ပဲခူးတိုင်း ဝေါမြို့နယ် ညောင်ကိုင်းကျေးရွာမှ လယ်သမားတွေကို အစိုးရ မြန်မာ့လယ်ယာဖွံ့ဖြိုးရေးဘဏ်က ပြီးခဲ့တဲ့လ ၂၉ ရက်နေ့က စိုက်ပျိုးစရိတ်ချေးငွေ ထုတ်ပေးတဲ့အခါမှာ ဘဏ်ဝန်ထမ်းတွေနဲ့ ကျေးရွာ ယရက အာဏာပိုင်တွေ ပေါင်းပြီး ငွေတွေ ဖြတ်ယူနေပါတယ်။
မနေ့က ထုတ်ချေးတဲ့အခါမှာ ဓာတ်မြေသြဇာအတွက် ကျပ် ၁၈ဝဝဝ၊ လချေးကျောက်မှုန့်အတွက် ကျပ် ၃ဝဝဝ၊ စာရွက်စာတမ်းဖိုး ၂၅ဝဝ ကျပ် ဖြတ်တယ်။ အားလုံးပေါင်း ၂၃၅ဝဝ ကျပ် ဖြတ်ယူဖို့ ညောင်ကိုင်းကျေးရွာ ဥက္ကဋ္ဌ ဦးအေးလွင်က ငွေထုတ်တဲ့အချိန်မှာ ထိုင်ပြီးတော့ ဘဏ်ဝန်ထမ်းတွေကို ပြောတာပါ။
မနှစ်ကကျတော့ စာရွက်စာတမ်းဖိုးဆိုပြီး ကျပ် ၃ဝဝဝ ဖြတ်ခဲ့ပါတယ်။ ဒီနှစ်ပိုတာက ဓာတ်မြေသြဇာ တအိတ်၊ သဘာဝ လချေးကျောက်မှုန့် တအိတ် ဆိုပြီး ပိုဖြတ်လာတာပါ။ အဲဒီအမှုန့်ကို မသုံးချင်တဲ့ လူလည်း မသုံးချင်ဘူး။ မယူဘူးဆိုလည်း မရဘူး။ နောက်ပြီးတော့ ချက်ချင်းရတာလည်း မဟုတ်ဘူး။ ဘယ်ကုမ္ပဏီက ထုတ်တယ်ဆိုတာလည်း မသိသေးပါဘူး။ ကြိုပြီး ဖြတ်လိုက်တာပါ။
ဒါ့အပြင် ၂၇ ရက်နေ့တုန်းကလည်း အဲဒီ ယရက ဥက္ကဋ္ဌ ဦးအေးလွင်က သီးစားခ ပြေစာအတွက်ဆိုပြီး လယ်သမားတယောက်ကို ၃ဝဝဝ ကျပ်စီ ဖြတ်ယူခဲ့ပါတယ်။ ဒါကြောင့် ကျနော်တို့ ဝေါမြို့နယ် မယက ရုံးကို တိုင်ကြားပေမယ့် လုပ်ပေးပါ့မယ်၊ ဘာညာဆိုပြီးတော့ အခုထိ လုပ်မပေးပါဘူး။
လယ်သမားတွေကို အစိုးရက စိုက်ပျိုးစရိတ်ချေးငွေဆိုပြီး တဧက ၂ သောင်းနှုန်း ထုတ်ချေးပေးပါတယ်။ ဒါပေမဲ့ ၁ဝ ဧက ကျော်တဲ့ တောင်သူတွေကိုလည်း ၂ သိန်းပဲ ချေးပေးပါတယ်။ ဒီချေးငွေက မလုံလောက်ပါဘူး။ စိုက်ပျိုးတဲ့ အချိန်ကနေ ရိတ်သိမ်းတဲ့အချိန်ထိဆိုရင် တဧကကို ကျပ် ၁ သိန်း ၁ သောင်းလောက် ကုန်ကျပါတယ်။
ကျနော်တို့ ညောင်ကိုင်းကျေးရွာမှာ လယ်သမားစုစုပေါင်း ၃၈၈ ဦး ရှိပါတယ်။
အထက်လူကြီးတွေ သိစေဖို့ ကျနော်တို့ ပြောပြတာပါခင်ဗျာ။
လယ်သမားအချို့
ညောင်ကိုင်းကျေးရွာ
ဝေါမြို့နယ်၊ ပဲခူးတိုင်း။
No comments:
Post a Comment