(၁၇ဝ)
အမှတ် (၉၇) ခ၊ အနောက်ရွှေဂုံတိုင်ရှိ အဖွဲ့ချုပ်တွင် ၄၉ နှစ်မြောက် ပြည်ထောင်စုနေ့အခမ်းအနား ကျင်းပ၏။ ဒေါ်အောင်ဆန်းစုကြည် နေအိမ်အကျယ်ချုပ်မှ ပြည်လည်လွတ်မြောက်ခဲ့ပြီးသည့်နောက်…. ပထမဆုံးအကြိမ် ကျင်းပသည့် အဖွဲ့ချုပ်၏ ပြည်ထောင်စုနေ့အခမ်းအနား ဖြစ်သည်။
ဒေါ်အောင်ဆန်းစုကြည်အနေနှင့်မူ …. အမျိုးသားဒီမိုကရေစီအဖွဲ့ချုပ် ဖွဲ့စည်းပြီးခဲ့သည့်နောက်…. ကျင်းပသည့် ပြည်ထောင်စုနေ့အခမ်းအနားသို့ ဒုတိယအကြိမ်အဖြစ် တက်ရောက်ခဲ့ခြင်းဖြစ်သည်။ ပထမအကြိမ် ပြည်ထောင်စုနေ့ကို ပင်လုံတွင် ၁၉၈၉ ခုနှစ် ဖေဖော်ဝါရီလ ၁၂ ရက်နေ့က ဒေါ်အောင်ဆန်းစုကြည်တို့ ကျင်းပခဲ့ကြ၏။
ပင်လုံစာချုပ် ချုပ်ဆိုခဲ့ကြသည့် ပြည်ထောင်စုမြေ၌ ကျင်းပခဲ့ကြသည့် ပြည်ထောင်စုနေ့အခမ်းအနား….။
ပင်လုံမြေအခမ်းအနားတွင် အမျိုးသားဒီမိုကရေစီအဖွဲ့ချုပ်မှ ‘ဒီမိုကရေစီပြည်ထောင်စုသစ်’ စာတမ်းကို ကြေညာချက်အမှတ် ၉ အဖြစ်နှင့် ထုတ်ပြန်ကြေညာခဲ့၏။ ‘တိုင်းရင်းသားလူမျိုးများ အားလုံး၏ နိုင်ငံရေး၊ အုပ်ချုပ်ရေး၊ စီးပွားရေးကဏ္ဍ နယ်ပယ်အသီးသီး၌ ကိုယ်ပိုင်ပြဋ္ဌာန်းခွင့် ရရှိရေးကို ဦးတည်ရှေးရှုမည်’…. ဟူ၍ မူဝါဒသဘောထား ချမှတ်ထားရှိပြီး…. တိုင်းရင်းသားလူမျိုးများ၏ အရေးနှင့် စပ်လျဉ်း၍ ရှေ့ဆက်ဆောင်ရွက်မည့် ယေဘူယျလုပ်ငန်းစဉ် ၇ ချက် ထုတ်ပြန်ခဲ့၏။ အဖွဲ့ချုပ်၏ ဒီမိုကရေစီ ပြည်ထောင်စုသစ်ဆီသို့ သွားမည့်လမ်းညွှန်မြေပုံ ၇ ဆင့်….။
ယခု ၄၉ နှစ်မြောက် ပြည်ထောင်စုနေ့ အခမ်းအနားကိုမူ …ရန်ကုန်၌ပင် ဒေါ်အောင်ဆန်းစုကြည်တို့ ကျင်းပ၏။ ကန့်သတ်ဟန့်တားမှုများကြားမှပင်….. ပြည်နယ်၊ တိုင်း၊ မြို့နယ်အသီးသီးမှ အဖွဲ့ချုပ်အဖွဲ့ဝင်များ တတ်ရောက်ခဲ့ကြ၏။ စာတမ်းတစောင်ကို ထုတ်ပြန်၏။
‘အမျိုးသားဒီမိုကရေစီအဖွဲ့ချုပ်၏ တိုင်းရင်းသားလူမျိုးများအရေးနှင့် စပ်လျဉ်း၍ ထားရှိသော သဘောထား’ ဟူသည့် စာတမ်းဖြစ်သည်။
စာတမ်းတွင် ဗိုလ်ချုပ်အောင်ဆန်း၏ လူမျိုးနှင့်ပတ်သက်၍ အဓိပ္ပာယ်ဖွင့်ဆိုချက်ကို ကိုးကား၍ ဖော်ပြ၏။
