ပြန်ကြားရေးဝန်ကြီးဋ္ဌာန တာဝန်ရှိသူအချို့နှင့် မြန်မာနိုင်ငံ စာနယ်ဇင်းကောင်စီတို့ တပတ်လျှင် တကြိမ်ခန့် ရန်ကုန်မြို့တွင် ပုံမှန် တွေ့ဆုံကာ ဥပဒေကြမ်းကို လွှတ်တော်တွင် မဆွေးနွေးမီ နှစ်ဖက်သဘောတူညီချက် ရရှိရန် ဆောင်ရွက်နေကြောင်း စာနယ်ဇင်းကောင်စီ ပြန်ကြားရေးတာဝန်ခံ ဦးသီဟစောက ဧရာဝတီသို့ ပြောသည်။
”ပြန်ကြားရေးနဲ့ တိုက်ရိုက် ညှိနှိုင်းမှုတွေ လုပ်နေတယ်။ သူတို့ကလည်း ကျနော်တို့ကို မကြိုက်တဲ့ အချက်အလက်တွေကို ပြင်ပါ။ ကျနော်တို့ ဥပဒေကြမ်းကိုလည်း သူတို့ ကြည့်မယ်ပေါ့။ နှစ်ဖက် conflict ဖြစ်မယ့်ဟာတွေကို ရှောင်မှာပေါ့။ အခု အခြေအနေကတော့ နှစ်ခုစလုံး (လွှတ်တော်ကို) တက်သွားမယ့် သဘောမှာ ရှိတယ်။ ကျနော်တို့ဘက်ကတော့ မီဒီယာလွတ်လပ်ခွင့်နဲ့ ပတ်သက်ပြီးတော့ လုပ်မယ်။ သူတို့ဘက်ကတော့ ပုံနှိပ်နဲ့ ပတ်သက်တာကို အဓိကထားလုပ်မယ်။ သူတို့ဥပဒေမှာလည်း ကျနော်တို့ မလိုချင်တဲ့ ထိန်းချုပ်မှုတွေ ရှိတာပေါ့။ အဲဒါတွေကို ပြင်ဖို့ ဖျက်ဖို့ လုပ်မယ်။ ဒီကိစ္စကလည်း ဆွေးနွေးတဲ့ အဆင့်ရောက်နေပြီ”ဟု ဦးသီဟစောက ပြောသည်။
လွှတ်တော်တွင် တင်သွင်းပြီးသား ဖြစ်သော ပုံနှိပ်ခြင်းနှင့် ထုတ်ဝေခြင်း လုပ်ငန်းဥပဒေကြမ်းကို ပြန်လည်ရုတ်သိမ်းရန် မဖြစ်နိုင်သောကြောင့် စာနယ်ဇင်းကောင်စီမှ တင်ပြလာသော အကြံပြုချက်များကို လွှတ်တော် ဥပဒေကြမ်းကော်မတီသို့ နောက်ဆက်တွဲပေးပို့သွားမည် ဖြစ်ကြောင်း ပြန်ကြားရေးနှင့် ပြည်သူ့ဆက်ဆံရေး ဦးစီးဋ္ဌာန ညွှန်ကြားရေးမှူးချုပ် ဦးရဲတင့်က ဧရာဝတီသို့ ပြောသည်။
”အစကတော့ ကျနော်တို့ ပုံနှိပ်ဥပဒေကို သူတို့က ကန့်ကွက်တယ်။ အခု မကန့်ကွက်ဘဲနဲ့ အကြံပြုချက်တွေနဲ့ တင်လာတယ်။ သူတို့ ရေးဆွဲထားတဲ့ မီဒီယာဥပဒေကိုလည်း ကျနော်တို့နဲ့ ညှိနှိုင်းပြီးတော့ လုပ်မယ်။ ဥပဒေနှစ်ခုစလုံး အတူတူတက်မယ့် သဘောပဲ” ဟု သူက ဆိုသည်။
