ဦးသန်းရွှေမိသားစု ကို သီတင်းကျွတ်လပြည့်နေ့က သွားရောက်ကန်တော့တုန်းက မြန်မာ့နိုင်ငံရေး ဖြစ်စဉ်များ အပေါ် စိုးရိမ်ပူပန်တဲ့အကြောင်း ဦးသန်းရွှေက သူ့ကို ပြောဆိုခဲ့တယ်လို့ သူရဦးရွှေမန်းက မနေ့က နေပြည်တော်မှာ ကျင်းပတဲ့ သတင်းစာရှင်းလင်းပွဲ ပြောဆိုလိုက်တာ ဖြစ်ပါတယ်။
ဦးသန်းရွှေကို အခုလက်ရှိ မြန်မာနိုင်ငံရေး အခင်းအကျင်းမှာ နောက်ကွယ်က ကြိုးကိုင်သူအဖြစ် တချို့က ယူဆနေကြပေမယ့် ဒါဟာ မှန်ကန်မှုမရှိတဲ့အကြောင်း၊ မြန်မာ့ နိုင်ငံရေး အခန်းကဏ္ဍကမှာ ဦးသန်းရွှေအနေနဲ့ ပါဝင် ပတ်သတ်ခြင်းမရှိကြောင်း သူရဦးရွှေမန်းက ပြောကြားခဲ့ပါတယ်။
တဆက်တည်းမှာပဲ လာမယ့် ၂၀၁၅ ရွေးကောက်ပွဲမှာ သမ္မတအဖြစ် ၀င်ရောက်အရွေးခံဖို့ အစီအစဉ်မရှိတဲ့အကြောင်း ဦးသိန်းစိန်က သူ့ကို ပြောဆိုခဲ့တယ်လို့ ပြည်ခိုင်ဖြိုးပါတီ ဥက္ကဌ နေရာကို ဦးသိန်းစိန်လက်ထဲကနေ ဒီနှစ်အတွင်းမှာ ရယူခဲ့တဲ့ သူရဦးရွှေမန်းက ပြောပါတယ်။
မြန်မာနိုင်ရဲ့ ပြုပြင်ပြောင်းလဲမှုတွေ ကြောင့် လက်ရှိမြန်မာသမ္မတ ဦးသိန်းစိန်ကို နိုင်ငံတကာက ချီးကျူးနေကြပေမယ့် နောက်သက်တမ်းတခု တာဝန်ထမ်းဆောင်ဖို့က မြန်မာပြည်သူတွေရဲ့ လိုလားချက် နဲ့ သူ့ရဲ့ ကျန်းမာရေး အခြေအနေ အပေါ် မူတည်တဲ့အကြောင်း မြန်မာသမ္မတက မနှစ်တုန်းက ထုတ်ဖော်ပြောဆိုခဲ့ဖူးပါတယ်။
အရင် စစ်အစိုးရလက်ထက်တုန်းက ဦးသိန်းစိန်ထက် ရာထူးပိုကြီးခဲ့တဲ့ သူရဦးရွှေမန်းဟာ ပြုပြင်ပြောင်းလဲ လုပ်လိုစိတ်ရှိတဲ့ နိုင်ငံရေးအရ အစွန်းမရောက်တဲ့သူ၊ စစ်တပ်နဲ့ ဆက်ဆံရေး ကောင်းကောင်းထား လိုသူ ဖြစ်ပြီး ဥပဒေ ရေးစွဲသူတွေကို လေးစားတမှုရှိတဲ့ သူ အဖြစ် နိုင်ငံရေးအကဲခတ် တချို့က လက်ခံထားပါတယ်။
