စစ်အစိုးရကို ဆက်လက် ဖိအားပေးရန်လို

ဧရာဝတီ

ဒေါ်အောင်ဆန်း စုကြည်ကို စစ်အစိုးရက နောက်ဆုံးတွင် လွှတ်ပေးလိုက်ပြီ ဖြစ်သည်။ ဒေါ်အောင်ဆန်းစုကြည် လွတ်မြောက်ခါနီးတွင် ထောင်ပေါင်း များစွာသော လူထုက စုဝေးကာ “ဒေါ်အောင်ဆန်းစုကြည် လွတ်မြောက်ပါစေ” ဟု ကြွေးကြော်ခဲ့ကြသည်။ သူ၏ အိမ်ရှေ့တွင် ထိုကဲ့သို့ ကြွေးကြော်နေရခြင်းသည် နောက်ဆုံးအကြိမ်ဖြစ်ပါစေဟု မျှော်လင့်မိပါသည်။

ငြိမ်းချမ်းရေး နိုဗဲလ်ဆုရှင် ဒေါ်အောင်ဆန်းစုကြည်သည် နေအိမ်အကျယ်ချုပ် ကျသင့်သောသူမဟုတ်ခဲ့သဖြင့် လွှတ်ပေးလိုက်ခြင်းအတွက် စစ်အစိုးရကို ထောမနာပြုရန် မထိုက်တန်ပေ။ ဒေါ်အောင်ဆန်းစုကြည်သည် မည့်သည့်ရာဇဝတ်မှုကိုမျှ မကျူးလွန်ဘူးရာ ယနေ့ထုတ် စစ်အစိုးရသတင်းစာ၌ “ပြစ်ဒဏ် ကျခံရမည့် အချိန်ကာလအတွင်း သတ်မှတ်စည်းကမ်းများနှင့်အညီ ကောင်းမွန်စွာနေထိုင်သဖြင့် ပြစ်ဒဏ်အားလုံးကို လွတ်ငြိမ်းချမ်းသာခွင့် ပြုလိုက်ခြင်းဖြစ်သည်” ဟု ဖော်ပြထားခြင်းမှာ ရယ်ဖွယ်ရာသာ ဖြစ်သည်။

ပြည်သူလူထု ရှေ့မှောက်မှ ကာလရှည်ကြာစွာ ပျောက်ကွယ်နေရသည့်တိုင် ဒေါ်အောင်ဆန်းစုကြည်သည် လူထုအကြား ရေပန်းစားဆဲပင် ဖြစ်သည်။ သူ လွတ်မြောက်လာချိန်တွင် ကြိုဆိုနှုတ်ဆက်ရန် လာရောက်စုဝေးသည့် လူထုမှာ ထင်ထားသည်ထက်ပင် များနေသေးသည်။

ယနေ့ မြန်မာနိုင်ငံတွင် လွတ်လပ်၍ တရားမျှတသည့် ရွေးကောက်ပွဲသာ ကျင်းပလိုက်လျှင် ဒေါ်အောင်ဆန်းစုကြည်သည် မြန်မာနိုင်ငံ သမ္မတ၊ မြန်မာနိုင်ငံ၏ သမာသမတ်ကျသော ခေါင်းဆောင် ဖြစ်လာလိမ့်မည်ဆိုသည်မှာ ယုံမှားဖွယ် မရှိပေ။ သို့သော် လက်ရှိ အခြေအနေမှန်က ပြောင်းပြန်ဖြစ်နေပေသည်။

အနှစ် ၂၀ အတွင်း ပထမဆုံးအကြိမ် ကျင်းပသည့် ရွေးကောက်ပွဲ ပြီးခါစတွင် ဒီမိုကရေစီခေါင်းဆောင် ဒေါ်အောင်ဆန်းစုကြည်ကို စစ်အစိုးရ လွှတ်ပေးလိုက်ခြင်းနှင့် ပတ်သက်၍ ပညာရှင်များ၊ လေ့လာသူများက မှန်းဆမှုအမျိုးမျိုးရှိနေကြသည်။ ဒေါ်အောင်ဆန်းစုကြည်ကို လွှတ်ပေးခြင်းသည် အကျယ်ချုပ်မှ ပို၍ကြီးသော အကျဉ်းထောင်သို့ ပို့လိုက်ခြင်းသာဖြစ်ကြောင်း၊ ပေါ်ပေါက်လာမည့် လွှတ်တော်၊ တက်လာမည့် အစိုးရသစ်တို့၏ “နိုင်ငံရေး အခင်းအကျင်းသစ်” နှင့် ပေးတွေ့လိုက်ခြင်းသာဖြစ်ကြောင်း ပညာရှင်များက ဆိုသည်။

