ခံစားခွင့်တိုးပေးရုံနဲ့ ပင်စင်စားတွေရဲ့ဘဝ လုံခြုံပြီလား

ဧရာဝတီ

အစိုးရသစ် တာဝန်ယူခဲ့သည်မှာ ရက် ၉၀ ကျော်၍ ရက် ၁၀၀ နားကို ကပ်နေပြီဖြစ်ကြောင်းနှင့် ထို ရက် ၉၀ ကျော် ကာလတွင် မည်သို့သော တိုးတက်ပြောင်းလဲမှုများ ပြုလုပ်နိုင်ခဲ့ကြောင်း ဇူလိုင် ၇ ရက်နေ့ထုတ် မြန်မာ့အလင်းသတင်းစာတွင် ဆောင်းပါး ရှည်ကြီး တပုဒ်ရေးကာ ဖော်ပြလာသည်ကို တွေ့ရသည်။

အစိုးရသစ်၏ သက်တမ်းတိုအတွင်း မည်မျှ တိုးတက်ပြောင်းလဲမှုများ ပြုလုပ်ပေးခဲ့သည်ဆိုသည့် စာရင်းများနှင့်အတူ အထူးတလည် ဖော်ပြထားသည်မှာ ပင်စင်စားများအား ခံစားခွင့်တိုးမြှင့်ပေးနိုင်ခဲ့သည် ဆိုသည့် အကြောင်းအရာ ဖြစ်၏။

ပင်စင်ငွေ တိုးပေးသည့် ကိစ္စကို ၄ ရက်ခန့် နေ့စဉ်ရက်ဆက် ဆိုသလို သတင်းစာဆောင်းပါးများ အထူးတလည် ရေးသားခဲ့ပြီး ဖြစ်ရာ ထိုကိစ္စအပေါ် အစိုးရအနေဖြင့် ဂုဏ်ယူနေဟန်၊ ကျေးဇူးအတင်ခံလိုဟန်လည်း ရှိသည်။

ယခင်ပင်စင်စားများ အားလုံး ယခု လက်ရှိသတ်မှတ်ထားသည့် နှုန်းအတိုင်း ခံစားခွင့်ပြုရန် အစိုးရက မကြာသေးမီက ကြေညာခဲ့ရာ ရုတ်တရက် အနေအထားအရ ပင်စင်စားများ ဝမ်းသာကြသည်မှာ မှန်ပါသည်။ ထိုသို့ ဝမ်းသာကြသည့် အကြောင်းရင်းမှာ ပင်စင်စားဟောင်းများ အနေဖြင့် ကျပ် ရာဂဏန်း၊ ထောင်ဂဏန်း အနည်းငယ်မျှသာ ခံစားနေရာမှ သောင်းဂဏန်းအထိ တိုးမြင့်ခံစားခွင့် ရရှိသွားသောကြောင့်၊ အနည်းဆုံး ၁၀ ဆခန့် တိုးသွားသည်ဆိုသော ခံစားချက်ကြောင့် ဖြစ်သည်။

ပင်စင်ခံစားခွင့်များ တိုးမြှင့်ပေးသည်မှာ ယခုတကြိမ်သည် ပထမဆုံးမဟုတ်ပါ။ ၁၉၈၈ မတိုင်ခင်က ဥပဒေဖြစ်သည့် ပင်စင် လစာခံစားခွင့် ကျပ် ၆၀၀ ထက် မပိုစေရဆိုသော စနစ်ကို ၁၉၈၉ ခုနှစ်တွင် ပယ်ဖျက်ပေးခဲ့သည်။ ထို့နောက် ၁၉၉၃ ခုနှစ်တွင် ပင်စင်လစာ လိုအပ်ချက်အရ ၂၅ ရာခိုင်နှုန်း တိုးမြှင့်ပေးခဲ့သည်။ ၁၉၉၄ ခုနှစ်တွင် မိသားစု ပင်စင်လစာကို တဝက်မှ ၄ ပုံ ၃ ပုံ အထိ တိုးမြှင့်ခံစားခွင့် ပေးခဲ့ပြန်သည်။ ၂၀၀၀ ပြည့်နှစ်တွင် ပင်စင်လစာကို ၂ ဆ တိုးမြှင့်ပေးသည်။ သို့ရာတွင် ထိုသို့ တိုးမြှင့် ပေးခဲ့ခြင်းများမှာ ၎င်းနှစ်များနှင့် အကျုံးဝင်သော ပင်စင်စားများအတွက်သာ ဖြစ်ပြီး ထိုနှစ်များ၏ အရှေ့တွင် ပင်စင် ယူခဲ့သူများ မပါဝင်ပေ။

ယခု အစိုးရသစ်ကတော့ ရှိသမျှ ပင်စင်စား အားလုံးကို တပြေးညီ တိုးမြှင့်ခြင်း ဖြစ်သောကြောင့် ယခင် ကာလများကထက် အနည်းငယ် ထူးခြားသည်ဟု ဆိုရပေလိမ့်မည်။

အစိုးရသစ် တိုးမြှင့်ပေးလိုက်သည့် ပင်စင်လစာအရ အောက်ခြေဝန်ထမ်း၊ စာရေးစာချီများအနေဖြင့် ကျပ် ၁ သောင်းနှင့် ၂ သောင်း ဝန်းကျင်ခန့်သာ ရရှိမည်ဖြစ်ပြီး အရာရှိ အရာခံများအနေဖြင့် ကျပ် ၅ သောင်းအထက် ရရှိကြမည် ဖြစ်ရာ ယခင်ထက် စာလျှင် များသည်ဟု ယူဆနိုင်သည်။

