ရခိုင်ပြည်နယ်နှင့် နယ်နမိတ်ချင်း ထိစပ်နေသော ဘင်္ဂလာဒေ့ခ်ျနိုင်ငံ စစ်တကောင်း တောင်တန်း နယ်တွင် ရခိုင် လက်နက်ကိုင် အဖွဲ့တစ်ခုမှ မာရမာလူမျိုး သားဖ နှစ်ယောက်အား ယခုလ ၇ ရက်နေ့က ပြန်ပေးဆွဲ ခေါ်ဆောင်သွားကြောင်း ဘင်္ဂလာဒေခ်ျ့ သတင်းစာ တစ်စောင်က ရေးသား ဖေါ်ပြသည်။ ဇွန်လ ၁၁ ရက်နေ့က ဘင်္ဂါလီ ဘာသာဖြင့် ထုတ်ဝေ သော “ဖေးယားနယူး” သတင်းစာက ပြန်ပေး ဆွဲသွားသော အဖွဲ့မှာ DPA ခေါ် ဒီမိုကရက်တစ်ပါတီ (ရခိုင်ပြည်) ဖြစ်သည်ဟု စွပ်စွဲ ရေးသား ဖေါ်ပြသည်။
အဆိုပါ သတင်းစာတွင် ရေးသားထားခြင်းနှင့် ပတ်သက်ပြီး DPA ဥက္ကဌ ဦးသိန်းဖေအား ဆက်သွယ်မေးမြန်းရာသူက ယခုကဲ့သို့ ပြောသည်။
“ နယ်စပ်ကို ဆက်သွယ်ရတာ အခက်အခဲ ရှိတယ်။ နယ်စပ်က ဆက်သွယ်မှ ငါတို့က စကားပြောလို့ ရတယ်။ ငါတို့က ဆက်သွယ်လို့ သူတို့ကို မရဘူး။ ကာယံကံရှင်နဲ့ တိုက်ရိုက် အဆက်အသွယ် ရဖို့လိုတယ်။ အခုက အတိအကျ မသိရတဲ့ အတွက် မပြောနိုင်သေးဘူး။ အကယ်၍ လုပ်ခဲ့သည် ရှိသော် အဲဒါဟာ မဖြစ်သင့် မဖြစ်ထိုက်တဲ့ အလုပ်လို့ဘဲလို့ ခံယူပါတယ်။ အတိကျ သတင်းမရဘဲ သွားပြောလို့မရ ဖြစ်နေတယ်။ အဲဒါကြောင့် အထောက်အထားတွေ အတိအကျ လိုနေတယ်။”
၎င်းပြင် ယခုရေးသားချက်သည် သူတို့ ပါတီအပေါ် မတရား စွပ်စွဲခြင်း ဖြစ်နိုင်ချေရှိကြောင်း သူအနေနှင့် သံသယရှိသည်ဟု ယခုကဲ့သို့ ပြောသည်။
“ အခု ဖြစ်ရပ်ဟာ အတိအကျ ဟုတ်လား မဟုတ်လား၊ လုပ်ကြံမှုလား၊ တကယ်လုပ်တဲ့ လူတွေက ငါဟာ ဘယ်သူဖြစ်တယ်ဆိုပြီး နာမည်တွေကို ထုတ်ဖေါ်ပြောဆိုတာတွေ ရှိလား၊ အဲဒါတွေကို သံယဖြစ်စရာ ရှိနေပါတယ်။ DPA ကို အသုံးချပြီးတော့ နိုင်ငံရေးသမား အချင်းချင်း မနာလိုမှုတွေ ဖြစ်လို့ တိုက်တာ ခိုက်တာတွေလည်း ရှိတတ်တယ်။ တကယ်လို့ ဖြစ်ခဲ့သည်ရှိသော် ဘာကြောင့် ဒါကို လုပ်သလဲ၊ နိုင်ငံရေးအရ၊ လူမျိုးရေးအရ ပါတီအရ သိက္ခာကျတဲ့အလုပ်ဆိုပြီးတော့ ဝေဖန် ထောက်ပြဖို့ လိုပါတယ်” ဟု ပြောသည်။
