လက်ရှိ ငြိမ်းချမ်းရေး ဖြစ်စဉ်များအပေါ် စိုးရိမ်မှု ရှိသည့်အတွက် ၈၈ ငြိမ်းချမ်းရေးနှင့် ပွင့်လင်းလူ့အဖွဲ့အစည်း ကိုယ်စား ၈၈ မျိုးဆက် ကျောင်းသားခေါင်းဆောင် ကိုမင်းကိုနိုင်က အစိုးရနှင့် ညီညွှတ်သောတိုင်းရင်းသား လူမျိုးများ ဖက်ဒရယ်ကောင်စီ (UNFC) တို့ထံစာပေးပို့ထားသော်လည်း စာပါ အကြောင်းအရာ အသေးစိတ်ကို လောလောဆယ်တွင်မထုတ်ပြန်နိုင်ဟု ၈၈ ငြိမ်းချမ်းရေးနှင့်ပွင့်လင်းလူ့အဖွဲ့အစည်းထံမှ သိရှိရသည်။
“ ကျနော်တို့မှာ စိုးရိမ်ပူပန်မှု ရှိတယ်ဆိုတာတော့ အမှန်ပဲ။ ဘာဖြစ်လို့လဲဆိုတော့ ကျနော်တို့အားလုံး ကြားတဲ့ အတိုင်း ဆိုရင် ဆွေးနွေးပွဲတွေက မရေမရာဖြစ်နေတယ်ဆိုတဲ့ အသံတွေက မျိုးစုံထွက်နေတယ်။ဒီအခြေအနေ အပေါ်မှာ ဆွေးနွေးပွဲတွေ တုံ့ဆိုင်းသွားမှာ ရပ်ဆိုင်းသွားမှာကို ကျနော်တို့ကတော့ မဖြစ်စေချင်ဘူး။ တဖက်မှာကလည်းစစ်ရေး စစ်ရာ အခြေအနေတွေကလည်း မြင့်တက်လာတာကို မြင်ရတာကိုး။ အဲဒီတော့ကျနော်တို့ စိတ်ပူတယ် ” ဟု ၈၈ မျိုးဆက် ကျောင်းသား ခေါင်းဆောင်တဦးဖြစ်သူ ဦးမြအေးက ဧရာဝတီသို့ ပြောကြားသည်။
၈၈ ငြိမ်းချမ်းရေးနှင့်ပွင့်လင်းလူ့အဖွဲ့အစည်းသည် အစိုးရငြိမ်းချမ်းရေးကိုယ်စားလှယ်အဖွဲ့မှ သမ္မတရုံးဝန်ကြီး ဦးအောင်မင်းနှင့် အဖွဲ့ဝင်များ ကို မေလ ၆ ရက်နေ့ မနက်ပိုင်း ရန်ကုန်မြို့ MPC စင်တာတွင် သွားရောက်တွေ့ဆုံပြီး လက်ရှိအခြေအနေများနှင့်ဆက်စပ်၍ သွားရောက် အမြင်ချင်း ဖလှယ်ဆွေးနွေးခဲ့ကြောင်း သိရှိရသည်။
“ အဓိကကတော့ သူတို့(MPC) ရဲ့ လုပ်ငန်းစဉ်နဲ့ သူတို့တွေ့ကြုံနေရတဲ့ အခက်အခဲတွေကို ရှင်းပြတယ်။ ဆွေးနွေးပွဲတွေ လည်း ဆက်လုပ်သွားမယ်ဆိုတဲ့အကျိုးအကြောင်း ၊ အပစ်အခတ် ရပ်စဲရေး ဖြစ်သွားဖို့ ကျနော်တို့ ဘက်ကလည်း ၀ိုင်းကူပေးဖို့ ပြောတယ်။ တပ်တွေရဲ့ အနေအထားက အရေးကြီးတယ်။ ဆွေးနွေးပွဲတွေ ရှိနေတဲ့ အချိန်မှာ တိုက်ပွဲတွေ အရှိန်မြှင့်တာမကောင်းသလို ၊ တိုက်ပွဲတွေ ဖြစ်လာလို့လည်း ဆွေးနွေးပွဲရပ်တန့်လိုက်တာမျိုး မဖြစ်သင့်ဘူး” ဟု ဦးမြအေးက ပြောသည်။
အစိုးရ ငြိမ်းချမ်းရေးကိုယ်စားလှယ်အဖွဲ့ မှ ငြိမ်းချမ်းရေးအကျိုးဆောင်ဦးလှမောင်ရွှေက တွေ့ဆုံမှုတွင် ငြိမ်းချမ်းရေး လုပ်ငန်းစဉ်များ အပေါ် နှစ်ဖက်စလုံး၏အမြင်များကို ဆွေးနွေးဖလှယ်ခဲ့ကြပြီးနောက် အနည်းဆုံး တလလျှင် တကြိမ်ခန့်တွေ့ဆုံနိုင်ရန် သဘောတူချက် ရရှိခဲ့သည်ဟုဆိုသည်။
“ သူတို့(MPC)မှာလည်း ငြိမ်းချမ်းရေးကို တကယ်လိုချင်တဲ့ဆန္ဒရှိတယ်ဆိုတာတော့ တွေ့ပါတယ်ဗျာ။ တခုရှိတာက အမြင်သဘောထားခြင်း မတူတာကိုဘယ်လိုညှိနှိုင်းမလဲဆိုတာက ပိုအရေးကြီးတယ်လေ။ အပစ်အခတ်ရပ်စဲရေစာချုပ်ဆိုတာကလည်း တဖက်က တဖက်ကို စည်းပိုးသွားတာမျိုး မဟုတ်ဘဲနဲ့နှစ်ဖက်စလုံးအတွက် မျှတတဲ့ အနေ အထားမျိုး ဖြစ်သင့်တယ် ။ အဲလို ဖြစ်အောင်ဘယ်လိုရှာရမလဲဆိုတာက အရေးကြီးတယ် ။ အဲဒါမှ နိုင်ငံရေး ဆွေးနွေးပွဲ ကိုသွားလို့ရမှာ။ ကျနော်တို့ကတော့ အတတ်နိုင်ဆုံး နှစ်ဖက်စလုံးကိုပြောတော့မှာ။ အရေးကြီးဆုံး ဖြစ်တဲ့ အပစ်အခတ် ရပ်စဲရေး စာချုပ်မှာလည်းနှစ်ဖက်ညှိနှိုင်းပြီးတဲ့အခါ ဘယ်လိုတော့ ဖြစ်သင့်တယ်ဆိုတာမျိုးပါကျနော်တို့က ၀င်ပြောတော့မှာ ” ဟု ဦးမြအေးက ပြောသည်။
အစိုးရငြိမ်းချမ်းရေးကိုယ်စားလှယ်အဖွဲ့နှင့် ညီညွှတ်သော တိုင်းရင်းသား လူမျိုးများ ဖက်ဒရယ်ကောင်စီ(UNFC)တို့ကြား အပစ်အခတ် ရပ်စဲရေး မူကြမ်းကိစ္စ ဆွေးနွေးရန် မေလ ၁၉ရက်နှင့် ၂၀ ရက်နေ့များတွင် တွေ့ဆုံရန်ရှိကြောင်း MPC ထံမှ သိရှိရသည်။
No comments:
Post a Comment