ကွန်းချမ်း
ငြိမ်းချမ်းရေးနှင့် ပွင့်လင်း လူ့အဖွဲ့အစည်း ဖော်ဆောင်ရေးအတွက် ၈၈ မျိုးဆက်ကျောင်းသားများ၏ မွန်ပြည်နယ် ဗုဒ္ဓဟူးနေ့ နောက်ဆုံး ရက် ခရီးစဉ်ကို ဖျက်သိမ်းလိုက်ရကြောင်း ခရီးစဉ် စီစဉ်သူ ပွင့်လင်းကွန်ယက် (မွန်ပြည်နယ်) က ပြောသည်။
ပယ်ဖျက်လိုက်ရသည့် ခရီးစဉ်မှာ ကရင်ပြည်နယ်၊ ဘားအံမြို့နယ် ခရီးစဉ် ဖြစ်ပြီး တာဝန်ခံ ၃ ဦးအား ကရင်ပြည်နယ် အစိုးရက ခေါ်ယူ တွေ့ဆုံပြီးနောက်တွင် ခရီးစဉ်ကို ဖျက်သိမ်းလိုက်ရခြင်း ဖြစ်သည်။
“ကရင်ပြည်နယ် ဝန်ကြီးချုပ် အပါအဝင် ဥပဒေချုပ်၊ စစ်ဘက်ရေးရာ အရာရှိ၊ ထောက်လှမ်းရေး အ ကုန်လုံးတွေက (ဘားအံခရီးစဉ်တာဝန်ခံ အဖွဲ့ကို) ခေါ်တွေ့ပြီးတော့ ပြောဆိုတဲ့အပေါ်မှာ ဆက်လုပ်လို့ အဆင်မပြေဘူး ဆိုတဲ့ အတွက် ဘားအံ ခရီးစဉ်ကို ဖျက်လိုက်ရတယ်” ဟု ပွင့် လင်းကွန်ရက် (မွန်ပြည်နယ်) ၏ ပြန်ကြားရေးနှင့် ဆက်သွယ်ရေး တာဝန်ခံ ကိုကြည်ဇော်လွင် က မဇ္ဈိမကို ပြောသည်။
၈၈ မျိုးဆက် ကျောင်းသားများ၏ ဘားအံ ခရီးစဉ်ကို မိမိတို့ အနေနှင့် ဟန့်တားမှု မပြုသော်လည်းသဘောမကျကြောင်း၊တာဝန်မယူ ကြောင်း စသည်တို့ကို ကရင်ပြည်နယ် အစိုးရအဖွဲ့က ပြောဆိုခဲ့သည်ဟု ဆိုသည်။
ဘားအံမြို့ ကြားတောရကျောင်းတွင် လူထုနှင့် တွေ့ဆုံကာ ယဉ်ကျေးမှုဝန်ကြီးဌာန ရှေးဟောင်းသုတေသန ဦးစီးဌာနမှ ထိန်းသိမ်းထား သည့် ကော့ဂွန်းဂူသို့ သွားရောက် လေ့လာရန် စီစဉ်ထားခဲ့သည်။
“၈၈ ကလည်း ကရင်ပြည်နယ် သက်သက်သွားဖို့ အစီအစဉ် ရှိတယ်။ ဒါပေမယ့် ဟိုဘက် (ဘားအံ) က လုပ်တဲ့ လူတွေလည်း ကျနော်တို့နဲ့ ရင်း နှီးတယ်။ ဘားအံကနေ သထုံဘက် ပတ်ပြန်လို့ ရတယ်ပေါ့။ အဆင်ပြေလို့ ရှိရင် ဘားအံကို ဝင်လာပေးပါ။ သူတို့ စီစဉ်ထားပေးပါ့မယ် ဆို တော့ ကျနော်ကလည်း ဘားအံကို အစီအစဉ်မှာရေးဆွဲထားတယ်” ဟု ကိုကြည် ဇော်လွင် က ပြောသည်။
ခရီးစဉ် ဖျက်သိမ်းကြောင်း အင်္ဂါနေ့တွင် သိရှိပြီးနောက် ၈၈ ကျောင်းသားအဖွဲ့သည် လေ့လာရေးခရီးအဖြစ် မုဒုံမြို့ အနောက်ဘက်သုံးမိုင် အကွာရှိ ကော့ပရံကျေးရွာသို့ ထွက်ခွာခဲ့သည်ဟု ဆိုသည်။ ကော့ပရံကျေးရွာတွင်ရှေးဟောင်းပစ္စည်း မြောက်များစွာ စုစည်းထိန်းသိမ်း ထား သည့် မွန်ရှေးဟောင်းကျေးရွာ သမိုင်းပြတိုက်တခု ရှိပြီး ကိုမင်းကိုနိုင် ၏ မိခင် ဇာတိရွာလည်း ဖြစ်သည်။