မြန်မာသမ္မတအဖြစ် အရွေးခံဖို့ ဆန္ဒရှိကြောင်းကိုလည်း သူရဦးရွှေမန်းက မကြာခဏ ထုတ်ဖော်ပြောလေ့ရှိပေမယ့် မြန်မာ့ ဒီမိုကရေစီခေါင်းဆောင် ဒေါ်အောင်ဆန်းစုကြည် သမ္မတဖြစ်ခွင့် တားဆီးထားတဲ့ ဖွဲ့စည်းပုံ အခြေခံဥပဒေပါ သမ္မတ အရည် အချင်း ပြဋ္ဌာန်းချက် ပုဒ်မ ၅၉ စ ကို ပြင်ဆင်သင့်တယ်လို့ သူရ ဦးရွှေမန်းက ထပ်လောင်း ပြောကြား လိုက်ပါတယ်။ အဲဒီအချက်ကတော့ နိုင်ငံခြားသားနဲ့ လက်ထပ်ခဲ့သူ၊ နိုင်ငံခြားသား သားသမီးရှိသူတွေအနေနဲ့ သမ္မတ ဖြစ်ပိုင်ခွင့် မရှိဘူးဆိုတဲ့ အချက်ပဲ ဖြစ်ပါတယ်။
မြန်မာပြည်လုံးကျွတ်အပစ်အခတ်ရပ်စဲရေး
မြန်မာနိုင်ငံမှာ ပြုလုပ်မယ့် ပြည်လုံးကျွတ်အပစ်အခတ်ရပ်စဲရေး အစီအစဉ်မှာ ကချင်ကေအိုင်အေ အဖွဲ့နဲ့ တအောင်း ပလောင်အဖွဲ့တွေ မပါဝင်ရင်တောင် အဲဒီအစီအစဉ်ကို ဆက်လက်အကောင်အထည် ဖော်သွားမှာ ဖြစ်တယ်လို့ မြန်မာအစိုးရက ပြောလိုက်ပါတယ်။
အပစ်အခတ်ရပ်စဲရေး သဘောတူလက်မှတ်ရေးထိုးဖို့ ကချင်အဖွဲ့ကိုရော ပလောင်အဖွဲ့ကိုပါ ဖိတ်ခေါ်ထားပေမယ့် လာမယ့်လအတွင်း မထိုးဖြစ်ရင်တောင် တစ်နိုင်ငံလုံး အတိုင်းအတာနဲ့ အပစ်အခတ်ရပ်စဲရေး အစီအစဉ်ကို ဆက်လက်လုပ်ဆောင်သွားမှာဖြစ်တယ်လို့ သမ္မတရုံး ဒုဝန်ကြီး ဦးအောင်သိန်းက ဂျပန်နိုင်ငံက သတင်းထောက်တွေကို ပြောခဲ့ပါတယ်။
ကုလသမဂ္ဂကနေ တခါတရံ ကျင့်သုံးတဲ့အတိုင်း အဖွဲ့အားလုံး သဘောမတူရင်တောင် ဆက်လက်အကောင်အထည်ဖော်သွားပြီး အဲဒီအဖွဲ့တွေ အဆင်သင့်ဖြစ်တဲ့အခါ လက်မှတ်ရေးထိုးမှာ ဖြစ်တယ်လို့ ဆိုပါတယ်။
မြန်မာနိုင်ငံမှာ ပြည်လုံးကျွတ်အပစ်အခတ် ရပ်စဲရေး လက်မှတ်ရေးထိုးပြီးရင်တော့ နိုင်ငံရေး ဆွေးနွေးပွဲတွေလုပ်ဖို့ အစိုးရက စီစဉ်နေပြီး အဲဒီအထဲမှာ အုပ်ချုပ်ရေးအာဏာ မျှဝေကြဖို့ ကိစ္စတွေ သဘာဝ သယံဇာတ ခွဲဝေယူတဲ့ ကိစ္စတွေကို ဆွေးနွေးကြမယ်လို့ ပြောပါတယ်။
ပြည်လုံးကျွတ် အပစ်အခတ်ရပ်စဲရေး သဘောတူညီချက် လက်မှတ်ကို လာမယ့်လအတွင်း ပြုလုပ်ဖို့ ပြောဆိုခဲ့ပေမယ့် ဘယ်အချိန်၊ ဘယ်နေရာမှာ ပြုလုပ်မယ်ဆိုတာတော့ ထုတ်ဖော်ပြောဆိုတာ မရှိတဲ့အကြောင်း ကျိုဒိုး သတင်းအရ သိရပါတယ်။
No comments:
Post a Comment