ဧရာဝတီအတွက် အာခံကြ

ဧရာဝတီ

အစိုးရ လုပ်ဆောင်နေသည့် နှစ်ရှည်စီမံကိန်းများ အနက် ဧရာဝတီ မြစ်ကြောတွင် တည်ဆောက်မည့် ရေအားလျှပ်စစ် ထုတ်လုပ်ရေး ရေကာတာ စီမံကိန်းများသည် ပြည်တွင်းပြည်ပမှ ပညာရှင်များ၊ တက်ကြွလှုပ်ရှားသူများ၊ နိုင်ငံရေးသမားများနှင့် အနုပညာရှင်များ အပါဝင် ပြည်သူအများစု၏ ဆန့်ကျင်မှု အခံရဆုံး ဖြစ်လာသည်။

တရုတ်စွမ်းအင် ရင်းနှီးမြှုပ်နှံမှု ကော်ပိုရေးရှင်း (China Power Investment Coporation - CPI) ၏ ရင်းနှီးမြှုပ်နှံမှုဖြင့် ဧရာဝတီမြစ်ဆုံ မြစ်ညာမြစ်ဝှမ်းဒေသတွင် မြစ်ဆုံ၊ ချီဗွေ၊ ချီဗွေငယ်၊ ဝူဆောက်၊ ခေါင်လန်ဖူး၊ ယီနန်၊ ဖီဇော၊ လိုင်ဇာ ရေကာတာ စီမံကိန်း ၈ ခုကို ၁၅ နှစ်အတွင်း အပြီး တည်ဆောက်မည်ဖြစ်ပြီး မဂ္ဂါဝပ် ၁၈၄၉၉ ထုတ်လုပ်နိုင်မည်ဟု သိရသည်။

တရုတ်နှင့် မြန်မာ ပညာရှင်များ၏ စီမံကိန်းများ ပြန်လည်သုံးသပ်ရေးနှင့် ထိုရေကာတာ စီမံကိန်း အရေအတွက် လျှော့ချရေး အကြံပြုချက် အစီရင်ခံစာကို CPI က ပယ်ချပြီးနောက် ဖြစ်နိုင်ခြေ အန္တရာယ်ကျရောက်မှုကို အချက်အလက်များဖြင့် ထောက်ပြသည့် ဆောင်းပါး၊ စာတမ်းနှင့် မီဒီယာ အင်တာဗျူးများက ပြည်တွင်းပြည်ပ မြန်မာလူထုကို လှုပ်နှိုးလိုက်သည်။

အင်တာနက် လူမှုကွန်ရက် စာမျက်နှာများ၊ မီဒီယာများတွင် ကျယ်ကျယ်လောင်လောင် ပြောဆို ဆန့်ကျင်လာကြသည်။ အစိုးရအာဘော် သတင်းစာက ယခုသီတင်းပတ်အတွင်း နှစ်ရက်ဆက်တိုက် ယင်းတို့၏ ရေကာတာ စီမံကိန်းအပေါ် ခုခံကာကွယ် ရေးသားအပြီးတွင် ဝေဖန်ဆန့်ကျင်မှု၌ ပြည်တွင်း အင်အားကြီး မီဒီယာ၊ သတင်းစာဆရာများနှင့် အနုပညာရှင်များပါ ပါဝင်လာပြီး အရှိန်မြင့်လာသည်ကို တွေ့ရသည်။

ဧရာဝတီမြစ်ကို အကာအကွယ်ပေးရေး တောင်းဆိုတိုက်တွန်းသူများအပေါ် ပုတ်ခတ်ရေးသားထားပြီး ဖြစ်ပေါ်လာမည့် ဧရာဝတီမြစ် ဘေးအန္တရာယ်နှင့် နှိုင်းယှဉ်၍ မရသော “အလုပ်အကိုင် အခွင့်အလမ်း ၂၆၀၀ ကျော်” ဖန်တီးပေးနိုင်သည် စသည့် အရေအတွက် ကိန်းဂဏန်းများပြည့်နေသည့် အစိုးရအာဘော် ဆောင်းပါးနှစ်ပုဒ်သည် ပြည်သူလူထုနှင့် တက်ကြွလှုပ်ရှားသူများကို သည်းမခံနိုင် ဖြစ်စေခဲ့သည်။ ယင်းဆောင်းပါးများကို ပြန်ကြားရေးဝန်ကြီး ဦးကျော်ဆန်းကိုယ်တိုင် ကြီးကြပ်ရေးသားကြောင်း အခိုင်အမာ သိရသည်။