“လူမျိုးဆိုသည်မှာ သုခ၊ ဒုက္ခ အတူခံစားကြ၍ နီးနီးစပ်စပ် အကျိုးချင်းထပ်ပြီးလျှင် နှစ်ပရိစ္ဆေဒရှည်လျားစွာ တမျိုးတစားတည်းပင်ဟု စိတ်ထားရှိသူတို့ကို တစုတည်းပေါင်း၍ ခေါ်ဝေါ်ခြင်းသာဖြစ်ပေသည်။ အမျိုးအနွယ်၊ ကိုးကွယ်သည့် ဘာသာတရား၊ ပြောဆိုသည့် ဘာသာစကားတို့ကို အရေးထားရမည်ဖြစ်သော်လည်း စင်စစ်မှာအေးအတူ၊ ပူအမျှ ကောင်းတူဆိုးဘက် ပူးပေါင်းလျက်နေလိုသော အစဉ်အလာ ဆန္ဒအပေါ်တွင် ဝံသာနုရက္ခိတတရားသည် တည်နေပေ၏”
…….. ပြီးလျှင် …. ပင်လုံစာချုပ်၏ အနှစ်သာရကို ကောက်နုတ်ပြီး …..
“တောင်တန်းဒေသများ၏ နယ်တွင်းအုပ်ချုပ်ရေးတွင် ယခုလက်ရှိခံစားလျက်ရှိသော ကိုယ်ပိုင်အုပ်ချုပ်ရေး ဆုံးပါးရန် မည်သည့်ဒေသတွင်မဆို လုံးဝပြုမူလိမ့်မည်မဟုတ်၊ တောင်တန်းဒေသများအတွက် နယ်တွင်း အုပ်ချုပ်ရေးတွင် ကိုယ်ပိုင်ပြဋ္ဌာန်းခွင့် အပြည့်အဝရှိကြောင်း မူအားဖြင့် လက်ခံသည်။
တောင်တန်းဒေသရှိ ပြည်သူတို့သည် ဒီမိုကရေစီတိုင်းပြည်များတွင် အခြေခံအခွင့်အရေးနှင့် ရပိုင်ခွင့်များဟု သတ်မှတ်ထားသည့် အခွင့်အရေးများနှင့် ရပိုင်ခွင့်များကို ရရှိခံစားစေရမည်” … ဟူ၍ စာတမ်း၏ နိဒါန်းတွင် ဖော်ပြ၏။
စာတမ်းက ဆက်၍ …. အမျိုးသားဒီမိုကရေစီအဖွဲ့ချုပ်၏ ဖွဲ့စည်းအုပ်ချုပ်ပုံ အခြေခံစည်းမျဉ်း (ယာယီ) နှင့် မူဝါဒသဘောထားများ (မူကြမ်း)၊ ကြေညာချက်အမှတ် (၉) ရွေးကောက်ပွဲ ကြေညာစာတမ်း၊ ပြည်ထောင်စု တိုင်းရင်းသားလူမျိုးများ ဒီမိုကရေစီအဖွဲ့ချုပ်နှင့် ဆွေးနွေးညှိနှိုင်းချက်များမှ …. တိုင်းရင်းသားလူမျိုးစုများအရေးနှင့် ပတ်သက်သည့် အဖွဲ့ချုပ်၏ ထားရှိခဲ့သော မူဝါဒသဘောထားများကို ပြန်လည်၍ ထုတ်နုတ်ဖော်ပြသည်။ စာတမ်း၏ ဝိညာဉ်မှာမူ…
“နိုင်ငံတော်သည် တန်းတူရည်တူဖြစ်ကြသော ကချင်၊ ကယား၊ ကရင်၊ချင်း၊ ဗမာ၊ မွန်၊ ရခိုင်၊ ရှမ်း အစရှိသော တိုင်းရင်းသား လူမျိုးနွယ်စုများနှင့် ပေါင်းစပ်ဖွဲ့စည်းထားသော နိုင်ငံဖြစ်သည်”
