ကွန်းချမ်း
မွန်ပြည်နယ် ကမ်းရိုးတန်းတလျှောက်ရှိ မြို့နယ်အချို့တွင် တနင်္လာနေ့မနက် မိုးသက်လေပြင်း ကျရောက်ခဲ့ရာ အပျက်အစီးများ ရှိခဲ့ကြောင်း ဒေသခံများအဆိုအရ သိရသည်။
ချောင်းဆုံ၊ မော်လမြိုင်၊ မုဒုံ၊ သံဖြူဇရပ်နှင့် ရေးမြို့နယ်များတွင် မိုးသက်လေပြင်း ကျရောက်ခဲ့ပြီး ဘီလူးကျွန်းဟု ထင်ရှားသည့် ချောင်းဆုံမှာ ပျက်စီးမှု များခဲ့သည်။
“လေရော မိုးရော တအားပြင်းတယ်။ အလယ်တန်းကျောင်း သွပ်အမိုးတွေလည်း လွင့်သွားတယ်။ အိမ်တွေလည်း သစ်ပင်ပိလို့ ပြိုသွားတာ ရှိတယ်” ဟု ချောင်းဆုံမြို့နယ် ဒရယ်ကျေးရွာမှ အမျိုးသမီးတဦးက မဇ္ဈိမကို ပြောသည်။
ပင်လယ်ကမ်းစပ် ကျေးရွာအချို့တွင် ငါးဖမ်းလှေများလည်း ပျောက်ဆုံးနေသည်ဟု ချောင်းဆုံမြို့နယ် ကော့မုပွန် ရွာသူတဦးက ပြောသည်။ သို့သော် အရေအတွက် အတိအကျ မသိပေ။
“ကျမတို့ရွာက အဖေနဲ့သား ငါးဖမ်းထွက်သွားတာ ပျောက်သွားလို့ အခုထိ ပြန်ရှာမတွေ့သေးဘူး။ တခြား တံငါရွာတွေလည်း ပျောက်နေတာပဲ” ဟု သူက ဆိုသည်။
ချောင်းဆုံမြို့နယ် ကညော်ရွာနှင့် အခြားရွာများတွင်လည်း သစ်ပင်များ ပြိုလဲခြင်း၊ နေအိမ်များ ပျက်စီးခြင်းများ ရှိကြောင်း မုဒွန်းရွာသူတဦး အဆိုအရ သိရသည်။
မော်လမြိုင်မြို့တွင် လေပြင်းကြောင့် နေအိမ်အချို့ ပျက်စီးကာ၊ ဓာတ်တိုင်များနှင့် သစ်ပင်များ ပြိုလဲခဲ့သဖြင့် တနေကုန် မီးပျက်ခဲ့သည်ဟု မြိုင်သာယာရပ်ကွက်နေ အမျိုးသမီးတဦးက ပြောသည်။
မုဒုံ၊ သံဖြူဇရပ်နှင့် ရေးမြို့နယ်များတွင် သစ်ပင်များ ပြိုလဲခဲ့သော်လည်း အဆောက်အအုံများ မပျက်စီးခဲ့ပေ။
ယခုရက်ပိုင်းအတွင်း မြစ်ဝကျွန်းပေါ်၊ မုတ္တမကွေ့၊ မွန်ပြည်နယ် တနင်္သာရီ ကမ်းရိုးတန်းတလျှောက်နှင့် ကမ်းလွန် ပင်လယ်ပြင်များ၌ တခါတရံ မိုးသက်မုန်တိုင်း ကျရောက်ပြီး၊ ရေပြင်မြေပြင်လေ တနာရီလျှင် ၃၅ မိုင်မှ ၄ဝ မိုင်အထိ တိုက်ခတ်ကာ လှိုင်းကြီးနိုင်ကြောင်း ယခုတပတ် တနင်္လာနေ့ထုတ် မြန်မာ့အလင်း သတင်းစာတွင် ဖော်ပြထားသည်။
No comments:
Post a Comment