ယခုကဲ့သို့ အစိုးရ စီမံကိန်းများပေါ် ကျယ်ကျယ်ပြန့်ပြန့် ထွက်ပေါ်လာသည့် ဝေဖန်ချက်များသည် အထူးသဖြင့် ပြည်တွင်း၌ ဆယ်စုနှစ်များအတွင်း အလှုပ်ခတ်ဆုံးဟု ဆိုနိုင်သည်။

ကြီးမားလှသည့် အဆိုပါ ရေကာတာ စီမံကိန်းများနှင့် တရုတ်၏ အကျိုးစီးပွား၊ မြန်မာပြည်၏ အသက်သွေးကြောသဖွယ် ဖြစ်သည့် ဧရာဝတီမြစ်ကို ထိခိုက်မှုနှင့် ရေရှည် အန္တရာယ်များအပေါ် မီဒီယာနှင့် တက်ကြွလှုပ်ရှားသူများက မေးခွန်းထုတ်ကာ အစိုးရကို စိန်ခေါ်လာကြသည်။

အစိုးရ၏ အရေအတွက် ကိန်းဂဏန်းများနှင့် ချပြသော ဖြစ်နိုင်ခြေ အကျိုးကျေးဇူးများကို ပြည်သူလူထုက ယုံကြည်ခြင်း မရှိသည်မှာ ထင်ရှားသည်။ လက်ငင်းဆိုးကျိုးများအဖြစ် အခြေချနေနိုင်နေသော ကျေးရွာများ ပြောင်းရွှေ့ပေးရခြင်း၊ ဒေသခံအများအပြား နေရပ်ကို စွန့်ခွာသွားရခြင်း၊ မြေယာများ သိမ်းဆည်းခံရခြင်းတို့ကို တွေ့ကြုံနေရနှင့် အနာဂတ်တွင် ဖြစ်နိုင်ဖွယ်ရှိသည့် သဘာဝပတ်ဝန်းကျင် ဂေဟဗေဒစနစ်၊ လူမှုရေး၊ စီးပွားရေး တို့အပေါ် ရိုက်ခတ်နိုင်သော အန္တရာယ်များကြောင့် ဖြစ်သည်။

ယင်းစီမံကိန်းကြီးများနှင့် ပတ်သက်၍ အစိုးရက ပြည်သူလူထုအတွက် သတင်းထုတ်ပြန်မှု မရှိခြင်းနှင့် အစိုးရသတင်းစာများမှ တဖက်သတ် ဇွတ်မှိတ် ရေးသားခြင်းများသည် တရုတ်နိုင်ငံအပါအဝင် ဖွံ့ဖြိုးဆဲ အာရှနိုင်ငံများအတွင်း ယခင်က တွေ့ကြုံဖူးသည့် အလားတူ စီမံကိန်းများ၏ ဆိုးကျိုးသက်ရောက်မှု နမူနာများကို ဖုံးကွယ်နိုင်ခြင်း မရှိပေ။

ပြည်တွင်း ပြည်ပမှ လှုပ်ရှားသူများက လက်ရှိ စီမံကိန်းများကို ရပ်တန့်ရန် သို့မဟုတ် ပမာဏ သေးငယ်သော စီမံကိန်းများအဖြစ် ပြောင်းလဲရန် တောင်းဆို တိုက်တွန်းနေကြသည်။ ဒေါ်အောင်ဆန်းစုကြည်ကလည်း ရေကာတာ စီမံကိန်းများနှင့် ပတ်သက်၍ ဧရာဝတီကို ကယ်တင်ရန် ကြေညာချက်တစောင် ယနေ့ ထုတ်ပြန်လိုက်သည်။

မြစ်ဆုံရေကာတာ စီမံကိန်းကို ကချင်လွတ်မြောက်ရေးအဖွဲ့ (KIO) က အစိုးရကို တင်ပြတိုက်တွန်းခဲ့ဖူးသော်လည်း အရာမရောက်ခဲ့ပေ။ ယမန်နှစ်က မြစ်ဆုံရေကာတာ စီမံကိန်းတွင် ဗုံးပေါက်ကွဲမှု ၁၀ ကြိမ် ဖြစ်ပွားခဲ့သေးသည်။
မြန်မာအစိုးရတပ်နှင့် ကချင်လွတ်မြောက်ရေးတပ်မတော် (KIA) တို့ ယခုဖြစ်ပွားနေသည့် တိုက်ခိုက်မှုများသည်လည်း ယင်း ရေကာတာစီမံကိန်းများ၏ ပြဿနာနှင့် ဆက်စပ်နေသည်။

