နိုဝင်ဘာလ ၁၄ ရက်နေ့တွင် ပြုလုပ်ရန်ရှိသည့် ၉ ကြိမ်မြောက် နေရူး ဟောပြောပွဲတွင် ဒေါ်အောင်ဆန်းစုကြည် မိန့်ခွန်းမြွက်ကြားပေး မည် ဖြစ်ကြောင်း အစိုးရအရာရှိအား ကိုးကား၍ အိန္ဒိယသတင်းစာများက ရေးသားထားကြပြီး အဆိုပါခရီးစဉ်သည် တပါတ်ခန့် ကြာမြင့် မည် ဟုလည်း ဆိုသည်။
သို့သော် ထိုခရီးစဉ်နှင့်ပတ်သက်၍ အသေးစိတ် မသိရှိရသေးကြောင်း အမျိုးသားဒီမိုကရေစီအဖွဲ့ချုပ် ခေါင်းဆောင် များက ပြောသည်။
“ကျနော်တို့ ဒီအစီအစဉ်နဲ့ပတ်သက်လို့ ဘာမှမသိရသေးဘူး။ နေပြည်တော်ကပဲ စီစဉ်တာ” ဟု အတွင်းရေးမှူး ဦးဉာဏ်ဝင်း က ပြောဆိုသ လို ပြောရေးဆိုခွင့်ရှိသူ တဦးဖြစ်သည့် ဦးအုန်းကြိုင် ကလည်း ထိုကိစ္စနှင့် ပတ် သက်၍ ပါတီဥက္ကဋ္ဌနှင့် မပြောဆိုဖြစ်ကြသေးကြောင်း မဇ္ဈိမ၏ မေး မြန်းချက်ကို ဖြေကြားသွားကြသည်။
မေလ ၂၉ ရက်နေ့က အိန္ဒိယ ဝန်ကြီးချုပ် မန်မိုဟန်ဆင်း နှင့် ဒေါ်အောင်ဆန်းစုကြည် တို့ ရန်ကုန်မြို့တွင် တွေ့ဆုံစဉ် ကွန်ဂရက်ပါတီဥက္ကဋ္ဌ ဆိုနီယာဂန္ဓီ၏ ဖိတ်ကြားချက်အား ဒေါ်အောင်ဆန်းစုကြည်က လက်ခံခဲ့ခြင်းဖြစ်သည်။
အိန္ဒိယနိုင်ငံ၏ ပထမဆုံး ဝန်ကြီးချုပ်ဖြစ်သည့် ပဏ္ဍစ် ဂျဝါဟာလာ နေရူး အထိမ်းအမှတ် ဟော ပြော ပွဲများကို နှစ်စဉ် ကျင်းပလာခဲ့ရာ ထင် ပေါ်ကြော်ကြားသော အိန္ဒိယနှင့် ကမ္ဘာ့နိုင်ငံရေး ခေါင်းဆောင်များ၊ သိပ္ပံပညာရှင်များ၊နိုဘယ် ဆုရှင်များနှင့် စာပေပညာရှင် စသူတို့အား ဖိတ်ကြား၍ မိန့်ခွန်းမြွက်ကြားစေလေ့ရှိသည်။
ဒေါ်အောင်ဆန်းစုကြည်သည် အိန္ဒိယနိုင်ငံနှင့် အလွန်နက်ရှိုင်းသော ဆက်နွယ်မှု ရှိပြီး ဗြိတိသျှ ကိုလိုနီ လက်အောက် မှလွတ်မြောက်ရေး အ တွက် အိန္ဒိယနိုင်ငံ လွတ်မြောက်ရေး တိုက်ပွဲဝင်ခဲ့ကြပုံကို အားကျ အတုယူခဲ့ကာ မဟတ္တမဂန္ဓီကြီး၏ အကြမ်းမဖက် တိုက်ပွဲဝင်ရေး ဝါ ဒကို သက်ဝင် ယုံကြည်သူ တဦးလည်း ဖြစ်သည်။
မိခင် ဒေါ်ခင်ကြည်အား အိန္ဒိယနိုင်ငံဆိုင်ရာ မြန်မာသံအမတ်ကြီးအဖြစ် ခန့်အပ်ခံရပြီးနောက် ဒေါ် အောင်ဆန်းစုကြည် သည် အိန္ဒိယနိုင် ငံသို့ ၁၉၆ဝ ခုနှစ်က ရောက်ရှိလာခဲ့ပြီး နယူးဒေလီရှိ လေဒီရရှီရမ်ကောလိပ် (Lady Shri Ram College) တွင် ဘွဲ့ရသည်အထိ ပညာသင်ကြားခဲ့ သည်။
၂ဝ၁၁ ခုနှစ်က နယူးဒေလီမြို့တွင် မြန်မာ့ဒီမိုကရေစီအင်အားစုများနှင့် မနူရှီ အမျိုးသမီးမဂ္ဂဇင်းတို့ ပူးပေါင်းကျင်းပ သည့် ဒေါ်အောင်ဆန်း စုကြည် ၏ ၆၆ နှစ်မြောက် မွေးနေ့ပွဲသို့ ၎င်း၏ မွေးနေ့သဝဏ်အဖြစ် ဗီဒီယိုမက်ဆေ့ခ်ျတခုပေးပို့ခဲ့ဖူးသည်။
အိန္ဒိယနိုင်ငံသည် သူ၏ နှလုံးသားတွင် အမြဲရှိနေပြီး အိန္ဒိယ အမျိုးသမီးများနှင့် မိတ်ဆွေ ဖြစ်ခဲ့ရမှုကိုလည်း အထူးတလည် သတိတရ ရှိရ ပါကြောင်း ဗွီဒီယို သဝဏ်လွှာတွင် ဒေါ်အောင်ဆန်းစုကြည်က ပြောကြားထားသည်။ အိန္ဒိယနိုင်ငံကို ကမ္ဘာ့အကြီးဆုံး ဒီမိုကရေစီ နိုင်ငံ ကြီး ဟူသော ဂုဏ်ပုဒ်နှင့် အညီ နေသည်ကို တွေ့မြင်လိုကြောင်း လည်း ပြောကြားသည်။
၁၉၉၃ ခုနှစ် ဂျဝါဟာလာ နေရူး နိုင်ငံတကာနားလည်မှုဆု၊ ၁၉၉၆ တွင် ရာဂျစ်ဂန္ဓီဆု၊ ၁၉၉၇ တွင် ဒေလီတက္ကသိုလ် ထူးချွန်ကျောင်းသူ ဆု၊ ၂ဝဝ၇ တွင် ဆူဘတ်ချန်ဒရာဘို့စ် ဆုနှင့် ၂ဝဝ၉ ခုနှစ် မဟတ္တမ ဂန္ဓီငြိမ်းချမ်းရေးဆုတို့ကိုဒေါ်အောင်ဆန်းစု ကြည်အား အိန္ဒိယက ချီး မြှင့်ထား သည်။
No comments:
Post a Comment