တိုးတက်သော ဗုဒ္ဓဘာသာ ကရင်အမျိုးသား တပ်မတော် (DKBA) ကို နအဖတပ်များ တိုက်ခိုက်လာပါက DKBA ဘက်မှ ကူ၍ တိုက်ခိုက် သွားမည်ဟု ကရင်အမျိုးသား အစည်းအရုံး (KNU) က ပြောဆို လိုက်သည်။ DKBA တပ်မဟာ ၅ မှ ဗိုလ်မှူးကြီး နှုတ်ခမ်းမွေး (စောလားပွယ်) ၏ တပ်များနှင့် နအဖ စစ်အစိုးရ တပ်များအကြား နယ်ခြား စောင့် တပ်ဖွဲ့စည်းရေးနှင့် ပတ်သက်၍ တင်းမာမှုများ ဖြစ်ပွားခဲ့ ပြီးနောက် KNU ဘက်မှ ယခုကဲ့သို့ ပြောဆို လိုက်ခြင်း ဖြစ်သည်။
“DKBA ကိစ္စတွေဆိုရင် သက်ဆိုင်ရာ နယ်မြေ အလိုက်က တပ်မဟာ တွေကပဲ စဉ်းစား ကြတယ်လေ၊ အခုကိစ္စမှာ ကျနော်တို့ စဉ်းစားကြတာက နှုတ်ခမ်းမွေးက မှန်တယ်၊ ဒါကြောင့်မို့လို့ တခုခု ဖြစ်လာရင် နှုတ်ခမ်းမွေး ဘက်က ကူတိုက် မယ်လို့ ဆုံးဖြတ် လိုက်ကြတာပါ”ဟု KNU ဒု ဥက္ကဋ္ဌ ဒေးဗစ် သာကပေါက ဧရာဝတီသို့ ပြောသည်။
ယခုလ ၂၁ ရက်နေ့တွင် နအဖ ဘက်မှ စစ်ဖက်ရေးရာ လုံခြုံရေး(စရဖ) အကြီးအကဲ ဒုတိယ ဗိုလ်ချုပ်ကြီး ရဲမြင့်က နယ်ခြား စောင့်တပ် ဖွဲ့စည်းရေးကို ထပ်မံကမ်းလှမ်းခဲ့သော်လည်း ဗိုလ်မှူးကြီး နှုတ်ခမ်းမွေးက ငြင်းပယ်ခဲ့ကြောင်း ကရင်သတင်းစဉ်(KIC)တွင် ဖော်ပြထားသည်။
“ကိုယ့်ရဲ့တပ်တွေကို နယ်ခြားစောင့်တပ်ဖွဲ့ပြီး သူများကို အုပ်ချုပ်ခိုင်းတာကို ဘယ်သူကမှ ကျေနပ်နိုင်မှာ မဟုတ်ပါဘူး”ဟု ဒေးဗစ် သာကပေါက ဆက်ပြောသည်။
နယ်ခြားစောင့်တပ်ဖွဲ့စည်းရေး ကမ်းလှမ်းချိန်တွင် ဒေသအတွင်း၌ နအဖ ဘက်မှ စစ်တပ်အင်အား ဖြည့်တင်းခြင်း၊ စစ်ရေး လှုပ်ရှားမှု တိုးလာခြင်းများလည်းရှိသည်ဟု ဒေးဗစ် သာကပေါ က ဆိုသည်။
ဗိုလ်မှူးကြီး နှုတ်ခမ်းမွေးကလည်း ယခုတပတ်အတွင်း နအဖ တပ်များနှင့် တိုက်ပွဲများဖြစ်လာနိုင်သည်ဟု ဆိုကာ ဒေသခံ ရွာသားများကို သတိပေးထားခဲ့သဖြင့် ဇူလိုင်လ ၂၅ ရက်နေ့တွင် ကရင်ပြည်နယ်၊ မြဝတီမြို့နယ်အတွင်းရှိ ဝေါ်လေ၊ ထီးပဲလေ၊ ပေါ်ကလော်၊ ထီးဝါးမယ်ထာ၊ ဒိုဝါ့၊ သေးဘောဘိုး စသည့် ရွာများမှ ဒေသခံများသည် ထိုင်းနိုင်ငံ တာ့ခ်ခရိုင်၊ ဖုတ်ဖရ မြို့နယ်သို့ ထွက်ပြေး တိမ်းရှောင်လာခဲ့ကြသည်။
တိမ်းရှောင်လာသူများမှာ စုစုပေါင်း ၇၀၀ ခန့်ရှိကြောင်း သို့သော်လည်း ထိုင်းအာဏာပိုင်များက ပြန်ခိုင်းသည့် အတွက် ယမန်နေ့မှ စတင်ကာ မိမိတို့ နေရပ်များကို ပြန်သွားကြကြောင်း ကရင်လူ့အခွင့်အရေးအဖွဲ့ (KHRG) က ပြောသည်။
“တာ့ခ်ခရိုင် အုပ်ချုပ်ရေးမှူးက ရွာသားတွေကို သွားတွေ့ပြီး တိုက်ပွဲတွေမဖြစ်သေးဘူးဆိုရင်တော့ ပြန်သွားကြပါ၊ တိုက်ပွဲ ဖြစ်မှ ပြန်လာပြီး ခိုလှုံကြပါလို့ ပြောတယ်”ဟု KHRG ပြောရေးဆိုခွင့်ရှိသူ တဦးက ပြောသည်။
ကရင်ပြည်နယ် မယ့်အော်ဘိုးရွာမှ ရွာသားတဦးကလည်း“တော်တော်များများတော့ ကိုယ့်ရွာကိုယ် ပြန်သွားကြပါပြီ၊ မပြန်နိုင်တဲ့ ကလေးတွေနဲ့ မိခင်တွေလောက်ပဲ ကျန်ပါတော့တယ်”ဟု ၎င်းက ဧရာဝတီသို့ ပြောသည်။
ထွက်ပြေးလာသူများကို ထိုင်းအာဏာပိုင်များဘက်မှ အစားအသောက်နှင့် သောက်သုံးရေများ ထောက်ပံ့ခဲ့သည်ဟုလည်း သိရှိရသည်။
နောက်ဆုံးရသတင်းများအရ ဗိုလ်မှူးကြီး နှုတ်ခမ်းမွေး၏ တပ်များနှင့် နအဖ တပ်များအကြား တင်းမာမှုများ ဆက်လက် မြင့်မားနေပြီး ပစ်ခတ်မှု တစုံတရာ မရှိသေးကြောင်း သိရသည်။
No comments:
Post a Comment