“အမိမြန်မာနိုင်ငံတော်ကို ‘ပြည်ထောင်စု နိုင်ငံတော်’ အဖြစ် တည်ဆောင်ရန်၊ ပြည်ထောင်စု နိုင်ငံတော်ကို ဖွဲ့စည်းသည့်အခါ ဗဟိုတွင် ပြည်သူ့လွှတ်တော်နှင့် အမျိုးသားလွှတ်တော်တို့ ပါဝင်သော ပြည်ထောင်စု လွှတ်တော်ကို ဖွဲ့စည်းရန်၊ တန်းတူရည်တူဖြစ်ကြသော ပြည်နယ်နှင့်တိုင်းများတွင် သက်ဆိုင်ရာပြည်နယ် (သို့မဟုတ်) တိုင်း လွှတ်တော်တရပ်စီ ဖွဲ့စည်းရန်၊ ကိုယ်ပိုင်အုပ်ချုပ်ခွင့်ရ ဒေသများတွင် ကိုယ်ပိုင်အုပ်ချုပ်ခွင့်အာဏာများရှိသည့် အာဏာပိုင်အဖွဲ့များ ဖွဲ့စည်းထားရှိရန်၊ အဆင့်ဆင့်သော အာဏာပိုင်အဖွဲ့များကို ပြည်သူက လွတ်လပ်၍တရားမျှတသော ရွေးကောက်ပွဲများတွင် မိမိတို့ကိုယ်တိုင် ရွေးကောက်တင်မြှောက် အာဏာအပ်နှင်းလိုက်သော ပြည်သူ့ကိုယ်စားလှယ်များဖြင့် ဖွဲ့စည်းရန်” … ဟူ၍ ဖြစ်၏။
အခမ်းအနားတွင် ဒေါ်အောင်ဆန်းစုကြည်က မိန့်ခွန်းစကားပြော၏။ ဒေါ်အောင်ဆန်းစုကြည်က… သူမ၏ မိန့်ခွန်းတွင် စာတမ်းနှင့် ပတ်သက်ပြီး ထည့်သွင်း၍ ပြောဆို၏။
“အမျိုးသားဒီမိုကရေစီအဖွဲ့ချုပ်ရဲ့ တိုင်းရင်းသားအရေးနဲ့ စပ်လျဉ်းတဲ့ သဘောထားကို အများသိနိုင်ဖို့ ဒီကနေ့ ထုတ်ပြန်လိုက်ပါတယ်။ သဘောထား ကြေညာစာတမ်းထဲမှာ ပြည်ထောင်စုသားအားလုံး စည်းလုံးညီညွှတ်ရေးအတွက် မဖြစ်မနေ နိုင်ငံတော်ဖွဲ့စည်းပုံ အခြေခံဥပဒေမှာ ပါသင့်တယ်လို့ ယူဆရတဲ့ အချက်အလက်တွေကို ထည့်သွင်းထားပါတယ်။ ဒီအချက်အလက်တွေဟာ ပြည်ထောင်စု တည်တံ့ခိုင်မြဲရေးအတွက် လိုအပ်တဲ့ အနည်းဆုံး အာမခံချက်တွေလို့ဆိုရင် မှားမယ် မထင်ပါဘူး”
“ဒီနေရာမှာ အလေးအနက်ထားပြီး ပြောချင်တာကတော့ အမှန်စင်စစ် ဖွဲ့စည်းပုံအခြေခံဥပဒေဆိုတာ အဖွဲ့အစည်းတခုတည်းက ကြိုက်သလို ရေးဆွဲအပ်တာ မဟုတ်ပါဘူး”
၄၉ နှစ်မြောက် ပြည်ထောင်စုနေ့အခမ်းအနားက အနှစ်သာရများစွာနှင့် …။ ရွှေဂုံတိုင်က ပြည်ထောင်စုတေး သီကျူရင်း…၊ ပင်လုံအလံတော် လွှင့်ထူလျက်…။ ဆောင်းနှောင်းလေက နွေးနွေးထွေးထွေး……။
(၁၇၁)
၁၉၉၆ ခုနှစ်၊ မတ်လ ၂၅ ရက်၊ တနလာင်္နေ့….။
