ယင်းအတွင်းဝန်များကို ၂၀၁၅ နှစ်ဆန်းပိုင်းတွင် ခန့်အပ်သွားနိုင်ရန် စီစဉ်လျက် ရှိကြောင်း၊ ယခုအခါ ၀န်ကြီး ဌာနတိုင်းရှိ အတွေ့အကြုံ ရှိသူများနှင့် ဗဟုသုတ ကြွယ်ဝသူများကို အတွင်းဝန်အဖြစ် ခန့်အပ်နိုင်ရန် ရှာဖွေလျက်ရှိကြောင်း သိရသည်။
အသစ် ခန့်အပ်မည့် အတွင်းဝန်များသည် လက်ရှိ ၀န်ကြီး ဌာနများရှိ ရုံးအဖွဲ့မှူးများထက် ရာထူး၊ တာဝန် ပိုမိုမြင့်မားမည် ဖြစ်ပြီး နိုင်ငံ ရေးနဲ့ အစိုးရ ဗျူရိုကရေစီ ယန္တရားကြား လုပ်ငန်းများကို ထိထိရောက်ရောက် အကောင်အထည် ဖော်ပေးဆောင်ရွက်နိုင်ရန် ခန့်အပ် ရခြင်း ဖြစ်ကြောင်း သမ္မတရုံး ညွှန်ကြားရေးမှူး တဦးက ဧရာဝတီသို့ ပြောသည်။
“အတွင်းဝန်တွေခန့်ဖို့ သမ္မတကြီးကလည်း ပြောထားတယ်။ သူက နိုင်ငံရေးသမား ၀န်ကြီးရဲ့ ပေါ်လစီကို အကောင်အထည် ဖော် ပေးရမှာ။ အဲဒီလိုလုပ်နိုင်မယ့် လူမျိုးတွေကို အခုစရွေးနေပြီ။ ၀န်ကြီးတွေက ၅ နှစ်တကြိမ် ပြောင်းကြမှာ။ မပြောင်းတဲ့ ဗျူရိုကရေစီ ယန္တရားကို ကောင်းကောင်း အထောက်အကူပြုပြီး လုပ်ထုံးလုပ်နည်းတွေ နှံ့နှံ့စပ်စပ်သိတဲ့ လူတွေ ရှိဖို့လိုတယ်”ဟု ယင်း သမ္မတရုံး ညွှန်မှူးက ပြောပြသည်။
သက်ဆိုင်ရာ ၀န်ကြီးဌာန ပြည်ထောင်စု ၀န်ကြီး၏ ပေါ်လစီကို ထိရောက်စွာ အကောင်အထည် ဖော်နိုင်ရန်၊ ၀န်ကြီးကို အကြံဉာဏ် ပေးနိုင်ရန်၊ အစိုးရ ၀န်ထမ်းများ၏ ဥပဒေပါ အခွင့်အရေးများကို အကာအကွယ်ပေးရန်၊ ပြုပြင်ပြောင်းလဲမှုတွင် အုပ်ချုပ်ရေး ယန္တရား ပိုမို ထိရောက်လာစေရန် ရည်ရွယ်ကြောင်း သိရသည်။
အုပ်ချုပ်ရေးနှင့်စီမံခန့်ခွဲရေး အရည်အချင်း မြှင့်တင်မှုအတွက် ၀န်ကြီးဌာနများတွင် အတွင်းဝန်များခန့်အပ် တာဝန်ပေးမှုသည် အလွန် အရေးကြီးသော ပြုပြင်ပြောင်းလဲမှု တရပ်ဖြစ်ပြီး မြန်မာနိုင်ငံတွင် ၁၉၆၂ ခုနှစ်အထိ အတွင်းဝန်များသည် သြဇာညောင်းခဲ့ကြောင်း၊ သို့သော် ၁၉၆၂ ခုနှစ် နောက်ပိုင်း ပြည်သူ့ဝန်ထမ်း ပြုပြင်ပြောင်းလဲမှုကြောင့် ယင်းစနစ် ရပ်ဆိုင်းသွားကြောင်း ပါမောက္ခ ဒေါက်တာ အောင်ထွန်းသက် က ကျနော်နှင့် အတွင်းဝန်များ ဆောင်းပါးတွင် ရေးသားထားသည်။