တချို့ လေ့လာအကဲခတ်သူများကမူ ဒေါ်အောင်ဆန်းစုကြည်သည် မတရားမှုကို ဆိတ်ဆိတ်နေတတ်သူ မဟုတ်သဖြင့် သွန်လိုသွန် မှောက်လိုမှောက် လုပ်ပိုင်ခွင့်ရှိနေသည့် စစ်အစိုးရက အချိန်ကိုက် လွှတ်ပေးလိုက်ခြင်း ဖြစ်ကြောင်း ပြောကြသည်။ဒေါ်အောင်ဆန်းစုကြည်သည် အချိန်မရွေး ပြန်လည် ထိန်းသိမ်းခံရနိုင်သည့် အနေအထားရှိနေဆဲဆိုသည်မှာ တကယ့် အမှန်တရားပင် ဖြစ်သည်။

နိုဝင်ဘာလ ၁၄ ရက်နေ့က အမျိုးသားဒီမိုကရေစီ အဖွဲ့ချုပ် (NLD) ရုံးချုပ်ရှေ့တွင် ပြုလုပ်သော လူထုစည်းဝေးပွဲ၌ ဒေါ်အောင်ဆန်းစုကြည်က သူ့အနေဖြင့် အမျိုးသားရင်ကြားစေ့ရေးကို ဆက်လက်လုပ်ဆောင်မည်ဖြစ်ပြီး ပြည်သူလူထုက ထောက်ခံမှုပေးရန် ပြောဆိုသည်။

“လူနည်းစုဖြစ်တဲ့ အုပ်ချုပ်သူတွေကို ပြည်သူက ထိန်းသိမ်းရမယ်။ ဒါ ဒီမိုကရေစီပဲ” ဟု ဒေါ်အောင်ဆန်းစုကြည်က ပြောသွားသည်။ ဤသည်မှာ နိုင်ငံကို တင်းကျပ်စွာ ထိန်းချုပ်ထားသော စစ်အာဏာပိုင်များကို ယဉ်ကျေးစွာ သွယ်ဝိုက် သတိပေးလိုက်ခြင်းဖြစ်ပြီး စစ်အစိုးရ၏ ဖိနှိပ်မှုများကို ငုံ့ခံမည်မဟုတ်ဟု ပြသလိုက်ခြင်းပင် ဖြစ်သည်။

ဒေါ်အောင်ဆန်းစုကြည်သည် နိုင်ငံရေးမူဝါဒတခုခုကို မချမှတ်မီ ယုံကြည်ရသူများ၊ လုပ်ဖော်ကိုင်ဖက်များ၊ NLD ပါတီဝင်များနှင့် တွေ့ဆုံရန်လိုအပ်ပြီး အကြံဉာဏ်နှင့် ထောက်ခံမှုများ တောင်းသင့်သည်ဟု ဧရာဝတီက အကြံပြု ရေးသားခဲ့ပြီး ဖြစ်သည်။

ရှုပ်ထွေးပွေလီနေသော မကြာသေးမီက မြန်မာ့နိုင်ငံရေးကို ပြန်ကြည့်လျှင် သံသယဖြစ်ဖွယ် မေးခွန်းများထုတ်နိုင်ရန် အရေးကြီးပြီး အကောင်းမြင်ဝါဒကို ချင့်ချင့်ချိန်ချိန် ကိုင်စွဲသင့်ပေသည်။

စစ်အစိုးရအပေါ်ကို ဖိအားများ ဆက်လက်ပေးသင့်သည်။ မကြာမီက မသမာမှုများနှင့် ပြီးစီးခဲ့သည့် ရွေးကောက်ပွဲနှင့် ပတ်သက်၍ အစိုးရက တာဝန်ယူလာရန် လုပ်သင့်သည်။ တိုင်းရင်းသား ဒေသများတွင် ထိုးစစ်ဆင်နေခြင်းနှင့် နိုင်ငံရေးအကျဉ်းသား ၂၁၀၀ ကျော်တို့ လွတ်မြောက်ရေးအတွက် ဖိအားပေးရမည်။ ထို့အပြင် တိုင်းရင်းသားဒေသများ၌ ဥပဒေမဲ့ သတ်ဖြတ်မှုများနှင့် လူ့အခွင့်အရေး ချိုးဖောက်မှုများအတွက် တာဝန်ခံရန် ဆက်လက် လုပ်ဆောင်ရမည်။

ဒေါ်အောင်ဆန်းစုကြည် လွတ်မြောက်လာမှုအတွက် ပြည်တွင်း၌သာမက ဒီမိုကရေစီထွန်းကားသော နိုင်ငံများကပါ ကြိုဆိုနေကြချိန်တွင် နေပြည်တော်မှ စစ်အစိုးရသည် မကောင်းသော တိတ်ဆိတ်ခြင်းဖြင့် တိတ်ဆိတ်နေသည်။ ဒေါ်အောင်ဆန်းစုကြည်က အမျိုးသားရင်ကြားစေ့ရေးကို ပြောလာချိန်တွင် စစ်အစိုးရသည် တုံဏှိဘာဝေ ဆိတ်ဆိတ်နေသည်။ ယခု လိပ်ခဲတည်းလည်း အခြေအနေမျိုးသည် မြန်မာ့နိုင်ငံရေးအတွက် အားရကျေနပ်လောက်ဖွယ်ရှိသည်ဟု မဆိုနိုင်သေးပေ။