မိုးက သတင်းပေးပို့ခဲ့ပါတယ်။
No comments:
Post a Comment