ရန်ကုန်မြို့တော် စည်ပင်သာယာရေး ကော်မတီ လုံခြုံရေး၊ စည်းကမ်း ထိန်းသိမ်းရေးဌာနနဲ့ စီမံရေးရာဌာနတို့ ပူးပေါင်းပြီး ကော်မတီ လက်အောက်မှာရှိတဲ့ ဌာန ၂၀ လောက်က ဝန်ထမ်းတွေနဲ့အတူ ရှင်းလင်းရေး လုပ်နေကြတာ ဖြစ်ပါတယ်။
“ကျနော်တို့တတွေက သတ်မှတ်ချိန်အတိုင်း မရောင်းတဲ့ဈေးသည်၊ လမ်းမပေါ်တက်ပြီး ဈေးဗန်းခင်းတဲ့ ဈေးသည်တွေနဲ့ ကားပါကင်မှာ ရောင်းချနေတဲ့ ဈေးသည်တွေကို မရောင်းဖို့ ပြောတယ်၊ မရဘူးဆိုရင်တော့ တရားစွဲပြီး ငွေဒဏ်ရိုက် တယ်”လို့ စီမံရေးရာဌာန အနောက်ပိုင်းခရိုင် စည်ပင်သာယာ အုပ်ချုပ်ရေးမှူး ဦးသန်းလှက ဧရာဝတီကိုပြောပါတယ်။
ပလက်ဖောင်းတွေ တနေ့တခြား ကျဉ်းမြောင်း လာသလို တချို့ ပလက်ဖောင်းနေရာ တွေမှာ ပျံကျ လမ်းဘေး ဈေးသည် တွေက နေရာယူထားတာကြောင့် လမ်းသွားလမ်းလာ ပြည်သူတွေအတွက် လမ်းလျှောက်ဖို့ နေရာ ဆိုတာ မရှိတော့ သလောက် ရှားပါးလာတာ တွေ့ရပါတယ်။
လမ်းဘေး ဈေးသည်တွေတင် မကဘဲ လမ်းမတန်း ဈေးဆိုင်ခန်းကြီးတွေက ကားပါကင် နေရာတွေမှာ၊ ပလက်ဖောင်းတွေမှာ ကြော်ငြာဆိုင်းဘုတ်တွေနဲ့ ပစ္စည်းခင်းကျင်း ရောင်းချနေတာတွေကိုလည်း တရားစွဲ အရေးယူမှုတွေရှိတယ်လို့ သိရပါတယ်။
စည်ပင်က လမ်းဘေး ဈေးသည်တွေကို ရှင်းလင်းရေး လုပ်ပေမယ့်လည်း ၃၉ လမ်း၊ လသာမြို့နယ်နဲ့ ရန်ကုန်ဆေးရုံကြီးရှေ့ မျက်နှာစာ စတဲ့ နေရာတွေမှာ ဈေးသည်တွေက ပြန်ရန်ရှာတဲ့ ပြဿနာမျိုးတွေ ရှိနေတယ်လို့ အနောက်ပိုင်းခရိုင် စည်ပင်သာယာ အုပ်ချုပ်ရေးမှူး ဦးသန်းလှက ပြောပါတယ်။
“ဈေးသည် ရှင်းလင်းရေးလုပ်တဲ့ စည်ပင်ဝန်ထမ်းကို ဓားနဲ့ထိုးတာ၊ ရန်ရှာတာတွေ ရှိနေတယ်၊ ကျနော်တို့မှာ ရှင်းလင်းရေး လုပ်ရ၊ တရားခံလည်း ဖမ်းနေရတယ်၊ အဲဒီလို ရန်မူနေတော့ တချို့ဝန်ထမ်းတွေက ဈေးသည်ရှင်းဖို့ မလုပ်ချင်ကြ တော့ဘူး” လို့ ဦးသန်းလှက ဆိုပါတယ်။
ပြီးခဲ့တဲ့ ၃ ပတ်လောက်က လသာမြို့နယ်မှာ လမ်းဘေးဈေးသည် ရှင်းလင်းရေးလုပ်နေတဲ့ စည်ပင်ဝန်ထမ်းတဦးကို ဈေးသည်က ဓားနဲ့ထိုးလိုက်တာကြောင့် ဆေးရုံတက်နေရဆဲဖြစ်ပြီး ဓားနဲ့ထိုးတဲ့ တရားခံ ဈေးသည်ကိုတော့ ဒီနေ့အချိန်အထိ မမိသေးဘူးလို့ သိရပါတယ်။
