Sunday, January 31, 2010

မွန်လူထုအနေဖြင့် မွန်ခေါင်းဆောင်များ ဦးဆောင်မှုနောက်ကို လိုက်ရန် တိုက်တွန်း

ဖြိုးကြီး

မွန်ပြည် သူ လူထု အနေဖြင့် ပြည်သူလူထု အားလုံးအတွက် အရေးကြီးသည့် နိုင်ငံရေးအပြောင်းအလဲ ကာလတွင် မွန်ခေါင်းဆောင်များ၏ ဦးဆောင်မှု နောက်ကို ယုံယုံကြည်ကြည်လိုက်ပါကြရန် တိုက်တွန်းလိုက်သည်။

ယနေ့ကျရောက်သည့် (၆၃) နှစ်မြောက် မွန်အမျိုးသားနေ့ အခမ်းအနားတွင် မွန်အမျိုးသား ဒီမိုကရေစီအဖွဲ့ လွတ်မြောက်နယ်မြေဌာနချုပ် အထွေထွေအတွင်းရေးမှူး နိုင်ဥဿာက ပြောဆိုခြင်း ဖြစ်သည်။


“မွန်ပြည်သူလူထုအနေနဲ့ကတော့ မွန်ခေါင်းဆောင်တွေ ရှိပါတယ်၊ စိတ်ချရတဲ့ မွန်အမျိုးသားဒီမိုကရေစီအဖွဲ့ လူတွေရှိတယ်၊ တခါ မွန်ပြည်သစ်ပါတီရှိတယ်၊ ဒီအဖွဲ့နှစ်ဖွဲ့ကလည်း နိုင်ငံရေးနဲ့ ပတ်သက်ပြီးတော့ ရပ်တည်ချက် တူနေတော့ သူတို့ရဲ့ ဦးဆောင်ချက်ကို ယုံယုံကြည်ကြည်အပြည့်ဝ လိုက်ပေးပါ၊ ဦးဆောင်မှုနောက်ကို ခံယူပါလို့ ပြောချင်တယ်” ဟု ပြောသည်။

၂၀၀၈ ဖွဲ့စည်းပုံသည် တိုင်းရင်းသားများအတွက်သော်လည်းကောင်း၊ လူတဦးတယောက်ချင်းစီသော်လည်း၊ နိုင်ငံတော်အတွက်ပါ ကောင်းကျိုးမရှိဘဲ နအဖစစ်အုပ်စု ကောင်းစားရေးအတွက် ပြုလုပ်ထားခြင်းဖြစ်သည့်အတွက် အဆိုပါဖွဲ့စည်းပုံကို အခြေခံထားသည့် ရွေးကောက်ပွဲကို ဝိုင်းဝန်းကန့်ကွက်ရန် လိုအပ်ကြောင်း နိုင်ဥဿာက ဆက်ပြောသည်။

နအဖအစိုးရ ဆက်လက်ရှင်သန်သွားဖို့ပဲ ဖြစ်တဲ့အတွက်ကြောင့်မို့လို့ ဒါကို ဝိုင်းဝန်းကန့်ကွက်ကြဖို့၊ ကန့်ကွက်ကြဖို့ဆိုတဲ့နေရာမှာ ရွေးကောက်ပွဲကြီးတခုလုံးကို ကန့်ကွက်ခိုင်းတာ၊ တခုလုံးထဲမှာ ဝင်ရောက် ယှဉ်ပြိုင်ခြင်းဆိုတာလည်း အစိတ်အပိုင်းတခုပဲ အဲဒီအစိတ်အပိုင်းကိုလည်း ချန်မထားပါဘူး၊ အားလုံးကို ကန့်ကွက်ကြပါ” ဟု ပြောသည်။

မွန်အမျိုးသားနေ့အခမ်းအနားကို ထိုင်း- မြန်မာနယ်စပ်တွင် (၅) ကြိမ်မြောက်ကျင်းပခြင်းဖြစ်ပြီး မွန်ပြည်သူလူထုအတွက် အမျိုးသားရေးစိတ်ဓါတ်များ ဖြစ်ပေါ်လာစေရန် ရည်ရွယ်လုပ်ဆောင်ခြင်းဖြစ်ကြောင်း အခမ်းအနားဦးဆောင်သူတဦးက ပြောသည်။

“ခုနက ကျနော်ပြောသလိုဘဲ အမျိုးသားစိတ်ဓါတ်နဲ့ အမျိုးသားရေးဆိုတာ မပျောက်ကွယ်သွားအောင် ဒီဥစ္စာကို ကျနော်တို့က ပြန်ပြီးတော့ စဉ်းစားထားလို့ လုပ်တာပါ၊ ဒီပွဲဖြစ်မြောက်ရေးအတွက် တနည်းပြောရရင် စုပေါင်းပြီးတော့ လုပ်တာပေါ့” ဟု ပြောသည်။

ယနေ့ကျင်းပသည့် မွန်အမျိုးသားနေ့အခမ်းအနားတွင် မွန်ရိုးရာအကများဖြင့်လည်း တင်ဆက်ဖျော်ဖြေခဲ့ပြီး ဧည့်ပရိတ်သတ် ၃၀၀ ခန့်တက်ရောက်ခဲ့သည်။

No comments: