မူလသတ်မှတ်ထားတဲ့ အချိန်ထက် ၁ နာရီနောက်ကျပြီး ညနေ ၆ နာရီကျော်မှ ဟိုတယ်ကို ရောက်လာတဲ့ ဒေါ်အောင်ဆန်းစုကြည်ကို ရိုး ရာဝတ်စုံတွေဝတ်နဲ့ ခွပ်ဒေါင်းအလံတွေ၊ NLD အလံတွေ ထောင်ပြီးမနက် ၁၀ နာရီကတည်းက ဇွဲကောင်းကောင်းနဲ့စောင့် မျှော်ကြိုဆို ခဲ့ တာပါ။
“ကျနော်တို့ ဒေါ်အောင်ဆန်းစုကြည်နဲ့ ၁၉၈၈ တုန်းက တကြိမ်ပဲတွေ့ဖူးတယ်။ ၂၄ နှစ်လောက် ခွဲခဲ့ရတဲ့ အမေတယောက်ကို ပြန်တွေ့ရမှာမို့ တွေးပြီးတော့ကို ပျော်နေတယ်။ ကြိုဖို့နေရာ မရမှာစိုးလို့မနက် ၉ နာရီကတည်းက ရောက်နေ တာ” လို့ ပင်နီတိုက်ပုံနဲ့ ကချင်ပုဆိုးဝတ်ထားတဲ့ ကိုမြင့်ဝေက ပြောပါတယ်။ သူက ဒိန်းမတ်နိုင်ငံကနေ ၃ ရက်လောက်စောပြီး ကြိုရောက်နေတာပါ။
မွန်၊ ကချင်၊ ကရင်၊ ချင်းတိုင်းရင်းသား မိသားစုတွေလည်း သားသမီးငယ်တွေပါမကျန် ရိုးရာဝတ်စုံတွေဆင်မြန်းပြီး စောင့်ကြိုကြသလို အိုး စည်ဒိုးပတ်တွေတီးပြီး ကခုန်ကြိုဆိုသူတွေကလည်း စောင့်မျော်ကြိုဆိုသူတွေအတွက် မငြီးငွေ့အောင် ဖန်တီး ပေးသလို ဖြစ်နေ ပါတယ်။
ဒေါ်အောင်ဆန်းစုကြည် ပို့စကပ်တွေနဲ့ အလံတွေ၊ စတစ်ကာတွေရောင်းပြီး ပြည်တွင်းကို ထောက်ပံ့ဖို့ ရန်ပုံငွေရှာကြတာလည်းရှိပါတယ်။
လုံခြုံရေးရဲများနဲ့ ရဲမေတချို့အပြင် မြင်းစီးရဲမေတချို့လည်း ဟိုတယ်ရှေ့မှာ စောင့်ကြပ် ခဲ့ကြပါတယ်။ ရိုးရာဝတ်စုံတွေ ၀တ်ဆင်ထားတဲ့ တိုင်းရင်းသားကလေးငယ်တွေဟာ ပန်းခြင်းလေးတွေ ကိုယ်စီနဲ့ ဟိုတယ်အ၀င်ဝ ဆင်ဝင်အောက် တဘက်တချက်မှာ တန်းစီပြီး ဒေါ် အောင် ဆန်းစုကြည်ကို ပန်းခြင်းကိုယ်စီကမ်းဖို့ စောင့်နေကြပါတယ်။
နော်ဝေးနိုင်ငံရဲ့ ထုံးစံအတိုင်း နွေဆိုပေမယ့် ပြိုတော့မလို မိုးသားတွေနဲ့ အုံ့မှိုင်းနေလို့ ဒေါ်အောင်ဆန်းစုကြည် လာမယ့်အချိန် မိုးဖျက် မှာကို အားလုံးကစိုးရိမ်စိုးရိမ်နေပါတယ်။ ဒါပေမယ့် ဒေါ်အောင်ဆန်းစုကြည် ရောက်ခါနီး ညနေ ၆ နာရီကျော်မှာ နေရောင် ထွက်လာပါ တယ်။
“အမေစု ကျန်းမာပါစေ၊ အမေစု ကျန်းမာပါစေ” ဆိုတဲ့ အတိုင်အဖောက်တွေနဲ့ ဆယ်ကျော်သက်မိန်းခ လေးငယ်တွေရဲ့ အသံတွေဟာ ဟို တယ်မျက်စောင်းထိုးက ပါလီမန်အဆောက်အအုံကနေ ပဲ့တင်ခတ်ပြီး ဟိန်းထွက်နေပါတယ်။
နေ့လည် ၂ နာရီကတည်းက ဟိုတယ်ကို ကြိုတင်ရောက်နေတဲ့ ဒေါ်အောင်ဆန်းစုကြည်ရဲ့ သားငယ် ကင်မ်လည်း ဟိုတယ်အ၀င်ဝကနေ မိ ခင်ကို စောင့်ကြိုခဲ့ပါတယ်။
ရာနဲ့ချီတဲ့ မြန်မာတွေအပြင် နော်ဝေးလူမျိုးနဲ့ တခြားနိုင်ငံသား အမြားအပြားလည်း NLD အလံငယ်တွေ ဝှေ့ရမ်းဟစ်အော်ပြီး ဒေါ်အောင် ဆန်း စုကြည်ကို ကြိုဆိုခဲ့ပါတယ်။
ဟိုတယ်အ၀မှာ ကားဆိုက်တော့ လုံခြုံရေးရဲတွေက ဒေါ်အောင်ဆန်းစုကြည်ကို ဟိုတယ်အတွင်း ခေါ်ဆောင်ရာကို ငြင်းဆန်ပြီး လမ်းတ ဘက် က တန်းစီကြိုဆိုနေတဲ့ မြန်မာတွေကို သွားရောက် လက်ဆွဲနှုတ်ဆက်ပါတယ်။ တိုင်းရင်းသား ကလေးငယ်တွေဆီက ပန်းခြင်းများ အားလုံးကို လက်ခံခဲ့သလို အော်ဟစ်နှုတ်ဆက်ကြတဲ့ မြန်မာတွေအားလုံးကို ၅ မိနစ်ကြာ ပြုံးပြုံးရွှင်ရွှင် နှုတ်ဆက်ပြီးနောက် ဟိုယ်ထဲကို ၀င်ရောက် သွားခဲ့ ပါတယ်။
ဒါပေမယ့် ကြိုဆိုတဲ့ ပရိသတ်အများအပြား ပြန်မသွားသေးဘဲ ညနေ ၆ နာရီခွဲ နော်ဝေး၀န်ကြီးချုပ်ရုံးမှာ သတင်းစာရှင်းပွဲသွားမယ့် ဒေါ် အောင် ဆန်းစုကြည်ကို ဆက်လက်စောင့်မျှော် နှုတ်ဆက်ကြပါတယ်။
“ကျမတို့က အခုမှ အမေစုကို မြင်ဖူးတာ။ ၅ နာရီကျော်လောက် မတ်တပ်ရပ်စောင့်နေတာ။ အမေစု ကို မြင်ရတာနဲ့ ညောင်းတာတွေ ပျောက်သွား တယ်။ စောင့်ရကြိုးနပ်တယ်။ သိပ်ပြီးပျော်တယ်။ ၀မ်းသာလွန်းလို့ မျက်ရည် တွေတောင် ကျ တယ်” လို့ အသက် ၁၅ နှစ် အရွယ် ကရင်တိုင်းရင်းသူတယောက်က ပြောပါတယ်။
“မြန်မာပြည် မပြန်နိုင်တာ အနှစ် ၂၀ ကျော်သွားပြီ။ ဒေါ်အောင်ဆန်းစုကြည်နဲ့ လက်ဆွဲနှုတ်ဆက်ရလို့ အနှစ် ၂၀ လောက် စိတ်အားတက်သလို ခံစားရတယ်” လို့ ASDF ကျောင်းသား ရဲဘော်ဟောင်းတယောက်က ပြောပါတယ်။
ဒီကနေ့ စနေနေ့မှာ ဒေါ်အောင်ဆန်းစုကြည်ဟာ နိုဘယ်လ်ငြိမ်းချမ်းရေးဆုကို လက်ခံမှာဖြစ်သလို ညနေပိုင်းမှာ မြန်မာနိုင်ငံသားများနဲ့ သီးခြား တွေ့ဆုံမယ့် အစီအစဉ်လည်း ရှိပါတယ်။
No comments:
Post a Comment