အမေရိကန် လက်ထောက် နိုင်ငံခြားရေး ၀န်ကြီးနဲ့ အဖွဲ့ မြစ်ကြီးနားကို သွားခွင့်မရ

လင်းသန့်

မြန်မာနိုင်ငံကို အလည်အပတ်ရောက်နေတဲ့ အမေရိကန် အဆင့်မြင့်သံတမန်အဖွဲ့ ကချင်ပြည်နယ် မြစ်ကြီးနားမြို့ကို လေ့လာ ရေး သွားရောက်ရန် မေတ္တာ ရပ်ခံချက်ကို မြန်မာ အစိုးရဘက်က ငြင်းပယ်ခဲ့တယ်လို့ သတင်းများ ထွက်ပေါ်လာပါတယ်။

ဒါပေမယ့် အမေရိကန် ကိုယ်စားလှယ်အဖွဲ့အနေနဲ့ ကချင်ပြည်နယ်ရှိ ကျောက်စိမ်းတွင်းများ ရှိရာ ဖားကန့်မြို့ကိုတော့ သွားရောက် လည်ပတ် လေ့လာလို့ ရနိုင်တယ်လို့ မြန်မာ အစိုးရဘက်က ပြောတယ်လို့လည်း သိရပါတယ်။

အမေရိကန် အဆင့်မြင့် ကိုယ်စားလှယ်အဖွဲ့ကို ဒီမိုကရေစီ၊ လူ့အခွင့်အရေးနဲ့ အလုပ်သမားရေးရာ လက်ထောက် နိုင်ငံခြားရေး ဝန်ကြီး Mr. Tom Malinowski က ဦးဆောင်တာဖြစ်ပြီး အမေရိကန် ကာကွယ်ရေးဌာန၊ ဘဏ္ဍာရေးဝန်ကြီး ဌာန တို့မှ အဆင့်မြင့် အရာရှိ များ ပါဝင်ပါတယ်။

ရန်ကုန်မှာ ရှိတဲ့ မြန်မာနိုင်ငံဆိုင်ရာ အမေရိကန်သံရုံးကတော့ ခရီးစဉ်အတွင်း မြစ်ကြီးနားမြို့ကို သွားရောက် လေ့လာရေး အတွက် အမေရိကန်ဘက်က မေတ္တာ ရပ်ခံခဲ့တယ်ဆိုတာကို မဟုတ်ဘူးလို့ ငြင်းဆိုပါတယ်။

“ကချင်ပြည်နယ်ကို သွားဖို့ မြန်မာအစိုးရဆီက ခွင့်ပြုချက်ရရေး ကျနော်တို့က မေတ္တာ ရပ်ခံခဲ့တာ မရှိပါဘူး”လို့ ရန်ကုန်ရှိ အမေရိကန် သံရုံး ပြောခွင့်ရသူက ဧရာဝတီကို ပြောပါတယ်။

မြန်မာနိုင်ငံတွင် ခိုင်မာသည့် ငြိမ်းချမ်းရေးရရှိနိုင်ရန် အဖွဲ့အစည်းအားလုံးကို အားပေးထောက်ပံ့ရာမှာ ထိတွေ့ ဆက်ဆံမှုတွေ၊ အမျိုးသားပြန်လည်သင့်မြတ်ရေး အတွက် အကောင်းဆုံး တွေ့ဆုံဆွေးနွေးမှုတွေကို အမေရိကန် အစိုးရက လုပ်ဆောင်မယ့် နည်း လမ်း တွေ အများကြီး ရှိပြီး ခရီးစဉ်အတွင်း ကိစ္စ တခုချင်းစီကို ခြုံငုံမိစေဖို့ တွေ့ဆုံရမယ့် ကိစ္စတွေ များပြားနေတာကြောင့် ဖြစ်တယ်လို့လည်း အမေရိကန်သံရုံး ပြောခွင့်ရသူက ဆက်ပြောထားပါတယ်။

ဒါပေမယ့် ကချင်တက်ကြွလှုပ်ရှားသူများနဲ့ နေပြည်တော်က သတင်းရင်းမြစ်များကတော့ အမေရိကန် အဆင့်မြင့် ကိုယ်စားလှယ် အဖွဲ့အနေနဲ့ မြန်မာနိုင်ငံ ကချင်ပြည်နယ် မြစ်ကြီးနားမြို့ကို လည်ပတ်ကာ ဒေသခံ လူထူအခြေပြု အဖွဲ့တွေအပါအဝင် ဒေသခံတွေနဲ့ပါ တွေ့ဆုံခွင့်ရရေး တောင်းဆိုခဲ့တယ်လို့ အခိုင်အမာ ပြောကြပါတယ်။

အမေရိကန် အဆင့်မြင့် ကိုယ်စားလှယ်အဖွဲ့ရဲ့ မြန်မာနိုင်ငံတွင်း လှည့်လည်လေ့လာရေး ခရီးစဉ်ကို ဇွန်လ ၂၂ ရက်နေ့က စတင် ကာ ၂၈ ရက်နေ့ထိ ဖြစ်ပါတယ်။