အစိုးရက ရေရာသော တုံ့ပြန်မှု မပေးခဲ့လျှင် တောင်းဆို တိုက်တွန်းမှုများသည် ထောင့်ပေါင်းစုံမှ အရှိန်မပျက် ရေရှည် ဆက်လက်ထွက်ပေါ်နေဖွယ် ရှိသည်။

မြန်မာ့ သယံဇာတများပေါ်မှရရှိမည့် တရုတ်၏ အကျိုးစီးပွား၊ ပညာရှင်များနှင့် တက်ကြွလှုပ်ရှားသူများ အပါအဝင် ပြည်သူလူထု အများစု ဆန္ဒအရ စီမံကိန်းများကို အတိုးအလျှော့ ပြုလုပ်ရေး ယင်းနှစ်ခုအကြားတွင် အလွန်ခက်ခဲသည့်တိုင် သမ္မတ ဦးသိန်းစိန် အစိုးရအနေဖြင့် တစုံတရာ ဆုံးဖြတ်ချက် ချသင့်သည့် အခြေအနေ ဖြစ်သည်။

ပြီးခဲ့သည့် ဇူလိုင်လကုန်ပိုင်းတွင် လာအိုနိုင်ငံသည် မဲခေါင်မြစ်အောက်ပိုင်းတွင် တည်ဆောက်မည့် ဇယဘူရီ (Xayaburi) ရေကာတာ စီမံကိန်းကို ကန့်ကွက်မှုများနှင့် ကျရောက်နိုင်သည့် ဆိုးကျိုးများကြောင့် ပြန်လည်သုံးသပ်မှုများ ပြုလုပ်ရန် ရပ်ဆိုင်းခဲ့သည်။ ယင်းတုံ့ပြန်မှုအပေါ် အမေရိကန် နိုင်ငံခြားရေးဝန်ကြီး ဟီလာရီ ကလင်တန်ကလည်း ချီးကျူးပြောဆိုခဲ့သည်။

အစိုးရကောင်းတရပ်အဖြစ် ကြိုးပမ်းနေကြောင်း ကတိပြုထားသည့်အပြင် အာဆီယံ ဥက္ကဋ္ဌရာထူးရရှိရေးကဲ့သို့သော အရေးပါသည့် ခြေလှမ်းများအတွက် ပြည်တွင်းထောက်ခံမှု မရရှိသည့် အခြေအနေကို မြန်မာအစိုးရက ထည့်တွက်ရမည်ဖြစ်သည်။

ပြည်သူများဘက်က တရုတ်သြဇာနှင့် အကျိုးစီးပွား လွှမ်းမိုးမှုအပေါ် သံသယနှင့် အစိုးရဘက်ကလည်း ရွေးကောက်ခံ အရပ်သား အစိုးရတရပ်အဖြစ် အသိအမှတ်ပြု ခံလိုမှုတို့ကလည်း ရှိနေသည်။

ဆယ်စုနှစ်ကာလများစွာအတွင်း ညံ့ဖျင်းသော စီမံခန့်ခွဲမှုများကြောင့် အလွန်အမင်း ယိုယွင်းလာနေသည့် သဘာဝပတ်ဝန်းကျင်နှင့် ပြည်သူလူထု၏ ဧရာဝတီမြစ်ကို ကယ်တယ်ရေး နိုးကြားတက်ကြွလာမှုတို့ကိုပါ ထည့်သွင်း သုံးသပ်လျှင် ဦးသိန်းစိန် အစိုးရအနေဖြင့် အဆိုပါ မဟာ ရေကာတာ စီမံကိန်းကြီးများကို ရပ်တန့်ထားရန်နှင့် စီမံကိန်းအရေအတွက်နှင့် အရွယ်အစား လျှော့ချပစ်ရေး ပြန်လည်သုံးသပ်ရန် အချိန်ကျရောက်နေပြီ ဖြစ်သည်။