မြန်မာ နိုင်ငံအပေါ် အနောက် နိုင်ငံ များ၏ ပိတ်ဆို့ အရေး ယူမှု၊ ယင်း ပိတ်ဆို့ မှုများ လျှော့ချ၊ ရုပ်သိမ်း ရာတွင် ဒေါ်အောင်ဆန်း စုကြည် ၏ အခန်း ကဏ္ဍ တို့နှင့် ပတ်သက်၍ နေပြည်တော် ထိပ်ပိုင်း ခေါင်းဆောင်များ အတွင်း အပြင်း အထန် ဆွေးနွေး ငြင်းခုန် နေကြကြောင်း နီးစပ်သည့် အသိုင်း အဝန်း များမှ သိရှိ ရသည်။
အမေရိကန် အထက်လွှတ်တော်အမတ် ဂျွန်မက်ကိန်း၏ ခရီးစဉ်မတိုင်မီနှင့် ခရီးစဉ်အပြီး ကာလနှစ်ခုစလုံးတွင် အဖွဲ့ဝင် ၁၁ ဦးပါ အမျိုး သား ကာကွယ်ရေးနှင့် လုံခြုံရေးကောင်စီ (NDSC) အတွင်း အငြင်းပွားမှုများ ပေါ်ပေါက်နေခြင်းဖြစ်သည်။
NDSC တွင် သမ္မတ ဦးသိန်းစိန်၊ ဒုသမ္မတများဖြစ်သော ဦးတင်အောင်မြင့်ဦးနှင့် ဒေါက်တာ စိုင်းမောက်ခမ်း၊ ပြည်သူ့ လွှတ်တော် ဥက္ကဋ္ဌ ဦးရွှေမန်း၊ အမျိုးသားလွှတ်တော် ဥက္ကဋ္ဌ ဦးခင်အောင်မြင့်၊ ကာကွယ်ရေးဦးစီးချုပ် ဗိုလ်ချုပ်ကြီး မင်းအောင်လှိုင်၊ ဒု ကာကွယ်ရေးဦးစီးချုပ် ဗိုလ်ချုပ်ကြီး စိုးဝင်း၊ ကာကွယ်ရေးဝန်ကြီး ဗိုလ်ချုပ် လှမင်း၊ နိုင်ငံခြားရေးဝန်ကြီး ဦးဝဏ္ဏမောင်လွင်၊ ပြည်ထဲရေးဝန်ကြီး ဒုဗိုလ်ချုပ်ကြီး ကိုကိုနှင့် နယ်စပ်ရေးရာဝန်ကြီး ဗိုလ်ချုပ် သိန်းဌေးတို့ ပါဝင်သည်။
ယင်းအဖွဲ့က နိုင်ငံတော်၏ ထိပ်တန်းဦးစားပေး ကိစ္စရပ်များ၊ နိုင်ငံတော် လုံခြုံရေး၊ စီးပွားရေးနှင့် ဒီမိုကရေစီ အသွင်ပြောင်းရေး ကိစ္စများ ကို အဆုံးအဖြတ်ပေးသည်။
ပိတ်ဆို့အရေးယူမှုကို ထောက်ခံခဲ့သူ မစ္စတာ မက်ကိန်းက အမေရိကန်၏ ပိတ်ဆို့မှု ရုပ်သိမ်းရေး စဉ်းစားမှုကို လာမည့် ဧပြီ ကြားဖြတ် ရွေးကောက်ပွဲ လွတ်လပ်ပြီး တရားမျှတမှု ရှိမရှိအထိ စောင့်ကြည့်ရန် မကြာသေးမီက မြန်မာပြည် ခရီးစဉ်အတွင်း ပြောဆိုခဲ့သည်။
“လွတ်လပ်ပြီး တရားမျှတတဲ့ ရွေးကောက်ပွဲ ဖြစ်မယ်ဆိုရင် ပိတ်ဆို့မှု ရုပ်သိမ်းရေး တခြားနိုင်ငံတွေနဲ့ ပူးပေါင်းလုပ်ဆောင်ဖို့ ပြဿနာ မရှိ နိုင်ပါဘူး” ဟု မစ္စတာ မက်ကိန်းက ပြောဆိုခဲ့သည်။
သို့သော် ၎င်းအနေဖြင့် ဒွိဟအနည်းငယ်ရှိနေကြောင်းနှင့် ဖြစ်စဉ်တလျှောက် အပြုသဘောဖြင့် စောင့်ကြည့်ရန် ကြိုးစား သွားမည်ဖြစ် ကြောင်းလည်း ပြောသည်။
