မန္တလေးတိုင်းဒေသကြီး၊ အောင်မြေသာဇံမြို့နယ်တွင် ဘုန်းကြီးတပါး၏ အဓမ္မပြုကျင့်မှုကို ခံခဲ့ရသည့် အသက် ၄ နှစ်အရွယ်ရှိ ကလေး၏ အမှုကို လိုက်ပါ ကူညီပေးမည့် ရှေ့နေ လိုအပ်နေကြောင်း သိရသည်။
ဖြစ်စဉ်မှာ ၂၀၁၅ ခုနှစ်၊ ဒီဇင်ဘာလ တွင် မန္တလေးမြို့၊ အောင်မြေသာဇံမြို့နယ် စိန်တုံးကျောင်းတိုက်မှ ဘုန်းကြီး ဦးပညာဒီပ(ခ) ဦးကျော်ဝင်း သည် အသက် ၄ နှစ်အရွယ် မိန်းကလေးကို အဓမ္မပြုကျင့်ခဲ့သဖြင့် တရားရင်ဆိုင် နေရကြောင်း၊ တရားရင်ဆိုင်ချိန်တွင် နစ်နာခဲ့ရသည့် ကလေးအတွက် ဥပဒေ ရေးရာ လိုက်ပါကူညီပေးသည့် ရှေ့နေလိုအပ်နေကြောင်း ကလေးငယ်၏ မိခင် ဒေါ်ထွေးရီက ပြောသည်။
“ကျမတို့ကို အရင်ကတော့ အစိုးရက ပေးတဲ့ ရှေ့နေ တဦးရှိတယ်။ သူက ကူညီပေးတယ်။ ၇ လပိုင်းမှာသူက နေပြည်တော်ပြောင်းသွားရတယ်။ လက်ရှိမှာတော့ ကျမကို ကူညီပေးတဲ့ ရှေ့နေ မရှိဘူး။ ကျမတို့ တရားရင်ဆိုင်ဖို့ ခက်ခဲနေပါတယ် ” ဟု ဒေါ်ထွေးရီက ဆိုသည်။
လက်ရှိတွင် ကလေးငယ်၏ ကျန်းမာရေး အခြေအနေမှာ ဆရာဝန်ညွန်ကြားသည့်အတိုင်း တပတ်တကြိမ် ဆေးရုံ သွားရောက်ပြသနေရကြောင်း၊ လွန်ခဲ့သည့်လကလည်း သွေးပေါင်ကျမှု၊ ဆီးအိမ်ရောင်မှုကြောင့် ဆေးရုံတက်ခဲ့ရကြောင်း၊ ကလေးငယ်အတွက် ဆေးကုသရန် ရုန်းကန် ရှာဖွေနေရကြောင်း သိရသည်။
အထက်မြန်မာပြည် ရှေ့နေများကွန်ရက်မှ ရှေ့နေ ဦးသိန်းသန်းဦး က “ ဒီအမှုနဲ့ ပတ်သက်ပြီး သေချာ မသိရသေးဘူး။ ကြားတော့ ကြားတယ်။ သူတို့ ကျနော်တို့ကို ဖုန်းဆက် အကူအညီတောင်းရင်တော့ ကူညီပေးဖို့ အဆင်သင့်ပါ” ဟု ဧရာဝတီသို့ပြောသည်။
ကလေးကို အဓမ္မကျင့်ပြုခဲ့သူမှာ အောင်မြေသာဇံမြို့နယ်ရှိ စိန်တုံးဘုန်းကြီးကျောင်းမှ ဦးပညာဒီပ (ခ) ဦးကျော်ဝင်းသည် အသက် ၄၆ နှစ်အရွယ်ရှိပြီး ဝါတော် ၂၆ ဝါရှိပြီဖြစ်သည်။ ပြစ်မှုကျူးလွန်ခဲ့သည့် ၎င်းကို အောင်မြေသာဇံမြို့နယ် သံဃမဟာနာယက အဖွဲ့က လူဝတ်ချွတ်စေခဲ့ပြီးနောက် ဇန်နဝါရီ ၂၅ ရက်နေ့တွင် မန္တလေးခရိုင်တရားရုံးတွင် ပုဒ်မ ၃၇၆၊ ၃၇၇ တို့ဖြင့် တရားစွဲဆိုခဲ့ပြီး မန္တလေး အိုးဘိုထောင်တွင် ဖမ်းဆီးချုပ်ထားကြောင်း အမှတ် ၁ ရဲစခန်း အောင်မြေသာဇံမြို့နယ်မှ ရဲအုပ် ထွန်းထွန်းဦးက ဧရာဝတီသို့ပြောသည်။
