ဟိန်းကိုစိုး
ရန်ကုန်အပြည်ပြည်ဆိုင်ရာလေဆိပ်တွင် ပြည်ပမှ တရားမ၀င်ပစ္စည်းများကို အဖွဲ့လိုက်တင်သွင်းမှုများ ရှိနေသည်ဟု လေဆိပ်တွင် တာဝန်ထမ်းဆောင်နေသည့် အဆင့်မြင့်အရာရှိတစ်ဦးက မေလ ၂၈ ရက်တွင် မဇ်္ဈိမကို ပြောသည်။
တရားဝင်အခွန်မဆောင်ဘဲ ကုန်ပစ္စည်းများကို စီးပွားဖြစ် တရားမ၀င်တင်သွင်းသူများက အဖွဲ့လိုက် ပူး ပေါင်းကာ ဂေါက်ရိုက်ပစ်္စည်းများ၊ အလှကုန်များ၊ ကွန်ပျူတာ Hard disk နှင့် ကားပစ္စည်းများကို အများဆုံး တင်သွင်းနေခြင်းဖြစ်ပြီး အကောက်ခွန်နှင့် ပူးပေါင်းလုပ်ဆောင်နေခြင်းဖြစ်သည်ဟု ဆိုသည်။
“အဲဒီအဖွဲ့က လူဦးရေ ၂၀ ကနေ ၃၀ ထိရှိတယ်။ တစ်ခါသွားရင်တစ်ဖွဲ့အလှည့်ကျစီသွားကြတယ်။ သူတို့နိုင်ငံကူးလက်မှတ်တွေမှာ ထုထားတဲ့တုံးတွေက တစ်လကို အနည်းဆုံး အခေါက် ၂၀ လောက် ရှိတယ်။ သွားကြတာ၊ သွားပါများလို့ လေကြောင်းလိုင်းတစ်ခုမှာဆိုရင် မန်ဘာကတ်တွေတောင် ရထားလို့ ၀န်ပိုတောင် ၇၀ ကီလိုအထိ တင်ခွင့် သူတို့ရထားကြတယ်”ဟု ရန်ကုန်အပြည်ပြည်ဆိုင်ရာ လေဆိပ်မှ အဆင့်မြင့်အရာရှိတစ်ဦးက ပြောသည်။
ယင်းတရားမ၀င်ပစ်္စည်းများကို တင်သွင်းသူများသည် အဓိကအားဖြင့် စင်ကာပူနှင့် ဘန်ကောက်မှ ဆိုက် ရောက်သည့် လေကြောင်းလိုင်းများမှ အဓိကတင်သွင်း နေခြင်းဖြစ်သည်ဟု ဆိုသည်။
လေကြောင်းလိုင်းများသည် ၀ယ်ယူအားပေးသူများအတွက် ၀န်ဆောင်မှုများကိုသာ အဓိက ဆောင်ရွက် ပေးပြီး သယ်ဆောင်လာသည့် ပစ်္စည်းများအတွက်ကိုမူ သက်ဆိုင်ရာ အကောက်ခွန်နှင့် သယ်ဆောင်လာ သူတို့ကသာ တာဝန်ရှိသည်ဟု MAI လေကြောင်းလိုင်းမှ ပြောရေးဆိုခွင့်ရှိသူ ဒေါ်အေးမရသာက ရှင်းပြသည်။
တရားမ၀င်တင်သွင်းနေသည်ဆိုသည်နှင့်ပတ်သက်ပြီး လေဆိပ်အကောက်ခွန်ဌာန၏ ဦးစီးမှူး(၈)က “ကျွန်မတို့က တစ်နိုင်တစ်ပိုင်သယ်ခွင့်ရှိတော့ ဘယ်လိုမှ စစ်လို့မရဘူး။ personal အမည်ခံပြီး သယ်သွားတာလည်းရှိတယ်။ ဂေါက်ဆက်ဆိုတာတော့ ပြန်ဝင်လာရင် အရင်ကပါသွားလို့လား ဆိုပြီးတော့လည်း မေးလို့မရပါဘူး။ ဌ-မပေ တွေနဲ့လည်း စစ်တယ်။ အခွန်ကတော့ တက်နိုင်သလောက်စစ်နေတာပါပဲ။ ပေါင်းပြီးလုပ်တယ်ဆိုတာက မလိုလို့ ပြောတာနေမှာပါ” ဟု ပြောသည်။
မေလ ၂၇ရက်က လေဆိပ်တွင် လက်ကိုင်ဖုန်း၊ အလှကုန်များနှင့် ငှက်သိုက်ပုလင်းများကို ဖမ်းဆီးရမိသဖြင့် အခွန်ဦးစီးဌာနရုံးကို တင်ပြကာ ဒဏ်ငွေပေးသွင်းခိုင်းခဲ့သည်ဟု လေဆိပ် အကောက်ခွန်မှ ဦးစီးမှူး (၈)ကဆိုသည်။လေဆိပ်အကောက်ခွန်မှဖြတ်သန်းသူများသည် တစ်ဦးလျှင် အမေရိကန်ဒေါ်လာ ၅၀၀ တန် စီးပွားဖြစ် မဟုတ်သည့် ကိုယ်ပိုင်အသုံးအဆောင်များ သယ်ယူခွင့်ရှိသည်။ သို့သော် တစ်နိုင်တစ်ပိုင် တန်ဖိုးကြီးပစ္စည်းများ သယ်ဆောင်နေခြင်းကို အကောက်ခွန်က တားမြစ်နိုင်ခြင်းမရှိဟု ဆိုသည်။
No comments:
Post a Comment