ယခင့်ယခင် ပင်စင်စားဟောင်းကြီးများ၏ တလအတွက် ခံစားခွင့်သည် ကော်ဖီမစ် လေး၊ ငါး၊ ခြောက်ထုပ် ဖိုးထက် မပိုသော်လည်း ယခု ရရှိမည့် ပင်စင်လစာမှာ အနည်းဆုံး ထမင်း ၁၀ နပ်စာခန့်၊ ချွေတာသုံးစွဲပါက ၅ ရက်ခန့် အသုံးစရိတ်သာ ရှိနေသည် မဟုတ်ပါလား။

ထို့ကြောင့် ပင်စင်စားများအားလုံး၏ ဘဝလုံခြုံရေးအတွက် မည်ရွေ့မည်မျှ အထောက်အကူ ပြုသည်ကို မေးခွန်းထုတ်စရာ ရှိနေသည်။

သတင်းစာ ဆောင်းပါးထဲတွင် မြန်မာတနိုင်ငံလုံး၌ ပင်စင်စား ၉ သိန်းကျော် ရှိနေပြီး ယခုကဲ့သို့ ပင်စင်လစာ တိုးမြှင့် ပေးလိုက်သည့်အတွက် ပင်စင်စားတို့၏ မိသားစုဝင်များ အတွက်ပါ အထောက်အကူ ပြုနိုင်မည် ဖြစ်သောကြောင့် အကယ်၍ မိသားစုတစုလျှင် အိမ်ထောင်စုဝင် ၅ ဦးရှိပါက လူဦးရေ ၄ သန်းခွဲကျော်ကိုပင် စားဝတ်နေရေး ဖူလုံရေးအတွက် အကူအညီ ပေးလိုက်သယောင် ရေးသားထားသည်။

ထိုသို့ အမှန်တကယ် အထောက်အကူပြုမည်ဆိုပါက အနာဂတ်အဘိုး၊ အဘွားများ၏ ဘဝလုံခြုံရေးအတွက် ဝမ်းမြောက်ဖွယ် ဖြစ်မည့်အပြင် လမ်းမများပေါ်မှ ခိုကိုးရာမဲ့ အဘိုး၊ အဘွားများ ဦးရေလည်း လျော့သွားပေလိမ့်မည်။

သို့သော် တိုးမြှင့်ပေးလိုက်သည့် ပင်စင်လစာက တဦးအတွက် တလစာ နေထိုင်ရေး မပါသေးဘဲ စားသောက်ရုံအတွက် မလောက်ငနိုင်သည့် အပြင် ဝန်ထမ်းလစာ၊ ပင်စင်လစာ တိုးမည့်သတင်းကြားရုံဖြင့် ကုန်ဈေးနှုန်းတက်ရန် ကြံရွယ်နေသော စီးပွားရေးမားများက တဘက်တွင် ရှိနေပြန်သည်။

ထိုသို့ ထိုးတက်လာမည့် ကုန်ဈေးနှုန်းကို အစိုးရအနေဖြင့် သေချာပေါက် ထိန်းနိုင်မည်ဟု မယူဆနိုင်ပါ။ မယူဆနိုင်သည့် ရာဇဝင်များလည်း မြန်မာအစိုးရ အဆက်ဆက်တွင် ရှိခဲ့ပြီးဖြစ်သည်။ ကုန်ဈေးနှုန်းကြီးမြင့်မှုကို လက်ရှိအစိုးရအနေဖြင့် ထိန်းနိုင်မည်ထားဦး ယခု တိုးမြှင့်ပေးလိုက်သည့် ပင်စင်လစာဖြင့် ပင်စင်စား ဘိုး၊ ဘွားများ၏ ဘဝလုံခြုံရေး ပြေလည်ရန် မလွယ်ကူလှပါ။

လူဦးရေ ၄ သန်းခွဲခန့်ကို အထောက်အကူ ပြုနိုင်မည်ဆိုသည့် မြန်မာ့အလင်း သတင်းစာတွင် ရေးသားထားသော “ရင်ဝယ်သားကဲ့သို့ ထားရှိသည့် စေတနာဖြင့်” ဆိုသည့် ဆောင်းပါးထဲမှ စကားသည် အစိုးရ၏ ကြွားလုံးသက်သက်သာ ဖြစ်သည်ဟု ယူဆပါသည်။

အစိုးရအနေဖြင့် ပင်စင်စား အဘိုး၊ အဘွားများအပါအဝင် နိုင်ငံသားများအပေါ် အမှန်တကယ် ရင်ဝယ်သားကဲ့သို့ စေတနာ ထားပါက ယခုကဲ့သို့ ပင်စင်လစာများ တိုးမြှင့် ခံစားခွင့်ပေးသည်နှင့် တပြိုင်နက်တည်း တိုးမြှင့်ပေးသည့် ခံစားခွင့်နှင့် ညီမျှကာ နေထိုင်စားသုံးနိုင်ရန် အတွက် ကုန်ဈေးနှုန်း အထူးတလည် ကျဆင်းရေးကို အင်တိုက်အားတိုက် ဆောက်ရွက် သင့်သည်ဟု ယူဆပါသည်။