သမ္မတ ဦးသိန်းစိန်နှင့် တွေ့ဆုံရာတွင် အမျိုးသားဒီမိုကရေစီအဖွဲ့ချုပ်အနေဖြင့် အမတ်နေရာ ၄၈ နေရာစလုံး၌ ဝင်ရောက်ယှဉ်ပြိုင်မည့် ကြားဖြတ်ရွေးကောက်ပွဲ၌ နိုင်ငံတကာ လေ့လာစောင့်ကြည့်သူများကို ခွင့်ပြုရန် တိုက်တွန်းခဲ့ကြောင်း၊ သမ္မတ ဦးသိန်းစိန်က တစုံတရာ မှတ်ချက်ပေးခြင်း မရှိကြောင်း ဇန်နဝါရီလ ၂၂ ရက်နေ့က ဒေါ်အောင်ဆန်းစုကြည် နေအိမ်တွင် ပြုလုပ်သော သတင်းစာရှင်းလင်းပွဲတွင် မစ္စတာ မက်ကိန်းက ပြောသွားသည်။
မစ္စတာ မက်ကိန်းက ကျန်ရှိနေသေးသည့် နိုင်ငံရေးအကျဉ်းသားများကို လွှတ်ပေးရန်နှင့် နိုင်ငံတကာကြက်ခြေနီအဖွဲ့ကို အကျဉ်းထောင် များသို့ ဝင်ရောက်စစ်ဆေးခွင့်ပြုရန်လည်း သမ္မတ ဦးသိန်းစိန် အစိုးရကို တိုက်တွန်းခဲ့သည်။
“အံ့သြလောက် စရာတွေ ဖြစ်လာဖို့ ကျနော်တို့ မမျှော်လင့် ပါဘူး။ လမ်းကြောင်း မှန်အတိုင်း တိုးတက်ဖြစ် ထွန်းနေ ဖို့ပဲ ကျနော်တို့ မျှော် လင့် ပါတယ်” ဟု မစ္စတာ မက်ကိန်းက သတင်းစာ ရှင်းလင်း ပွဲတွင် ပြောသည်။
မြန်မာ နိုင်ငံ အပေါ် ပိတ်ဆို့ အရေးယူ မှုများ ဖြေလျှော့ ပေးစေ လိုပြီး တဖြည်းဖြည်း ရုပ်သိမ်း သွားစေ လိုကြောင်း သမ္မတ ဦးသိန်းစိန်က မကြာ သေးမီက ဝါရှင်တန် ပို့စ် သတင်း စာနှင့် တွေ့ဆုံ မေးမြန်း ခန်းတွင် ပြောဆို ခဲ့သည်။
“ပိတ်ဆို့ အရေးယူ မှုတွေ ဆိုတာ အစိုးရကို ထိသွား စေဖို့ ရည်ရွယ် တာပဲ။ တကယ် မှာက ပြည်သူ့ အကျိုး စီးပွား ကိုသာ သွားထိတယ်။ အရင် အစိုးရ အပေါ် ဘာမှ သက်ရောက်မှု မရှိခဲ့ဘူး။ လမ်းပြ မြေပုံ အဆင့်ဆင့် ကြောင့်သာ နိုင်ငံ အတွက် ဒီမိုကရေစီ စနစ်ကို လွှဲပြောင်း ပေးနိုင် ခဲ့တယ်” ဟု သမ္မတ ဦးသိန်းစိန်က ဝါရှင်တန် ပို့စ်သို့ ဖြေကြား သွားသည်။
မစ္စတာ မက်ကိန်း ခရီးစဉ်တွင် လိုက်ပါ လာသူ အမေရိကန် အထက် လွှတ်တော် အမတ် မစ္စတာ ဂျိုးဇက် လီဘာမန်က ဒေါ်အောင်ဆန်း စုကြည်၏ တုံ့ပြန် မှုသည် မြန်မာ နိုင်ငံနှင့် ပတ်သက်၍ ၎င်းတို့၏ လုပ်ဆောင်ချက် အပေါ် များစွာ အကျိုး သက်ရောက်မှု ရှိနိုင်ကြောင်း၊ သို့သော် ယုံကြည် သောကြောင့် ဒေါ်အောင်ဆန်း စုကြည်ကို အစစ အရာရာ အလုံးစုံ ဆုံးဖြတ်ခွင့် ပေးနေ သည်ဟု မဆို လိုကြောင်း၊ မြန်မာ ပြည်တွင် ပြောင်းလဲ မှုများ ဖြစ်ပေါ် လာသည်ဟု ၎င်းတို့ ယုံကြည်လာ သောအခါ ရလဒ် အနေဖြင့် ပိတ်ဆို့မှု များကို ဖယ်ရှားပြီး မြန်မာ အစိုးရ နှင့် ပိုမို နီးစပ် လာမည်ဖြစ်ကြောင်း ပြောသည်။