ဒေါ်အောင်ဆန်းစုကြည် နေအိမ်အကျယ်ချုပ်မှ ပြည်လည်လွတ်မြောက်လာခဲ့သည်မှာ ရက်ပေါင်း ၂၅၉ ရက်ရှိပြီ။ ၂၅၉ ရက်အတွင်း စစ်အုပ်စုကို တွေ့ဆုံဆွေးနွေးရန် အဖွဲ့ချုပ်အနေနှင့် ကမ်းလှမ်းခဲ့သည်မှာ ၃ ကြိမ်ရှိပြီ။ မည်သို့မျှ မတုံ့ပြန်….။ ငြိမ်ဝပ်၍နေသည်။ ကမ်းလှမ်းမှု ၃ ကြိမ်လုံးက တရားဝင်စာထုတ်၍ တောင်းဆိုတင်ပြခဲ့ခြင်း ဖြစ်၏။
ပထမအကြိမ်က ၁၉၉၅ ခုနှစ်၊ နိုဝင်ဘာ ၂၇ ရက်နေ့တွင် ဖြစ်၏။
“ဆွေးနွေးပွဲတရပ် အောင်မြင်စွာ ဖြစ်မြောက်သည်အထိ အမျိုးသားဒီမိုကရေစီအဖွဲ့ချုပ်၏ ညီလာခံကိုယ်စားလှယ်များအနေဖြင့် အမျိုးသားညီလာခံသို့ ဆက်လက်တက်ရောက်ခြင်း မပြုသေးဘဲ စောင့်ဆိုင်းနေမည်ဖြစ်ကြောင်း…” အာဏာပိုင်များထံသို့ စာပို့၍တောင်းဆို၏။ သို့သော် တုံ့ပြန်မှုကား ဆွေးနွေးပွဲခန်းမဆောင်၏ တံခါး ဖွင့်ခြင်းမဟုတ်…. အမျိုးသားညီလာခံသို့ တက်ရောက်နေကြသည့် အဖွဲ့ချုပ်၏ ညီလာခံကိုယ်စားလှယ်များ အားလုံးကို ထုတ်ပယ်ခြင်းနှင့် တုံ့ပြန်လိုက်၏။
၁၉၉၅ ခုနှစ်၊ ဒီဇင်ဘာလ ၁ ရက်နေ့တွင် အဖွဲ့ချုပ်ဥက္ကဋ္ဌ ဦးအောင်ရွှေက (နဝတ) ဥက္ကဋ္ဌ ဗိုလ်ချုပ်မှူးကြီးသန်းရွှေထံ တရားဝင် စာရေးသားပေးပို့ပြန်၏။
“အမျိုးသားပြည်လည်ရင်ကြားစေ့ရေး၊ စစ်မှန်သော ပါတီစုံဒီမိုကရေစီ နိုင်ငံတော် ဖြစ်ပေါ်လာနိုင်ရေး၊ အများပြည်သူတို့ လက်ခံလာနိုင်သော ဖွဲ့စည်းပုံအခြေခံဥပဒေတရပ် ပေါ်ထွန်းရေး၊ အနာဂတ်ခရီး ချောမောပြေပြစ်ရေးအတွက် မျက်နှာချင်းဆိုင် တွေ့ဆုံဆွေးနွေးရေးကို ပြုလုပ်ပါရန် ထပ်လောင်း၍ မေတ္တာရပ်ခံအပ်ပါသည်” ….. ဟူ၍ အဖွဲ့ချုပ်၏ စာတွင် မျက်နှာချင်းဆိုင် တွေ့ဆုံဆွေးနွေးရေးအတွက် စစ်အုပ်စုကို မေတ္တာရပ်ခံ၏။ သို့သော် …. စစ်အုပ်စုက ငြိမ်၍နေမြဲ…။ အဖွဲ့ချုပ်က မလျှော့သော ဇွဲနှင့် …. ၁၉၉၆ ခုနှစ်၊ ဖေဖော်ဝါရီလ ၂၆ ရက်နေ့…၊ နေ့စွဲနှင့် အမျိုးသားဒီမိုကရေစီအဖွဲ့ချုပ် ဥက္ကဋ္ဌက အာဏာရှင်ဥက္ကဋ္ဌထံ တတိယအကြိမ်မြောက် စာရေးသား၍ ‘မျက်နှာချင်းဆိုင် တွေ့ဆုံဆွေးနွေးရေး’ ကို မေတ္တာရပ်ခံပြန်သည်။
