ငှက်ဖျားရောဂါပိုး သယ်ဆောင်လာတဲ့ အ နော် ဖီ လီ ခြင်မ ပေါက်ပွား နှုန်းများပြားနေပြီး အဲ့ဒီခြင်ဟာ နေဝင်ချိန်ကနေ နံနက်မိုးသောက် အာရုဏ်တက် အတွင်း သွေးစုပ်ယူ လေ့ရှိတယ်လို့ ဆိုပါတယ်။
မြန်မာနိုင်ငံလို ဌက်ဖျား အဖြစ်များတဲ့ဒေသမှာ ဌက်ဖျားရောဂါ မကူးစက်အောင် ဘယ်လိုလုပ်ဆောင်ရမလဲဆိုတာကို လူအများက သိနေကြပေမယ့် လက်တွေ့မှာတော့ လိုက်နာကျင့်သုံးမှု အားနည်းနေတယ်လို့လည်း ဧရာဝတီတိုင်း ဒုတိယ တိုင်းကျန်းမာရေး ဦးစီးဌာနမှူး ဒေါက်တာ သီဟအောင်က ပြောပါတယ်။
ငှက်ဖျားရောဂါက အသက်အန္တရာယ်အထိ စိုးရိမ်ရတဲ့ရောဂါတစ်ခုဖြစ်သလို အသက်အရွယ် မရွေးဖြစ်နိုင်တဲ့အတွက် ခြင်ကိုက်မခံရအောင် ဂရုစိုက်ရမှာဖြစ်ပြီး အ၀တ်အစားထူထူရှည်ရှည် ၀တ်အိပ်တာတွေ၊ ဆေးရည်စိမ် ခြင်ထောင်ကို တောထဲသွားတဲ့အခါ ယူသွားတာတွေ လုပ်ဆောင်ရမယ်လို့လည်း အထွေထွေရောဂါကု ဆရာဝန် သန်းထိုက်က ပြောပါတယ်။
မီးခိုးမှိုင်းတိုက်တာတွေ၊ ခြင်ဆေးခွေထွန်းတာတွေက ခြင်ကိုက်မှုကို လျော့နည်းစေနိုင်ပေမယ့် အသက်ရှုလမ်းကြောင်းဆိုင်ရာ ရောဂါတွေ ဖြစ်နိုင်တယ်လို့လည်း ပြောပါတယ်။
ငှက်ဖျားရောဂါ ကူးစက်နိုင်တဲ့ ခြင်ကိုက်ခြင်း၊ ငှက်ဖျားပိုးပါတဲ့ သွေးသွင်းမိခြင်း၊ မိခင်ကနေတဆင့် သန္ဓေသားကို ကူးစက်ခြင်း စတဲ့ ရောဂါဖြစ်ပွားနိုင်မှု အခြေအနေ ၃ မျိုးရှိပေမယ့် ခြင်ကိုက်ခံရတာကြောင့် ဌက်ဖျားရောဂါ အများဆုံးဖြစ်နေရတယ်လို့လည်း သိရပါတယ်။
မြန်မာနိုင်ငံအတွင်း ငှက်ဖျားရောဂါတွေ ဆယ်စုနှစ်အတွင်း ပြန်လည်ဦးမော့လာတာ ဖြစ်ပြီး ဧရာဝတီတိုင်းမှာ ၂၀၁၂ ခုနှစ်အတွင်း ငှက်ဖျားရောဂါကြောင့် သေဆုံးသူ(၇၅)ဦးရှိပြီး ၂၀၁၃ ခုနှစ်တွင် ငှက်ဖျားရောဂါဖြစ်ပွားသူ (၂)သောင်းရှိတဲ့အနက် (၁၃)ဦး သေဆုံးခဲ့ရတယ်လို့ တိုင်းဒေသကြီး ကျန်းမာရေး ဦးစီးဌာနရဲ့ စာရင်းအရ သိရပါတယ်။
မြန်မာနိုင်ငံအတွင်း နှစ်စဉ်ငှက်ဖျားဖြစ်ပွားသူ (၆)သိန်းကျော်ရှိပြီး လူဦးရေတစ်ထောင်လောက် နှစ်စဉ်သေဆုံးနေရတဲ့အကြောင်း ကျန်းမာရေး ၀န်ကြီးဌာနက ဖော်ပြထားတယ်လို့ မြစ်မခ သတင်းအရ သိရပါတယ်။
No comments:
Post a Comment