နော်နိုရင်း
ကရင်ပြည်နယ် မြဝတီတောင်ကြောလမ်းအတွင်း အမည်မသိသေနတ်သမားတဦး ပစ်ခတ်မှုကြောင့် အစိုးရတပ်ရဲဘော်တဦးနဲ့ အရပ်သားဆိုင်ကယ်သမားတဦး သေဆုံးသွားပါတယ်။
မြဝတီ- ကော့ကရိတ် တောင်ကြေားလမ်းက အောက်ဗိုလ်တဲနဲ့ အလယ် ဗိုလ်တဲအကြားမှာ အမည်မသိ သေနတ်သမားတယောက်က ဆိုင်ကယ်သမားတဦးနဲ့ အစိုးရတပ်ရဲဘော်တဦးကို ပစ်ခတ်မှုခဲ့ပွားတာပါ။
ဒီပစ်ခတ်မှုအတွင်း အဲဒီ ရဲဘော်နဲ့ ဆိုင်ကယ်သမား နှစ်ဦးစလုံး ဒဏ်ရာပြင်ထန်ပြီး သေဆုံးသွားတယ်လို့ ဒီနေ့ ဘားအံကနေ မြဝတီကို ပြန်လာတဲ့ ခရီးသည်တဦးက ပြောပါတယ်။
“ကျနော်တို့ မြဝတီတောင်ပေါ်လမ်း အောက်ဗိုလ်တဲအကျော် ကွေ့အကျော်လေးမှာ အလယ်ဗိ်ုလ်တဲ မရောက်ခင်လေးမှာ ဘယ်သူလဲတော့ အတိအကျ ပြောမရဘူး။ လုံချည်လေးခြုံပြီးတော့ အသာလေး တက်သွားချိန်မှာ ဆိုင်ကယ်သမားတယောက်နဲ့ စစ်သားတယောက်ကို လှည့်ပြီးပစ်သွားလိုက်တာ။ တိုက်ပွဲပုံစံမဟုတ်ဘူး။ လုပ်ကြံလိုက်တဲ့ပုံစံပေါ့။ ခရီးသွားဟန်လွဲပုံစံနဲ့ ပစ်သွားတာ။ ဝါးနဲ့တားတဲ့ ဝါးတားဂိတ်ကို ကျော်သွားပြီးတော့မှ အဲဒီနောက်မှာမှ ဆိုင်ကယ်တစီးက ရောက်လာတယ်။ အဲဒီအချိန်မှာ စစ်သားက ထွက်တားတယ်။ အဲဒီစစ်သားက ဆိုင်ကယ်မှာ အာရုံရောက်နေချိန်မှာ အဲဒီလုံချည်ခြုံထားတဲ့လူက လှည့်ပစ်လိုက်တာ။ ဆိုင်ကယ်သမားတယောက်ကော သေသွားတယ်။ အခုတော့ အေးအေးဆေးဆေး ပြန်တက်လို့ရပြီ။”
နေ့ခင်း ၁၂ နာရီလောက်မှာ ပစ်ခတ်မှုဖြစ်ပွားခဲ့တာဖြစ်ပြီး သေနတ်ကိုင်ဆောင် ပစ်သတ်သူဟာ မည်သူမည်ဝါဆိုတာကိုလည်း မသိရသလို ပစ်ခတ်ပြီး ထွက်ပြေးသွားတာကြောင့် ဖမ်းဆီးရမိခြင်း မရှိဘူးလို့ အဲဒီခရီးသည်က ပြောပါတယ်။
ဒီနေ့ဟာ ဘားအံ-ကောကရိတ်ကနေ မြဝတီကို တက်တဲ့နေ့ဖြစ်တာကြောင့် ဒီလိုပစ်ခတ်မှုဖြစ်ပွားခဲ့တဲ့အတွက် အောက်ဗိုလ်တဲမှာ ကားအစီးပေါင်း ၅၀ ကျော် ခေတ္တာ ရပ်ဆိုင်း မှု ဖြစ်ပွားခဲ့ပါတယ်။ ဒါပေမယ့် ညနေပိုင်းမှာတော့ ကားတွေကိုမြဝတီဘက် ပြန်တက်ခွင့် ပေးခဲ့တယ်လို့ အဲဒီ ခရီးသည်ကပဲ ပြောပါတယ်။
မနေ့ကလည်း ဒီကေဘီအေ ဗိုလ်ကျော်သက်ဦးဆောင်တဲ့အဖွဲ့က ကောကရိတ်မြို့အဝင် တဲသုံးလုံးအနီးမှာ ဆက်ကြေးငွေကောက်ခံတဲ့အတွက် အစိုးရတပ်ဘက်က သူတို့ကို လက်နက်ကြီးတွေနဲ့လှမ်ပြီး ပစ်ခတ်ခဲ့လို့ အပြန်လှန် လက်နက်ကြီးနဲ့ ပစ်ခတ်မှု ဖြစ်ပွားခဲ့ပါတယ်။
မနေ့က ဖြစ်တဲ့တိုက်ပွဲအတွင်း ထိခိုက်ကျဆုံးမှု အသေးစိတ်ကို မသိရသေးပေမယ့် မြဝတီမြို့ခံတွေရဲ့ ပြောဆိုချက်အရ တိုက်ပွဲအတွင်း ဗိုလ်မှူးကြီးကျော်သက်တို့အဖွဲ့က ၄ ဦး ကျဆုံးခဲ့လို့ သိရပါတယ်။
No comments:
Post a Comment