ယခု ပြန်ပေးဆွဲခံရသူများမှာ စစ်တကောင်း တောင်တန်းနယ် ရန်ဂါမတီ (သက်ထောင်) ခရိုင် ဘိုင်လာဆိုးရီမြို့နယ် ဖာရ၀ါယူနီယံ၊ ဆာဆိုလာကျေးရွာမှ ကလဘာရီ သာထွီးဦး (၅၁)နှစ်နှင့် ညီဖြစ်သူ မွှီးပန်းအောင် (၃၉) နှစ်တို့ဖြစ်သည်။
ပြန်ပေးဆွဲ ခေါ်ဆောင်သွားခြင်းကို ကျေးရွာသား တစ်ဦးကလည်း သတင်းဌာနများသို့ ယခုကဲ့သို့ အတည်ပြု ပြောကြားသည်။
“ခေါ်ဆောင်သွားတာကတော့ ဇွန်လ ၇ ရက်နေ့ ညနေ ၃ နာရီလောက်မှာ လက်နက်ကိုင် အဖွဲ့တစ်ဖွဲ့ ရောက်လာပြီးတော့ ကလာဘာရီ ဦးသာထွီးဦးနဲ့ သူ့ရဲ့ညီ မွှီးပန်းအောင်တို့ကို ခေါ်ဆောင်သွားပါတယ်။ တနာရီလောက် အကြာမှာတော့ ညီဖြစ်သူ ဦးမွှီးပန်းအောင်ကို ပြန်လွှတ် ပေးလိုက်ပြီးတော့ သူ့အစ်ကို ကလာဘာရီကို ခေါ်ထား လိုက်ပါတယ်။ ဘယ်အဖွဲ့ကဆိုတော့ ကျွန်တော်လည်း အတိအကျ မသိပါ”ဟု ပြောသည်။
မိသားစုမှ ဦးသာထွီးဦးကို ပြန်ပေးငွေ တာကာငွေ ၄၀၀၀၀ ပေးပြီး ပြန်ရွေးရန် လက်နက်ကိုင် အဖွဲ့သို့ အကြောင်းကြားထားသော်လည်း ပြန်ပေး အဖွဲ့မှ လက်မခံဘဲ တာကာငွေ (၃)သိန်း (ကျပ်ငွေနှင့် ဆိုလျှင် သိန်း ၃၀ ခန့်) ပေးရမည်ဟု ကြောင်းပြန်ထားကြောင်း သိရသည်။
“ အခုတော့ ကလာ ဘာရီကို ဘယ်နေရာမှာ ထားတယ်၊ ဘယ်နေရာ ငွေပေးရမယ်။ ဘယ်နေ့ နောက်ဆုံးလည်း ဆိုတာကို မိသားစုဝင်တွေက အဆက်အသွယ် မရဘဲ ဖြစ်နေတဲ့ အတွက် မသိရတာကြောင့် သူ့အတွက် အထူး စိုးရိမ်နေကြပါတယ်” ဟု သူက ပြောသည်။
ပြန်ပေးဆွဲခံရသူ ဦးသာထွီးဦးမှာ လွန်ခဲ့သော ၂၀၀၄ ခုနှစ်ကတကြိ်မ် ပြန်ပေးဆွဲခံခဲ့ရကြောင်း သိရှိရသည်။
ဘင်္ဂလာဒေခ်ျ့ နိုင်ငံတွင် စစ်တကာင်း တောင်တန်းနယ်တွင် ဒေသအတွင်းမှ လက်နက်ကိုင် အဖွဲ့များမှလည်း မကြာခဏ ပြန်ပေးဆွဲလေ့ရှိပြီး တစ်ချို့ ပြန်ပေးဆွဲမူများကို ရခိုင်လက်နက်ကိုင် အဖွဲ့များအဖြစ် အမည်ခံကာ ပုံမှားရိုက် ကျူးလွန်လေ့ရှိကြောင်း နယ်စပ်က လာသော သတင်းများ အရ သိရသည်။
No comments:
Post a Comment