“မိမိတို့နိုင်ငံတွင် အမျိုးသား ပြန်လည်ရင်ကြားစေ့နိုင်ရေး၊ ပြည်သူတို့၏ စီးပွားရေး၊ လူမှုရေး၊ အစရှိသည်များ တိုးတက်ဖွံ့ဖြိုးပြီး ပြည်သူတို့၏ ကာယ၊ ဥာဏ၊ လုံ့လ၊ ဝိရိယ၊ စွမ်းအားတို့အရ ခံစားနိုင်ရေး၊ အများပြည်သူတို့ ယုံယုံကြည်ကြည်ဖြင့် လက်ခံနိုင်သော ဖွဲ့စည်းပုံအခြေခံဥပဒေ ပေါ်ထွန်းလာနိုင်ရေး၊ စစ်မှန်သော ပါတီစုံဒီမိုကရေစီ နိုင်ငံတော်သစ် ဖြစ်ပေါ်လာနိုင်ရေး အစရှိသည့် ပြဿနာရပ်များနှင့် ပတ်သက်၍ နိုင်ငံတော် ငြိမ်ဝပ်ပိပြားမှု တည်ဆောက်ရေးအဖွဲ့သည် တဦးနှင့်တဦး သို့မဟုတ် တဖွဲ့နှင့်တဖွဲ့ တွေ့ဆုံဆွေးနွေးရန် အထူးလိုအပ်နေသည်ဟု အမျိုးသားဒီမိုကရေစီအဖွဲ့ချုပ်က ရိုးသားပွင့်လင်းစွာ ယုံကြည်လက်ခံထားကြောင်း” ဖော်ပြ၏။ စစ်အုပ်စုက … နေမြဲပင်။
သို့သော် … လွန်ခဲ့သည့်နှစ် မတ်လ ၂၇ ရက်နေ့ အခမ်းအနားတွင်မူ စစ်အုပ်စု ဥက္ကဋ္ဌက တပ်မတော်ကာကွယ်ရေး ဦးစီးချုပ်အနေဖြင့် တိုင်းပြည်သို့ မိန့်ခွန်းချွေရာ၌ …..
“နိုင်ငံတော်ရဲ့ အေးချမ်းသာယာရေးကို မထိခိုက်ဘူး။ နိုင်ငံတော်ရဲ့ အကျိုးစီးပွားကို မထိခိုက်ဘူးဆိုရင် တပ်မတော်အနေနဲ့ အာဃာတထားစရာအကြောင်း မရှိဘူးလို့ ပြောချင်တယ်။ တပ်မတော်ရဲ့ အမျိုးသား ပြန်လည်စည်းလုံးရေး လုပ်ငန်းစဉ်မှာ မြေပေါ်နိုင်ငံရေးအင်အားစုတွေလည်း အကျုံးဝင်ပါတယ်။ တပ်မတော်ဟာ နိုင်ငံရေးအင်အားစု အားလုံးနဲ့ ပူးပေါင်းပြီး နိုင်ငံတော်အကျိုးအတွက် ညီညီညွတ်ညွတ်နဲ့ ဆောင်ရွက်သွားနိုင်ဖို့ အမြဲတမ်း ကြိုးစားနေပါတယ်” ….. ဟူ၍ ဆို၏။ လက်တွေ့တွင်က …. တွေ့ဆုံဆွေးနွေးရေး ခရီးသို့ မျက်နှာမပြု၊ ခြေလှမ်းမပြင်…။
(၁၇၂)
၁၉၉၆ ခုနှစ် မတ်လ ၂၂ ရက်နေ့တွင် ရန်ကုန်ရှိ ရွှေဂုံတိုင် ရုံးချုပ်၌ပင် အမျိုးသားဒီမိုကရေစီအဖွဲ့ချုပ်၏ ဗဟိုဦးစီးအဖွဲ့ အစည်းအဝေး ကျင်းပ၏။ ဦးအောင်ရွှေ၊ ဦးတင်ဦး၊ ဦးကြည်မောင်၊ ဒေါ်အောင်ဆန်းစုကြည် အပါအဝင် ဗဟိုအလုပ်မှုဆောင်အဖွဲ့ဝင်များ အားလုံး တက်ရောက်ကြ၏။ ဆုံးဖြတ်ချက်က တခုတည်း….။
