မတ်လ ၂၅ ရက်နေ့၊ ညနေ ၆ နာရီခန့်တွင် နေပြည်တော်ရှိ ပြည်ထောင်စုဝန်ကြီး ဦးဥာဏ်ထွန်းအောင်၏ နေအိမ်သို့ ရခိုင်လွှတ်တော်ကိုယ်စားလှယ်များကို ဖိတ်ခေါ်ကာ အောင်တံခွန်သင်္ဘောနစ်မြုပ်မှုဖြစ်စဉ်နှင့် ပတ်သက်ပြီး ရှင်းလင်းပြောဆိုစဉ် ယင်းအစီအစဉ်အား ပြောကြားခဲ့သည်ဟု အဆိုပါတွေ့ဆုံပွဲသို့ တက်ရောက်ခဲ့သည့် မြေပုံမြို့နယ်မဲဆန္ဒနယ်မှ ပြည်သူ့လွှတ်တော်ကိုယ်စားလှယ် ဦးဖေသန်းက နိရဉ္စရာသို့ပြောသည်။
“ရှေ့ဆက်ဆောင်ရွက်ပေးမယ့် အစီအစဉ်တွေကို ရှင်းလင်းပြောကြားရာမှာ ဂျပန်နိုင်ငံက JICA အဖွဲ့နဲ့ ဂျပန်နိုင်ငံခြားရေးဌာနတို့ရဲ့အကူအညီနဲ့ ဒီဇိုင်းသစ်တွေဆွဲပြီး တည်ဆောက် ပေးသွားမယ်လို့ပြောပါတယ်။ အဲလို ဒီဇိုင်းတွေဘာတွေဆွဲရဦးမှာဆိုတော့ အချိန်ကတော့ နည်းနည်းကြာဦးမယ့် သဘောရှိတာပေါ့လေ။ ဈေးတင် ရောင်းနေတဲ့ သင်္ဘောမျိုးတော့ဟုတ်မယ်မထင်ဘူး။ သူတို့မှာလည်း အဆင်သင့်ရှိပုံမပေါ်ဘူး” ဟု သူက ဆိုသည်။
ယင်းသင်္ဘောများကို မည်မျှအချိန်ယူတည်ဆောက်မည်ဆိုသည်နှင့် မည်သည့်အချိန်တွင် ရခိုင်သို့ လွှဲပြောင်း ပေးအပ်ပေးမည်ဆိုသည်ကို ဝန်ကြီးက အတိအကျပြောကြားခြင်းမရှိခဲ့ကြောင်း၊ ယင်းသို့ လုပ်ဆောင်ပေးရန် သတင်းစကား ပါးခဲ့ခြင်းသာဖြစ်ကြောင်း ဦးဖေသန်းက ဆက်ဆိုသည်။
ဝန်ကြီးက အဆိုပါနေ့က ပြောကြားရာတွင် အောင်တံခွန်သင်္ဘောနစ်မြုပ်စဉ် ခရီးသည် ပေါင်းမြောက်များစွာ၏ အသက်များကို ကယ်တင်ခဲ့သည့် မြေပုံမြို့နယ်၊ အုန်းကျွန်းကျေးရွာမှ ဒေသခံ ၅ ဦးကိုလည်း တစ်နိုင်ငံလုံးရှိ ရေကြောင်းသင်္ဘောများအား ရာသက်ပန် အခမဲ့ စီးနင်းခွင့်လက်မှတ်ကို ယင်းတို့အားခေါ်ယူ၍ ဂုဏ်ပြု ချီးမြှင့် ပေးရန် စီစဉ်ထားကြောင်းလည်း ပြောခဲ့သည်ဟု တွေ့ဆုံပွဲသို့ တက်ရောက်ခဲ့သည့် လွှတ်တော် ကိုယ်စားလှယ်များက ဆိုသည်။
ရခိုင်ပြည်နယ်၏ ပြည်တွင်း ရေကြောင်းခရီးစဉ်များအား ပြေးဆွဲလျက်ရှိသည့် သင်္ဘော အများစုမှာ နှစ်ကာလကြာမြင့်စွာ အသုံးပြုထားသဖြင့် ဟောင်းနွမ်းနေကြပြီဖြစ်သည်ဟု သိရသည်။ မတ်လ ၁၃ ရက်နေ့က ကျောက်ဖြူမြို့နယ်နှင့် မြေပုံမြို့နယ်တို့အကြားတွင် နစ်မြုပ်ခဲ့သော အောင်တံခွန် (၃)သင်္ဘောမှာလည်း နှစ်ပေါင်း ၂၀ ကျော် အသုံးပြုထားသော သင်္ဘော တစ်စီးဖြစ်ကြောင်း ရေကြောင်း ပို့ဆောင်ရေး မှတ်တမ်းများအရ သိရသည်။
ယင်းသင်္ဘော နစ်မြုပ်မှုကြောင့် မတ်လ ၂၆ ရက်အထိ စိုးရ၏တရားဝင်ထုတ်ပြန်ထားသည့်စာရင်းအရ သေဆုံးသူ ၆ဝ ကျော် သွားပြီဟု သိရသည်။
No comments:
Post a Comment