“အဓိက အနေနဲ့ ကားပါကင် လုပ်မယ်ဆိုတဲ့ နေရာတွေမှာ ရောင်းနေတဲ့ လမ်းဘေး ဈေးသည်တွေကို ဦးစားပေးပြီးတော့ ရှင်းတယ်၊ လူသွားလူလာများတဲ့ လမ်းမတန်းတွေမှာ ဈေးသည်တွေကို နေ့ပိုင်းအချိန် ရောင်းချခွင့် ပြုမထားဘူး။ ညဘက် မှာတော့ အချိန်သတ်မှတ်ပြီး ရောင်းခိုင်းတယ်။ မလိုက်နာတဲ့ ဈေးသည်တွေကိုတော့ ဒဏ်ငွေ ၁၀၀၀၀ ကျပ် ရိုက်တယ်” ဟုအရှေ့ပိုင်းခရိုင် စည်ပင်သာယာ အုပ်ချုပ်ရေးမှူး ဦးဝင်းမြင့်က ဧရာဝတီကို ပြောပြပါတယ်။
ရန်ကုန်မြို့တွင်း စည်ပင်သာယာ နယ်နိမိတ်ဖြစ်တဲ့ မြို့နယ် ၃၃ မြို့နယ်က လမ်းဘေးဈေးသည်တွေကို ဈေးမရောင်းချဖို့ အချိန်၊ နေရာတွေ ဇူလိုင်လ ၂ ရက်က စတင် သတ်မှတ်လိုက်ပြီး ဖြစ်ပါတယ်။ ပျံကျ ဈေးသည်တွေကို ညနေ ၃ နာရီ ကနေ ည ၈ နာရီ အထိ သတ်မှတ်နေရာတွေမှာ ဈေးရောင်းချခွင့် ပေးထားပြီး လက်ရှိ အနေအထားအရ မြို့တွင်း ၆ မြို့နယ်မှာ ပျံကျရောင်းချနေတဲ့ လမ်းဘေးဈေးသည် ၅၀၀၀ ကျော် ရှိတယ်လို့ သိရပါတယ်။
နေ့ဘက် အချိန်မှာ လမ်းဘေးဈေးသည်တွေ ရှင်းလင်းနေပေမယ့် ပန်းဆိုးတန်းလမ်း၊ ၃၂ လမ်း၊ ၃၁ လမ်း၊ ၃၈ လမ်း၊ ဆိပ်ကမ်းသာလမ်း၊ ရွှေဘုံသာလမ်း၊ ဆူးလေဘုရားလမ်း၊ ကမ်းနားလမ်း၊ မဟာဗန္ဓုလလမ်း၊ ကုန်သည်လမ်း၊ အနော်ရထာလမ်း စတဲ့ လမ်းမကြီးတွေပေါ်မှာတော့ မနက်မိုးလင်းတာနဲ့ လမ်းဘေးဈေးသည်တွေက အစီအရီ ဈေးဗန်းခင်း ရောင်းချ နေကြတာ တွေ့ရပါတယ်။
“စီမံချက်နဲ့ ဖမ်းတယ်သာ ဆိုတယ်၊ လမ်းဘေးဈေးသည်တွေက ပလက်ဖောင်းတွေပေါ်မှာ နေရာအပြည့်ယူပြီး ရောင်းနေ တုန်းပါပဲ။ ဈေးဝယ်မယ့်သူက သူဝယ်ချင်တယ်ဆိုရင် ဘယ်နေရာ ရောင်းရောင်း လာဝယ်မှာပေါ့၊ အခုက ပလက်ဖောင်းက ကျဉ်းရတဲ့အထဲ ဈေးသည်တွေ လူအသည်းအသန် ခေါ်တာ ရှောင်ရတယ်၊ သူတို့ ဈေးဗန်းတိုက်မိတာ၊ လူတိုက်မိတာမျိုး ဖြစ်ရင်တော့ အဆဲတောင်ခံရတယ်” လို့ နေ့စဉ် ရုံးတက်ရုံးဆင်းကိစ္စနဲ့ သွားလာနေရသူ ကိုမြတ်မင်းက ပြောပါတယ်။
လမ်းဘေး ဈေးသည်တွေ နေရာယူရောင်းချနေတဲ့ မြို့ထဲ ပလက်ဖောင်းတွေ တနေ့တခြား ကျဉ်းမြောင်း လာတာကတော့ ကားရပ်နားဖို့ နေရာတွေ လုပ်နေရတာကြောင့်လို့ သိရပါတယ်။
“ကားသွားဖို့ လမ်းတွေ ကျယ်နေရင်တော့ ပလက်ဖောင်းတွေကို ဖျက်စရာမလိုပေမယ့် ကားတွေက များလာတော့ ကားရပ်နားဖို့ နေရာတွေ လုပ်ပြီး ပလက်ဖောင်း နေရာကို အနည်းဆုံး အနေအထားလောက်အထိပဲ ချန်ထားလို့ရတယ်။ ချဲ့စရာ လမ်းမရှိတော့ ပလက်ဖောင်းကို ဖျက်လိုက်ရတာပေါ့” လို့ ရန်ကုန်မြို့တော် စည်ပင်သာယာရေး ကော်မတီလမ်းတံတား အင်ဂျင်နီယာဌာန ဒု – ဌာနမှူး ဦးမျိုးလွင်က ရှင်းပြပါတယ်။