“ပထမအကြိမ် ပြည်သူ့လွှတ်တော် အစည်းအဝေး ခေါ်ယူကျင်းပမည့်ရက် သတ်မှတ်ပေးရန်” စစ်အုပ်စုသို့ တောင်းဆိုသွားရေးနှင့် ပြည်သူ့လွှတ်တော် ကိုယ်စားလှယ်များ ဆွေးနွေးညှိနှိုင်းနိုင်ရန်အတွက် စီစဉ်ဆောင်ရွက်ပေးပါရန် ဖြစ်၏။
ရွေးကောက်ပွဲ ပြီးစီးခဲ့သည်မှာ ၆ နှစ် ရှိလေပြီ။ ရွေးကောက်ပွဲနှင့်သက်ဆိုင်သည့် ကော်မရှင်၏ လုပ်ငန်းဆောင်တာများသည်လည်း ပြီးပြတ်ခဲ့ပြီ။ ပြည်သူ့လွှတ်တော် ရွေးကောက်ပွဲဥပဒေ အခန်း ၂ ၊ ပုဒ်မ ၃ အရ …
“လွှတ်တော်ကို မဲဆန္ဒနယ်များမှ ဤဥပဒေနှင့်အညီ ရွေးကောက်တင်မြှောက်လိုက်သော၊ လွှတ်တော်ကိုယ်စားလှယ်များဖြင့် ဖွဲ့စည်းရမည်” ဟူ၍ ပါရှိ၏။ ပုဒ်မ ၂ ၊ ပုဒ်မခွဲ (က) ပါ ဖော်ပြချက်အရ “လွှတ်တော်ဆိုသည်မှာ ပြည်သူ့လွှတ်တော်ကို ဆိုလိုသည်” ဟု တိကျစွာ အဓိပ္ပာယ်ဖွင့်ဆိုထားလေရာ…. တိုင်းပြုပြည်ပြု လွှတ်တော်ဟူ၍ အငြင်းပွားစရာမရှိ….။ ထားတော့….။ စစ်အုပ်စုမှ ထုတ်ပြန်ခဲ့သည့် ကြေညာချက် အမှတ် (၁/၉ဝ) အပိုဒ် ၁၂ တွင်က …..
“ပြည်သူ့လွှတ်တော် ရွေးကောက်ပွဲဥပဒေ ပုဒ်မ ၃ တွင် လွှတ်တော်ကို မဲဆန္ဒနယ်များမှ ဤဥပဒေနှင့်အညီ ရွေးကောက်တင်မြှောက်လိုက်သော လွှတ်တော်ကိုယ်စားလှယ်များဖြင့် ဖွဲ့စည်းရမည်” …. ဟူ၍ တိတိကျကျပင် ပြဋ္ဌာန်းကြေညာထား၏။ ပြီးလျှင် ….
သတင်းထုတ်ပြန်ရေးအဖွဲ့မှ အကြိမ် ၉ဝ မြောက် သတင်းစာရှင်းလင်းပွဲတွင် သတင်းထောက်တဦး၏ ပြည်သူ့လွှတ်တော် အစည်းအဝေးခေါ်ယူမည့်ရက် သတ်မှတ်ထားရှိမှုနှင့် ပတ်သက်ပြီး မေးမြန်းမှုကို ဖြေကြားရာတွင် “ရွေးကောက်ပွဲပြီးလျှင် အရွေးခံရသည့် လွှတ်တော်ကိုယ်စားလှယ်များ ညှိနှိုင်းဆောင်ရွက်ရမည်ဖြစ်ကြောင်း ဟူ၍ အတိအလင်း ရှင်းလင်းဖြေကြားခဲ့သည်”
ဤအတွက်ပင် …. အဖွဲ့ချုပ်ဗဟိုဦးစီးအဖွဲ့ အစည်းအဝေးက…. ပထမအကြိမ် ပြည်သူ့လွှတ်တော် အစည်းအဝေး ခေါ်ယူကျင်းပမည့်ရက် သတ်မှတ်ရန် ပြည်သူ့လွှတ်တော် ကိုယ်စားလှယ်များ ညှိနှိုင်းဆောင်ရွက်ရေးအတွက် စီစဉ်ပေးရန် စစ်အုပ်စုကို တောင်းဆို၏။
‘စည်မောင်း’ သံ ကြားရ၏။ တံခွန်၊ အလံတို့က …. ရွှေဂုံတိုင်တွင် တလွင့်လွင့်…..။
No comments:
Post a Comment