ခရီးစဉ်တလျှောက် လူထုတွေ့ဆုံဆွေးနွေးပွဲတွင် ပြည်သူများက ၎င်းတို့ နိစ္စဓူဝ ကြုံတွေ့နေရသည့် ပြဿနာများကို တင်ပြခဲ့ပြီး အများစုမှာ လယ်ယာမြေ အသိမ်းခံရသည့် ပြဿနာများ ဖြစ်ကြောင်း ခရီးစဉ် အစအဆုံး လိုက်ပါခဲ့သည့် ပွင့်လင်းကွန်ရက်မှ ကိုမင်းမင်းလတ် က ပြော သည်။
“သူတို့ ဒေသတွင်း ကြုံနေရတဲ့ နေ့စဉ်ပြဿနာ တရွာနဲ့ တရွာ၊ တမြို့နဲ့ တမြို့ မတူကြဘူး။ အများစု ကတော့ လယ်သိမ်းမြေသိမ်းယာ သိမ်း ကိစ္စတွေ တင်ပြကြတယ်” ဟု သူက ပြော သည်။
မွန်လူ့အခွင့်အရေး ဖောင်ဒေးရှင်း HURFOM ၏ မှတ်တမ်းအရ မွန်ပြည်နယ် ရေး၊ သံဖြူဇရပ်၊ ကျိုက်မရောမြို့နယ်နှင့် တနင်္သာရီတိုင်း ရေ ဖြူမြို့နယ်တို့၌ တပ်အသစ် ချရန်နှင့် တပ်တွင်းစီးပွားရေးအတွက် မြေယာသိမ်းမှုသည် ၂ဝဝဝ-၂ဝဝ၅ ခုနှစ်ကာလတွင် အဆိုးဆုံးအခြေ အနေ ဖြစ် ပြီး ယနေ့အထိ အနည်းဆုံး မြေဧကပေါင်း ၂ဝ,ဝဝဝ ကျော်ကို သိမ်းဆည်းခဲ့ကြောင်း သိရသည်။
ရေးမြို့ခရီးစဉ်တွင် ပြည်သူများက ရေးလမ်းတံတား ပျက်စီးနေရသည့် ပြဿနာများကို တင်ပြခဲ့ပြီး ကျိုက်ထိုခရီးစဉ်တွင်ကျိုက်ထီးရိုး တောင် ပေါ်မှ ဈေးဆိုင်ရှင်နှင့် ဈေးသည်များက ၎င်းတို့ ကြုံတွေ့နေရသည့် ဆိုင်ခန်းပြဿနာ ကို တင်ပြကြသည်ဟု ဆိုသည်။
မွန်ပြည်နယ် ခရီးစဉ်တလျှောက်တွင် ၈၈ မျိုးဆက် ကျောင်းသားများအား လူထုက သောင်းသောင်းဖျဖျ ကြိုဆိုကြပြီးအောင်မြင်သည့်ခရီး စဉ် တခုအဖြစ် ရှုမြင်ကြောင်း ကိုမင်းမင်းလတ် က ပြောသည်။
၈၈ မျိုးဆက် ကျောင်းသားများသည် ဗုဒ္ဓဟူးနေ့ ညတွင် ရန်ကုန်သို့ ပြန်ကြမည် ဖြစ်ပြီး နိုဝင်ဘာလ ၂၂ ရက်နေ့မှ ၂၇ ရက်နေ့ထိ မြန်မာ နိုင်ငံ တောင်ဘက်အစွန်ရှိ တနင်္သာရီတိုင်း မြိတ်နှင့် ကော့သောင်းမြို့နယ်များသို့ ဆက်လက် ထွက်ခွာကြမည် ဖြစ်ကြောင်း သိရသည်။
၎င်းပြင် အမေရိကန် သမ္မတ အိုဘားမား၏ မြန်မာနိုင်ငံ ခရီးစဉ် နိုဝင်ဘာလ ၁၉ ရက်နေ့တွင် ၈၈ မျိုးဆက်ကျောင်းသားများနှင့် တွေ့ဆုံ ဖွယ် ရှိကြောင်း သိရသည်။
No comments:
Post a Comment