မြို့တွင်း ၆ မြို့နယ်ဖြစ်တဲ့ ပန်းဘဲတန်း၊ လသာ၊ ဗိုလ်တထောင်၊ ကျောက်တံတား၊ လမ်းမတော်နဲ့ ဒဂုံမြို့နယ်တွေမှာ လူသွားစင်္ကြန် ပလက်ဖောင်းတွေကို သွားလာလို့ရရုံ အနေအထားလောက်ပဲ နေရာချန်၊ ဖျက်ပြီး ကားရပ်နားဖို့ နေရာတွေ လုပ်နေရတယ်လို့ သိရပါတယ်။
ရန်ကုန်မြို့ထဲ လမ်းဘေး လူသွားစင်္ကြန်တွေက တနေ့တခြား ကျဉ်းလာပြီး ပျောက်ကွယ်လုနီးပါး ဖြစ်လာသလို၊ ပျံကျ လမ်းဘေး ဈေးသည်တွေက ရှိတဲ့ လူသွားစင်္ကြန် ပလက်ဖောင်းတွေမှာ ဆိုင်ခန်းငယ်တွေ ဖွင့်ပြီး လမ်းသွားလမ်းလာတွေ အတွက် လမ်းသွားစရာ မရှိသလောက် နေရာ အပြည့်ယူနေတာ၊ လမ်းတဘက်တချက်မှာ ဖွင့်ထားတဲ့ ဆိုင်ခန်းကြီးတွေ ကလည်း သူတို့ကုန်ပစ္စည်းတွေ၊ ကြော်ငြာဆိုင်းဘုတ်တွေကို ပလက်ဖောင်းပေါ်အထိ နေရာယူပြီး ဈေးရောင်းချနေကြတာ တွေ့နေရပေမယ့် သက်ဆိုင်ရာက ထိထိရောက်ရောက် သတိပေးတားမြစ်တာ၊ အရေးယူတာမျိုး မရှိသလောက်ကို နည်းနေသေးတယ် လို့ လမ်းသွားလမ်းလာ ပြည်သူတွေက ပြောဆိုနေကြပါတယ်။
ကားတင်သွင်းခွင့်တွေ ပြုပြီးနောက်ပိုင်း ကားတွေ အသုံးပြုမှု များလာသလို၊ လမ်းမတွေပေါ်မှာ ယာဉ်ရပ်နားကြ တာကြောင့် ယာဉ်ကြော ပိတ်ဆို့မှုတွေ တဖြည်းဖြည်းနဲ့ များလာကြောင်း၊ ဒါကြောင့် ယာဉ်ရပ်နားဖို့ နေရာတွေ လုပ်ပေးမယ်ဆိုရင် လမ်းပေါ် ယာဉ်ရပ်နားတာတွေ လျော့သွားပြီး ယာဉ်ကြောပိတ်ဆို့မှု ကိုလည်း ဖြေရှင်းနိုင်တာကြောင့် ပလက်ဖောင်း စင်္ကြန်တွေကို ဖျက်ပြီး ကားပါကင်တွေ လုပ်နေရတာ ဖြစ်တဲ့ အကြောင်း ရန်ကုန်မြို့တော် စည်ပင်သာယာရေး ကော်မတီက သိရပါတယ်။
“ကျနော်တို့ကတော့ ပလက်ဖောင်းတွေကို သွားလို့ရအောင် နေရာချန်ထားပေးပေမယ့် အဲဒီနေရာတွေမှာ ပျံကျဈေးသည် တွေက ဈေးရောင်းနေရင် အဆင်မပြေပါဘူး။ အများပြည်သူ သွားတဲ့လမ်းမှာ အဲဒီလိုတွေ မဖြစ်စေချင်ဘူး” လုိ့ လမ်းတံတား အင်ဂျင်နီယာဌာန ဒု-ဌာနမှူး ဦးမျိုးလွင်က ပြောပါတယ်။
ရန်ကုန်မြို့တော် စည်ပင်သာယာရေး ကော်မတီအနေနဲ့ ယာဉ်ကြောပိတ်ဆို့မှု၊ လမ်းပိတ်ဆို့မှု နည်းအောင် လမ်းဘေး ဈေးသည် ရှင်းလင်းရေးနဲ့ ကားပါကင်နေရာတွေ ချဲ့ဖို့ လုပ်နေသလို ယာဉ်စည်းကမ်း ထိန်းသိမ်းရေး ကော်မတီကလည်း ယာဉ်မရပ်ရ နေရာတွေ ထုတ်ပြန်ကြေညာတာ၊ ယာဉ်ကြောကျပ်တဲ့ တချို့နေရာတွေမှာ ကားကြီးတွေ ပေးမဖြတ် တော့တာမျိုးတွေနဲ့ ယာဉ်ကြောပိတ်ဆို့တဲ့ ပြဿာနာကို ဖြေရှင်းဖို့ ကြိုးစားနေကြပါတယ်။
No comments:
Post a Comment