“ ဘုန်းကြီးနဲ့ ကလေးအဖေက ငယ်သူငယ်ချင်းတွေပါ။ ကျမတို့ နေစရာ မရှိတော့ စိန်တုံးဘုန်းကြီးကျောင်းမှာ ခွင့်တောင်းပြီး ခဏနေတာပါ။ သမီးကြီး က ၈တန်း စာမေးပွဲပြီးဖို့ ၂ပတ် ပဲလိုတော့တယ်။ သမီးကြီး စားမေးပွဲပြီးရင် ရွာပြန်မယ်လို့ စီစဉ်ရင်း ကျောင်းထဲမှာ တလနဲ့ ၃ရက်ပဲ နေသေးတာ အဲ့လိုဖြစ်သွားတာပါ” ဟု မိခင်ဖြစ်သူက ပြောပြသည်။
တရားခံက အပြစ်ကျူးလွန်ခဲ့ကြောင်း ဝန်ခံထားပြီး အမှုကို ပိတ်ပေးရန် အတွက် အကြိမ်ကြိမ်လာရောက် ညှိနှိုင်းခဲ့ကြောင်း၊ အမှု ပိတ်ပေးရန် ကလေး၏ ဆေးကုစရိတ်ကို အားလုံး အကုန်ကျခံပေးပြီး လိုအပ်သည့် ငွေကြေး ထောက်ပံ့ပေးမည်ဟု လာရောက်ညှိနှိုင်းခဲ့ကြောင်း ဒေါ်ထွေးရီက ဧရာဝတီသို့ပြောသည်။
“ကျမသမီးရဲ့ အရှက်နဲ့ ဂုဏ်သိက္ခာကို ဘာနဲ့မှ မလဲနိုင်ဘူး။ တရားဥပဒေအတိုင်း လုပ်မယ်။ ကျမကို တိုက်တလုံး၊ ကားတစီး၊ ငွေသိန်းတထောင်ပေးပါစေ၊ ချမ်းသာအောင်လုပ်ပေးမယ်ဆိုရင်တောင် ကျမ မယူဘူး။ ကျမ အမှန်တရားပဲလိုချင်တယ်။ ကျမနေစရာမရှိရင် လမ်းဘေးမှာ တဲထိုးပြီး နေရပါစေလို့ပြောလိုက်ပါတယ်” ဟု ဒေါ်ထွေးရီ က ဆိုသည်။
မန္တလေးအခြေစိုက် ဂဠုန်နီဆရာတော် ဦးကာဝိယက “ တကယ်ဖြစ်ရင် မပြောရဲစရာ အကြောင်းမရှိဘူး။ ဘာမှ အန္တရာယ်မရှိဘူး။ ဒီလို ဘုန်းကြီး အမှု၊ ပြသနာက အများကြီးဖြစ်ပါတယ်။ တိတိကျကျ မှန်မှန်ကန်ကန် အဂတိ ကင်းစင်းအောင် သက်ဆိုင်ရာ သံဃာနာယက အဖွဲ့အစည်း အာဏာရှိတဲ့ သူတွေက ဆောင်ရွက်သင့်တာပေါ့။ ဥပဒေကြောင်းအရ ထင်ရှားနေရင် ထိရောက်စွာ အရေးယူဖို့ သူတို့မှာ တာဝန်ရှိတယ်လေ” မိန့်ကြားသည်။
No comments:
Post a Comment