ဝါရှင်တန်ပို့စ် သတင်း စာနှင့် တွေ့ဆုံ မေးမြန်း ခန်းတွင် ဒေါ်အောင်ဆန်း စုကြည် ကလည်း အမေရိကန်က ချမှတ်ထားသော စီးပွားရေး ပိတ်ဆို့ မှုများ ရုပ်သိမ်း ရေးသည် တောင်းဆို ထားသော အချက် အလက်များ ဖြစ်ပေါ်လာလျှင် အလို အလျောက် ရုပ်သိမ်း သွားမည် ဖြစ်ကြောင်း မှတ်ချက် ပေးထား သည်။
“အချိန်ကျတယ်လို့ သူတို့ (အမေရိကန် အစိုးရ) က ယူဆရင် ပိတ်ဆို့အရေးယူမှုတွေ ရုပ်သွားပါလိမ့်မယ်။ ပိတ်ဆို့အရေးယူမှု ဖယ်ရှားဖို့ ဘာတွေလုပ်ဆောင်ပေးဖို့ လိုတယ်ဆိုတာကို အမေရိကန်က သေချာ ရှင်းရှင်းလင်းလင်း ချမှတ်ပြီးသား ဖြစ်ပါတယ်။ ဒီ (သမ္မတ ဦးသိန်း စိန်) အစိုးရအနေနဲ့ ပိတ်ဆို့မှု ရုပ်သိမ်းစေချင်ရင် သူတို့က ကြိုးစားပြီးတော့ လုပ်စရာရှိတာတွေ လုပ်ပြဖို့ လိုပါလိမ့်မယ်” ဟု ဒေါ်အောင် ဆန်းစုကြည်က ပြောသည်။
ယင်းသို့ ဒေါ်အောင်ဆန်း စုကြည်၏ ပြောကြား ချက်ကြောင့် နေပြည်တော်အသိုင်းအဝန်းတွင် သံသယနှင့် စိုးရိမ်မှုများ တိုးမြင့် လာခြင်း ဖြစ်ကြောင်း နေပြည်တော်နှင့် နီးစပ်သည့် သတင်းရပ်ကွက်က ဆိုသည်။ NDSC အဖွဲ့ဝင်တချို့က အဆိုပါ ပြောဆိုချက်များကို ကိုးကား၍ ဒေါ်အောင်ဆန်းစုကြည်ကို အပြောင်းအလဲမရှိသူ၊ မယုံရသူဟု ဝေဖန်နေပြီး သမ္မတဦးသိန်းစိန်ကိုလည်း ဒေါ်အောင်ဆန်းစုကြည်နှင့် ယ မန် နှစ် သြဂုတ်လက နေပြည်တော်၌ တွေ့ဆုံခဲ့သည့် အပေါ် ဝေဖန်နေကြောင်း သိရရှိသည်။
ဥရောပသမဂ္ဂ၏ ပိတ်ဆို့အရေးယူမှုမှာမူ အမေရိကန်လောက် မတင်းကျပ်ဘဲ ယခုအခါတွင် ပထမအဆင့်အနေဖြင့် သမ္မတ ဦးသိန်းစိန်နှင့် အစိုးရအဖွဲ့ကို ခရီးသွားလာခွင့် ဖွင့်ပေးခဲ့ပြီးဖြစ်သည်။ ဂျာမနီ၊ ပြင်သစ်တို့ကဲ့သို့သော ဥရောပသမဂ္ဂဝင် နိုင်ငံတချို့သည် မြန်မာ နိုင်ငံ အ ပေါ် ပိတ်ဆို့အရေးယူမှုနှင့်ပတ်သက်၍ သဘောထား ပျော့ပြောင်းသည့် နိုင်ငံများဖြစ်သည်။
နေပြည်တော် အစိုးရအသိုင်းအဝန်းမှလာသော သတင်းများအရ သမ္မတ ဦးသိန်းစိန်အစိုးရသည် ဥရောပသမဂ္ဂ၏ ပိတ်ဆို့အရေးယူမှုများ တဖြည်းဖြည်းမှ ရုပ်သိမ်းနိုင်မည်ဆိုသည့် မူဝါဒသဘောကို နားလည်ကြောင်း၊ သို့သော် ခရီးသွားလာခွင့် ပြန်လည်ဖွင့်ပေးခြင်းသည် ၎င်း တို့ အလိုရှိသော ဦးစားပေး ကိစ္စမျိုး မဟုတ်ကြောင်း၊ မြန်မာပြည်တွင် ရင်းနှီးမြှုပ်နှံမှုများ ပြုလုပ်မည့်အပေါ် ကန့်သတ်ချက်များ၊ အ နောက် နိုင်ငံ များမှ ငွေလွှဲပြောင်းမှုများအပေါ် ထိန်းချုပ်မှုများကသာ သမ္မတဦးသိန်းစိန်အစိုးရ၏ ဦးစားပေးလိုလားသည့်ကိစ္စဖြစ်ကြောင်း သိရှိရသည်။
No comments:
Post a Comment