“ဒီပြည်သူ့ ၀န်ထမ်းတွေအနက် အဆင့်မြင့်ဆုံးပုဂ္ဂိုလ်တွေကတော့ အတွင်းဝန်တွေ ဖြစ်ကြပါတယ်။ အတွေ့အကြုံ၊ ပညာ အရည် အချင်း ပြီးပြည့်စုံသူတွေဖြစ်ကြတာမို့ ၀န်ကြီးဌာနတခုချင်းရဲ့ လုပ်ငန်းဆောင်ရွက်မှုတွေကို ကျွမ်းကျင်စွာ ဆောင်ရွက်နိုင်ခဲ့ကြတယ်” ဟု ဒေါက်တာ အောင်ထွန်းသက်က ၂၀၁၄ ခုနှစ် ဒီဇင်ဘာလ ၈ ရက် မြန်မာ့အလင်း သတင်းစာတွင် ရေးသားထားသည်။
ပါလီမန် ဒီမိုကရေစီခေတ်က နိုင်ငံရေးသမားဝန်ကြီးများသည် အုပ်ချုပ်ရေးပိုင်းကို ကောင်းမွန်စွာနားမလည်လျှင် အတွင်းဝန်များကို အားကိုးရပြီး ၀န်ကြီးနှင့် ဌာနတခုလုံး၏ ကိစ္စအ၀၀ကို အတွင်းဝန်က တာဝန်ယူဖြေရှင်းရကြောင်း ဆိုရှယ်လစ် ခေါင်းဆောင် ဦးကျော်ငြိမ်း ၏ ကိုယ်ရေး အတွင်းဝန် လုပ်ခဲ့ဖူးသူ ဦးသုဝေ က ပြောသည်။
“သူက ၀န်ကြီးမရှိရင်လည်း ဌာနကို ဆက်တာဝန်ယူထားပြီး နောက်ဝန်ကြီး အသစ်လာတဲ့အခါ လုပ်ငန်းတွေ အကောင်အထည် ဖော်ဖို့ အဆင်သင့်ဖြစ်အောင် လုပ်ပေးရတယ်။ အခု ပုံစံအရ ဒုဝန်ကြီးတွေက အဲဒီလို လုပ်ရမှာ။ ဒါပေမယ့် မလုပ်ကြဘူး”ဟုလည်း ဦးသုဝေက ပြောပြသည်။
မြန်မာနိုင်ငံတွင် လက်ရှိ သမ္မတရုံး ၀န်ကြီးဌာန အပါအ၀င် ၀န်ကြီး ဌာနပေါင်း ၃၆ ခုရှိပြီး ပြည်ထောင်စု ၀န်ကြီး ၃၆ ဦးနှင့် ဒုဝန်ကြီး ၅၇ ဦး ရှိရာ ၀န်ကြီး စုစုပေါင်း ၉၃ ဦး ရှိနေသည်။
မြန်မာနိုင်ငံ ရှေ့နေကွန်ရက်မှ ဦးကြီးမြင့်ကလည်း“နိုင်ငံတကာမှာ အတွင်းဝန်ပဲ ရှိတယ်။ ဒုဝန်ကြီးဆိုတာ သိပ်မရှိဘူး။ အတွင်းဝန် ထပ်ခန့်ပြီး ဘာမှအလုပ်မဖြစ်ရင် နိုင်ငံမှာ ဘတ်ဂျက်တွေ ပိုသုံးရဦးမယ်။ တိုင်းပြည် ပိုဆင်းရဲမယ်။ ဒီလို ထပ်တိုးမယ့်အစား အခု ဒုဝန်ကြီးနဲ့ ညွှန်ချုပ်တွေကို အဲဒီရာထူးပေး၊ ပြီးရင် လုပ်ငန်းတွေ ပိုထိရောက်အောင် လုပ်ခိုင်းရမယ်”ဟု ပြောဆိုသည်။
No comments:
Post a Comment