အမေရိကန် ကိုယ်စားလှယ်အဖွဲ့ကို ရန်ကုန်၊ နေပြည်တော် အပါအဝင် မွန်ပြည်နယ် မော်လမြိုင်နဲ့ ကရင်ပြည်နယ် ဖားအံမြို့ တို့ကို သွားရောက် လည်ပတ်ခွင့်သာ မြန်မာအစိုးရဘက်က ပေးခဲ့လို့ ခရီးစဉ်နဲ့ပတ်သက်ပြီး အမေရိကန်ဘက်က ထုတ်ပြန် ကြေညာချက် မှာ အဲဒီ ဒေသတွေသွားမယ့် အကြောင်းသာ ထုတ်ပြန်တာ တွေ့ရပါတယ်။

မြန်မာနိုင်ငံတွင်း လှည့်လည် လေ့လာတာမှာ ကရင်ပြည်နယ်နဲ့ မွန်ပြည်နယ်တို့ကို သွားရောက်လေ့လာကာ လူထု အခြေပြု အဖွဲ့တွေ၊ နိုင်ငံရေး၊ ဘာသာရေး ခေါင်းဆောင်တွေနဲ့ တွေ့ဆုံဆွေးနွေးသွားမယ်လို့ ခရီးစဉ်ထုတ်ပြန်ကြေညာချက်မှာ ဖော်ပြထားပါတယ်။

အမေရိကန် အဆင့်မြင့် ကိုယ်စားလှယ်အဖွဲ့ကို ဦးဆောင်သူ လူ့အခွင့်အရေးစောင့်ကြည့်ရေး HRW အရာရှိဟောင်း လက်ရှိ လက်ထောက်နိုင်ငံခြားရေး ဝန်ကြီး Mr. Tom Malinowski ဟာ ၁၉၈၈ ခုနှစ် မြန်မာနိုင်ငံမှာ ရှစ်လေးလုံး ဒီမိုကရေစီ အရေးတော် ပုံ ကြီး နောက်ပိုင်း မြန်မာ့အရေးကို အနီးကပ် လှုပ်ရှားလာခဲ့သူတဦးလည်း ဖြစ်ပါတယ်။

ကချင်ပြည်နယ်မှာ ကချင် လွတ်လပ်ရေး တပ်မတော်(KIA) နဲ့ အစိုးရ စစ်တပ်တို့ဟာ ၁၇ နှစ်ကြာ အပစ်အခတ် ရပ်စဲရေးကျိုးပေါက်ပြီး လွန်ခဲ့တဲ့ ၃ နှစ်ကျော်ကတည်းက တိုက်ပွဲတွေ ပြန်လည်ဖြစ်ပွားနေခဲ့ရာ စစ်ဘေးရှောင် ဒုက္ခသည် ၁ သိန်း ၂ သောင်းကျော်လည်း နေရပ်စွန့်ခွာ ထွက်ပြေးခဲ့ကြရတာပါ။ ဒီအထဲက တချို့တွေလည်း နယ်စပ်ဖြတ်ကျော်ကာ တရုတ်နိုင်ငံဘက်ကို မကြာခဏ ထွက်ပြေးနေရတဲ့ အခြေအနေဖြစ်နေတာပါ။ အခုထိလည်း တိုက်ပွဲတွေက ဆက်လက်ဖြစ်ပေါ် နေပါတယ်။

ကချင် လက်နက်ကိုင် အဖွဲ့ကတော့ အစိုးရနဲ့ အပစ်အခတ်ရပ်စဲရေး စကားပြောဆိုမှုတွေမှာ အမေရိကန်က ပါဝင်မှုရစေဖို့ တောင်း ဆိုခဲ့တာ သိရပါတယ်။ ဒါပေမယ့် KIA နဲ့ အစိုးရကြား အပစ်အခတ်ရပ်စဲရေး ကိစ္စမှာ အမေရိကန် ပါဝင်လာမှာကို အထူးသဖြင့် တရုတ် နိုင်ငံဘက်က လိုလားဟန်တော့ မရှိပါဘူး။

တဖက်မှာလည်း မြန်မာအစိုးရ ငြိမ်းချမ်းရေး ဖော်ဆောင်ရေး အဖွဲ့က ကချင် လက်နက်ကိုင် ခေါင်းဆောင်တွေနဲ့ အပစ်အခတ် ရပ်စဲ ရေး၊ ငြိမ်းချမ်းရေးတွေ ဖော်ဆောင်နိုင်ဖို့ တခြား တိုင်းရင်းသား လက်နက်ကိုင်အဖွဲ့တွေနဲ့ တွေ့ဆုံဆွေးနွေးမှုတွေ လုပ်သလို လုပ်ဆောင်မှုတွေလည်း ရှိနေပါတယ်။

အမေရိကန် အဆင့်မြင့် ကိုယ်စားလှယ်အဖွဲ့ရဲ့ မြန်မာနိုင်ငံခရီးစဉ်အတွင်းမှာ မြန်မာနိုင်ငံရဲ့ ငြိမ်းချမ်းရေး လုပ်ငန်းစဉ်၊ အမျိုးသား ပြန်လည်သင့်မြတ်ရေး၊ တာဝန်သိ ရင်းနှီးမြှုပ်နှံမှုတွေ တိုးပွားလာစေရေး၊ မြန်မာ့တပ်မတော် အရာရှိကြီးတွေနဲ့ တွေ့ဆုံကာ လူ့အခွင့် အရေးဆိုင်ရာ ကိစ္စတွေ စတာတွေနဲ့ပတ်သက်ပြီး ဆွေးနွေးသွားဖို့ ဆိုတာ ထုတ်ပြန်ချက်မှာ ဖော်ပြထားပါတယ်။