ABC
ဒေသဖွံ့ဖြိုးရေးအတွက်လို့ဆိုပြီး စစ်အစိုးရလက်ထက်က သိမ်းယူခဲ့တဲ့ ကချင်ပြည်နယ် ဖားကန့်မြို့နယ် ဟူးကောင်းဒေသအတွင်းက လယ်ယာဧက ၃ သိန်းကျော်ကို ယုဇနကုမ္ပဏီက ခြံစိုက်လုပ်ကိုင်နေတဲ့အတွက် အဲဒီ မြေယာတွေ ပြန်လည်ရရှိဖို့ ကချင်တောင်သူတွေက မနေ့မနက်က ဆန္ဒထုတ်ဖော်ခဲ့ကြပါတယ်။
ဝါရာဇွပ် ကျေးရွာအုပ်စု ဒေသခံ တောင်သူတွေရဲ့ဒုတိယအကြိမ်မြောက် ဆန္ဒထုတ်ဖော်မှုကို ယုဇန ကုမ္ပဏီရုံးချုပ်ရှေ့မှာ ကျင်းပခဲ့ကြတာ ဖြစ်ပြီး လယ်သိမ်းခံဒေသခံတွေက သီးနှံလျော်ကြေး ပေးဖို့ ဆန္ဒထုတ်ဖော်ခဲ့ကြပါတယ်။
လယ်ယာမြေအငြင်းပွားမှုအတွက် ကချင်ပြည်နယ်တရားရုံးက ယုဇနကုမ္ပဏီကို လယ်တစ်ဧက ရှစ်သောင်းနှုန်း အပြင် တစ်ဧကကို အပင် ၁ ပင်နှုန်း လျော်ကြေးပေးဖို့ ဆုံးဖြတ်ချက် ချတဲ့ကိစ္စဟာ တရားဥပဒေနဲ့ မကိုက်ညီတဲ့ အတွက် ဒုတိယအကြိမ် ထပ်မံဆန္ဒထုတ်ဖော်ခြင်း ဖြစ်တယ်လို့ ၀ါရာဇွပ် ကျေးရွာအုပ်စုက လယ်သမားတွေက ပြောပြပါတယ်။
သီးနှံအမြောက်အများ စိုက်ပျိုးထားတဲ့ ဥယျာဉ်ခြံ တစ်ဧကအတွက် အပင်တစ်ပင်တည်းစာပဲ အလျော်ရမယ်ဆိုတဲ့ ကိစ္စဟာ လုံဝမဖြစ်နိုင်တဲ့ ကိစ္စဖြစ်တဲ့ အပြင် နှစ်ပေါင်းများစွာ သိမ်းယူထားတဲ့အတွက် နစ်နာကြေးတောင်းတာ ဖြစ်တယ်လို့ ဦးဆောင် ဆန္ဒထုတ်ဖော်သူ ဒေါ်ဘောက်ဂျာက ပြောပါတယ်။
ကချင်ပြည်နယ်လွှတ်တော်က ဖွဲ့စည်းထားတဲ့ လယ်ယာပြဿနာညှိနှိုင်းဖြေရှင်းရေးကော်မတီက ပေးပို့လာတဲ့ အစီရင်ခံစာပေါ် မူတည်ပြီး ဖားကန့်မြို့နယ်၊ ၀ါရာဇွပ် ကျေးရွာအုပ်စုအတွင်းက လယ်မြေပြဿနာတွေကို ဆက်လက် ဆောင်ရွက်သွားမယ်လို့ ယုဇနကုမ္ပဏီဒါရိုက်တာ ဦးဆန်နီက ပြောပါတယ်။
အဆိုပါ လယ်ယာပြဿနာညှိနှိုင်းဖြေရှင်းရေးကော်မတီကို လယ်သမားတွေက အယုံအကြည်မရှိကြောင်း၊ တောင်းဆိုချက်တွေ မရရှိဘူးဆိုရင် လယ်ယာမြေအရေး ဆောင်ရွက်သူတွေနဲ့ ပူးပေါင်းပြီး ဆန္ဒထုတ်ဖော်ပွဲတွေ ဆက်လက် လုပ်ဆောင်သွားမှာ ဖြစ်သလို ထွန်တုံးတိုက်ပွဲ ၀င်သွားမယ်လို့ လယ်သမားတွေက ဆိုပါတယ်။
ဒီလယ်ယာမြေတွေ ပြန်ရဖို့ ကချင်ဒေသခံတွေက မေလ (၃၀) ရက်နေ့ကလည်း ခွင့်ပြုချက်နဲ့ ပထမအကြိမ် ဆန္ဒထုတ်ဖော်ခဲ့ကြပါတယ်။
မနေ့ကတော့ ခွင့်ပြုချက်မဲ့ ဒုတိယအကြိမ် ဆန္ဒထုတ်ဖော်ခဲ့ခြင်းဖြစ်တဲ့အကြောင်း မြစ်မခ သတင်းအရ သိရပါတယ်။
No comments:
Post a Comment