ABC
အိန္ဒိယနိုင်ငံ ဘိဟားပြည်နယ် ဗုဒ္ဓဂါယာမြို့က မဟာဗောဓိဘုရား ဗုံးပေါက်ကွဲမှုအပေါ် ဒေါ်အောင်ဆန်းစုကြည်အပါအဝင် မြန်မာအစိုးရကလည်း ရှုံ့ချလိုက်ပြီး လုံခြုံရေးတွေ ပိုမိုချထားဖို့ မျော်လင့်ကြောင်း အိန္ဒိယအစိုးရကို ပြောလိုက်ပါတယ်။
အိန္ဒိယနိုင်ငံ နိုင်ငံခြားရေးဆိုင်ရာ အတွင်းရေးမှုးက မြန်မာနိုင်ငံခြားရေး ဝန်ကြီး ဦးဝဏ္ဍမောင်လွင်နဲ့ မြန်မာနိုင်ငံမှာ တွေ့ဆုံခဲ့တုန်း လုံခြုံရေးတိုးမြှင့်ဖို့ မြန်မာဖက်က တောင်းဆိုလိုက်တာဖြစ်ပြီး နှစ်နိုင်ငံအနေနဲ့ လုံခြုံရေးဆိုင်ရာမှာ ပူးပေါင်းပြီး လုပ်ဆောင်သွားဖို့လည်း သဘောတူခဲ့ကြပါတယ်။
ဗုဒ္ဓဂါယာဗုံးပေါက်ကွဲမှုကြောင့် အိန္ဒိယနိုင်ငံ သံတမန်ရေးရာအတွက် အရှက်ရစရာဖြစ်နေပါတယ်။ မြန်မာ၊ ထိုင်း၊ တရုတ်၊ သီရိလင်္ကာ၊ ဂျပန်၊ ဘူတန် အစရှိတဲ့ နိုင်ငံကလူတွေ အထွတ်အမြတ်ထားပြီး လာရောက်ဘုရားဖူးလေ့ရှိတဲ့နေရာမှာ ဗုံးပေါက်ကွဲမှု ဖြစ်ခဲ့တဲ့အတွက် အိန္ဒိယအစိုးရအတွက် လုံခြုံရေးပိုင်းမှာ အရှက်ရစရာဖြစ်နေတယ်လို့ သုံးသပ်ကြပါတယ်။
အထူးသဖြင့် ဘိဟားပြည်နယ်အစိုးရကတော့ လုံခြုံရေးမှာ အားနည်းမှုနဲ့ ဝေဖန်ခံနေရပါတယ်။ ဒီလိုအခြေအနေကြောင့် အိန္ဒိယအစိုးရအနေနဲ့ အိန္ဒိယပြည်တွင်းမှာသာမက အိမ်နီးချင်းနိုင်ငံတွေမှာပါ လုံခြုံရေးမှာ ပါဝင်မှု လုပ်ရမှာဖြစ်တယ်လို့ ပြောနေကြပါတယ်။
ဗုဒ္ဓဂါယာ ဗုံးပေါက်မှုမှာ ဒဏ်ရာရသွားတဲ့ မြန်မာဘုန်းတော်ကြီးကို အိန္ဒိယအစိုးရက တာဝန်ယူ ဆေးကုသမှုပေးနေပြီး ကျန်းမာရေးအခြေအနေ ကောင်းမွန်နေကြောင်း သိရပါတယ်။
No comments:
Post a Comment