မြန်မာနိုင်ငံတွင် အသက် ၁၈ နှစ်ပြည့်ပြီးသူတိုင်း လာမည့် ရွှေးကောက်ပွဲတွင် မဲထည့်နိုင်ရန်အတွက် နိုင်ငံသား အသိအမှတ်ပြု ကတ် တမျိုးမျိုး ရရှိအောင် စီစဉ်ဆောင်ရွက်ပေးနေကြောင်း မောင်တော လ၀ကမှ ၀န်ထမ်း တဦးက ပြောသည်။မြန်မာနိုင်ငံ လူဝင်မူကြီးကြပ်ရေး ဦးစီးဌာနမှ လက်ရှိ မြန်မာနိုင်ငံတွင် နိုင်ငံသား အသိအမှတ်ပြု ကတ်အမျိုးအစား ၅ ခုကို ထုတ်ပေးနေပြီး အဆိုကတ်များမှာ နိုင်ငံသား စိစစ်ရေးကတ်၊ အမျိုးသား မှတ်ပုံတင်ကတ်၊ ဧည့်နိုင်ငံသား ကတ်၊ ပြုနိုင်ငံသားကတ်နှင့် ယာယီသက်သေခံ ကတ်တို့ ဖြစ်ကြ သည်။
အဆိုပါ ကတ်များကို အောက်တိုဘာလ ၃၁ ရက်နေ့ထိ အသက် ၁၈ နှစ်ပြည့်ပြီးသူတိုင်းကို ထုတ်ပေး သွားမည်ဖြစ်ကြောင်း သူက ပြောဆိုသည်။
အမျိုးသား မှတ်ပုံတင်ကတ် (သို့မဟုတ်) ယာယီ သက်သေခံ လက်မှတ်များကိုလည်း နိုင်ငံသား စိစစ်ရေး ကတ်ပြားများ အဖြစ် ပြောင်းလဲ ထုတ်ပေးခြင်းနှင့် သွေးနှော တိုင်းရင်းသားများ အတွက်လည်း အသိအမှတ် ပြုကတ် တမျိုးမျိုးကို ထုတ်ပေးနေကြောင်း သူက ပြောသည်။
ထိုကဲ့သို့ ထုတ်ပေးခြင်းကို ကျေးရွာနှင့် ရပ်ကွက် အတွင်းရှိ ရယက အဖွဲ့ဝင်များ၏ ထောက်ခံချက်များနှင့် နိုင်ငံသား ကတ်မရှိ သူများကို စိစစ် ထုတ်ပေးနေကြောင်း သိရသည်။
သို့သော်လည်း ဘူးသီးတောင်နှင့် မောင်တော မြို့နယ်ရှိ မူဆလင်များကိုမူ ယခင်က အဖြူရောင် ယာယီသက်သေခံ လက်မှတ် ကတ်ပြားများကို ထုတ်ပေးထားသော်လည်း ယခုအချိန်ထိ တခြား အသစ် ကတ်ပြားများ ပြောင်းလဲ ထုတ်ပေးခြင်း မရှိသေးကြောင်း သိရသည်။
အဆိုပါ ဒေသများတွင် ထုတ်ပေးသော အဖြူရောင် ကတ်ပြားတွင် လူမျိုးနှင့် ဘာသာကို ဖေါ်ပြရာတွင် လူမျိုးကို မူဆလင်၊ ဘာသာ အစ္စလာမ်ဟု ရေးထိုး ဖေါ်ပြပြီး ကျော့ဘက် အောက်ဆုံးတွင် “ ဤကတ်ပြားသည် မည်သည့်နိုင်ငံသားဟု သက်သေခံခြင်း အလျဉ်း မရှိစေရ” ဟု ပါရှိသည်။
မောင်တော ဈေးကြီးမှ ဈေးဆိုင်ပိုင်ရှင် တဦးက “ မောင်တောနဲ့ ဘူးသီးတောင် မြို့နယ်တွေမှာ နေထိုင်နေတဲ့ အစ္စလာမ် ဘာသာဝင် ကျွန်တော်တို့ကို ခုထုတ်ပေးထားတဲ့ အဖြူရောင် ကတ်တွေထက် အဆင့်မြင့်တဲ့ ပန်းနုရောင် ကတ်တမျိုးကို ထုတ်ပေးမယ်ဆိုပီး ဒုဝန်ကြီး ဖုန်းဆွေ လာတုန်းက ပြောသွားပါတယ်။ ခုချိန်ထိတော့ ဘာမှ ထုတ်မပေးသေးပါဘူး။ ကျွန်တော်တို့လည်း အဲဒီ ကတ်အသစ်ကို မျှော်နေကြပါတယ်” ဟု ပြောသည်။
ယခုလာမည့် ရွှေးကောက်ပွဲတွင် ဘူးသီးတောင်နှင့် မောင်တောရှိ အစ္စလာမ်ဘာသာဝင်များလည်း မဲပေးခွင့်ရရှိကြမည် ဖြစ်ရာ သူတို့ကို စည်းရုံးသည့် အနေဖြင့် စစ်အစိုးရ အာဏာပိုင်များက ယခင် အဖြူရောင် ကတ်ထက် အဆင့်မြင့်သည့် တခြား ကတ်ပြား အသစ်တမျိုးကို ထုတ်ပေးရန် စီစဉ်နေကြောင်း သိရသည်။
No comments:
Post a Comment