ပုသိမ်မြို့ အမှတ် ၁၃ ရပ်ကွက် မြက်တိုရပ်ရှိ လျှပ်စစ်ဓာတ်အား ဖြန့်ဖြူးရေးဝန်ထမ်း အိမ်ရာဝင်းအတွင်း နေထိုင်သည့် လျှပ်စစ် ဌာန ၀န်ထမ်း ကိုအောင်သိန်းထွန်း (လျှပ်စစ်ကျွမ်းကျင် အဆင့် ၄) နေအိမ်တွင် နိုဝင်ဘာ ၉ ရက်က မူးယစ်ဆေးဝါးများနှင့် အတူဖမ်းဆီးမိခြင်း ဖြစ်သည်ဟု ပုသိမ်မြို့ အမှတ် ၂ ရဲစခန်းမှ စခန်းမှူး ရဲအုပ် သိန်းဇော်ဦးက ဧရာဝတီ သို့ ပြောသည်။
“မူးယစ်တပ်ဖွဲ့က သတင်းရလို့ အဲဒီအိမ်နား တ၀ိုက်မှာ အချိန်အတော်ကြာ အသွင်ယူပြီး စောင့်ဆိုင်းနေခဲ့တာပါ။ အခုကျမှ သတင်း ခိုင်မာလို့ ၀င်ရောက် ဖမ်းဆီးတာပါ။ ဒီလူတွေကလည်း ဒီနေရာမှာ ဖြန့်ဖြူးလှုပ်ရှားနေတယ်လို့ပဲ ယူဆရတယ်”ဟု ရဲအုပ် သိန်းဇော်ဦး က ပြောဆိုသည်။
ပုသိမ်အခြေစိုက် မူးယစ်အထူး တပ်ဖွဲ့ နှင့် နယ်မြေခံ အမှတ် ၂ ရဲစခန်းမှ ရဲတပ်ဖွဲ့ဝင်များက သတင်းအရ ၀င်ရောက် ရှာဖွေရာ ကိုအောင်သိန်းထွန်းနှင့် အပေါင်းပါ တဦးတို့ကို ဖမ်းဆီး ရမိခဲ့ခြင်း ဖြစ်သည်ဟု သိရသည်။
ထို့နောက် ယင်းနေအိမ်သို့ ကျူံပျော်မြို့မှ ရောက်ရှိလာသူ ၂ ဦးကိုလည်း ဆက်လက် ရှာဖွေရာတွင် စိတ်ကြွဆေးပြားများ လက် ၀ယ် တွေ့ရှိရသည့် အတွက် ၎င်းတို့ ၄ ဦးကို မူးယစ်ဆေးဝါးနှင့် စိတ်ကို ပြောင်းလဲစေသော ဆေးဝါးများဆိုင်ရာ ဥပဒေဖြင့် အရေးယူ ထားကြောင်း ရဲအုပ် သိန်းဇော်ဦးက ပြောပြသည်။
ရဲတပ်ဖွဲ့ဝင်များက လျှပ်စစ်ဝန်ထမ်း ကိုအောင်သိန်းထွန်း နေအိမ်၌ ဆက်လက် ရှာဖွေခဲ့ရာ (၈၈/၁) စာတမ်းပါ ပန်းရောင် စိတ်ကြွ ဆေးပြား တပြား အလေးချိန် (၀.၁) ဂရမ်ခန့်၊ ဂျာနယ် စက္ကူဖြင့်ထုပ်ထားသော ဆေးခြောက်ဟု ယူဆရသည့် အရွက်ခြောက် တထုပ် အလေးချိန် ၄ ဂရမ်ခန့် ရှိသည့် မူးယစ် ဆေးဝါးများ၊ ဆေးခြောက်ရှုရာတွင် အသုံးပြုသည့် သံပိုက် တပ်လျက် ကော်ဘူး တဘူးနှင့် အခြား ဆက်စပ်ပစ္စည်းများ ဖမ်းဆီးရမိသည်ဟုလည်း ဆိုသည်။
ကိုအောင်သိန်းထွန်း နေအိမ်သို့ရောက်ရှိလာသူ ၂ ဦး၏ ဂျင်းဘောင်းဘီအိတ် အတွင်းမှ အအေးသောက်ပိုက် တချောင်းတွင် ၅ ပြား စီ ထည့်သွင်းထားသည့် (၈၈/၁) စာတမ်းပါ ပန်းရောင် စိတ်ကြွဆေးပြားများပါ ပိုက် ၆ ချောင်း အတွင်းမှ ဆေးပြား၃၀ ၊ အလေးချိန် ၃ ဂရမ်ခန့် ရှိသည့် မူးယစ်ဆေးဝါးများကိုလည်း ဖမ်းဆီးရမိခဲ့ကြောင်း သိရသည်။
အမှုနှင့် ပတ်သက်၍ မူးယစ် အထူးတပ်ဖွဲ့မှ ဒုရဲအုပ် သန်းဝင်းရွှေက တရားလို ပြုလုပ်ပြီး ကိုအောင်သိန်းထွန်းပါ ၄ ဦးအား ပုသိမ်မြို့ အမှတ် ၂ ရဲစခန်း၌ မူးယစ် ပြစ်မှုနံပါတ် ၂/၂၀၁၄၊ မူးယစ်ဆေးဝါးနှင့် စိတ်ကို ပြောင်းလဲစေသော ဆေးဝါးများဆိုင်ရာ ဥပဒေ ပုဒ်မ ၁၅၊ ၁၆ (ဂ)၊ ၂၀ (က)၊ ၂၁ တို့ဖြင့် အမှုဖွင့် အရေးယူထားသည်။
ထိုအမှုနှင့် ဆက်စပ်ပြီး ပုသိမ်မြို့နှင့် ကျူံပျော် မြို့နယ်တို့မှ မူးယစ်ဆေးဝါးများ ပင်မဖြန့်ချိ ရောင်းချနေသူများကို ဖော်ထုတ် အရေးယူနိုင်ရန် ပုသိမ်အခြေစိုက် မူးယစ်အထူး တပ်ဖွဲ့က ဆက်လက်ဆောင်ရွက်နေကြောင်း သိရသည်။
No comments:
Post a Comment