ပြန်ကြားရေးနှင့် စာနယ်ဇင်းကောင်စီ နှစ်ဖက်ဆွေးနွေးမှုကို လွှတ်တော်က စောင့်ကြည့်လျက်ရှိပြီး ဇွန်လတွင် ခေါ်ယူမည့် လွှတ်တော်အစည်းအဝေးတွင် ယင်းဥပဒေကြမ်း နှစ်ခုစလုံးကို ဆွေးနွေးမည် ဖြစ်ကြောင်း ပြည်သူ့လွှတ်တော် အားကစား၊ ယဉ်ကျေးမှုနှင့် ပြည်သူ့ဆက်ဆံရေးကော်မတီ အဖွဲ့ဝင် ဦးခိုင်မောင်ရည်က ပြောသည်။
ပုံနှိပ်ခြင်းနှင့် ထုတ်ဝေခြင်းလုပ်ငန်းဥပဒေကြမ်းနှင့် ပတ်သက်ပြီး သတင်းလွတ်လပ်ခွင့်ကို ထိန်းချုပ်ထားသဖြင့် မြန်မာနိုင်ငံစာနယ်ဇင်းကောင်စီ (ယာယီ)၊ မြန်မာနိုင်ငံသတင်းစာ ဆရာအသင်း၊ မြန်မာသတင်းသမဂ္ဂ၊ မြန်မာနိုင်ငံ ဂျာနယ်လစ်ကွန်ရက်၊ သတင်းလွတ်လပ်ခွင့်ကော်မတီ အပါအ၀င် အရပ်ဘက် အဖွဲ့အစည်းများ၊ နိုင်ငံရေးအဖွဲ့အစည်းများနှင့် လူမှုအဖွဲ့အစည်းများက ပြန်လည်ရုပ်သိမ်းပေးရန် မတ်လ ၁၂ ရက်နေ့က တောင်းဆိုကြသည်။
ပုံနှိပ်ခြင်းနှင့် ထုတ်ဝေခြင်းလုပ်ငန်းဥပဒေကြမ်းတွင် ပြန်ကြားရေးဝန်ကြီးဌာနသည် အုပ်ချုပ်ရေးမဏ္ဍိုင်အနေဖြင့် သတင်းစာနယ်ဇင်း မီဒီယာလုပ်ငန်းများကို ချုပ်ကိုင်နိုင်သော အခွင့်အာဏာရှိရုံမက ဥပဒေပြုရေး မဏ္ဍိုင် တခုကဲ့သို့ လိုအပ်သောဥပဒေ၊ စည်းမျဉ်းစည်းကမ်း၊ အမိန့်ကြော်ငြာစာ၊ ညွှန်ကြားချက်နှင့် လုပ်ထုံးလုပ်နည်းများ ထုတ်ပြန်နိုင်သော ဥပဒေပြုခွင့် လုပ်ပိုင်ခွင့်များ အပ်နှင်းထားခြင်း၊ တရားစီရေးမဏ္ဍိုင်တခုကဲ့သို့ စာနယ်ဇင်း သတင်းမီဒီယာများ၏ လုပ်ငန်းလုပ်ကိုင်ခွင့်ကို ပိတ်သိမ်းနိုင်ခြင်း၊ ရုပ်သိမ်းနိုင်ခြင်း၊ ဆိုင်းငံ့နိုင်ခြင်းတည်းဟူသော ဆုံးဖြတ်အပြစ်ပေးပိုင်ခွင့် အာဏာအပ်နှင်းထားခြင်းတို့ ကြောင့် စာနယ်ဇင်းသတင်းမီဒီယာများသည် စတ္ထုမဏ္ဍိုင်အဖြစ် မရပ်တည်နိုင်တော့ဘဲ ပြန်ကြားရေးဝန်ကြီးဌာန၏ ထိန်းချုပ်မှုအောက်တွင်သာ ရောက်ရှိနေမည့် သဘောဖြစ်ကြောင်း ပြည်တွင်းအခြေစိုက် သတင်းလွတ်လပ်ခွင့်ကော်မတီက ထုတ်ပြန်ထားသည်။
No comments:
Post a Comment