သျှမ်းသံတော်ဆင့်
နှစ်ဆန်း တစ်ရက်နေ့မှစ၍ မိုင်းလား တပ်ဖွဲ့ ထိန်းချုပ် နယ်မြေ အတွင်း မိုင်းယန်း နအဖ - လ၀က ၀န်ထမ်း အဖွဲ့မှ နိုင်ငံသား စိစစ်ရေး ကဒ်ပြား အတွက် ကွင်းဆင်း လုပ်ပေး နေသည်ဟု နယ်စပ် သတင်း ရပ်ကွက်က ပြောပါသည်။“၂၀၀၈ ဖွဲ့စည်းပုံ ဆန္ဒ ခံယူပွဲ မလုပ်ခင်က ကဒ် အဖြူတွေ လာလုပ် ပေးတယ်။ အခု အဲ့ကဒ် တွေကို အများသုံးတဲ့ ပန်းရောင် မှတ်ပုံတင် ပြန်လုပ် ပေးတယ်။ ဘာမှ မရှိရင်လဲ အသစ်လုပ် ပေးတယ်” - ဟု ဒေသခံ တဦးက ပြောပါသည်။
NDAA တပ်မဟာ ၃၆၉ ဆီလူးဌာချုပ် မိုင်းလားတပ်ဖွဲ့ ထိန်းချုပ်နယ်မြေအတွင်း နိုင်ငံသားစိစစ်ရေးကဒ်ပြားလုပ်ပေးရန် မိုင်းယန်းမြို့ မြို့နယ်ဦးစီးမှူး ဦးအောင်ကျော်ဦး ဦးဆောင်သော လ၀က ၀န်ထမ်း ၅-၆ ယောက်အပြင် အထွေထွေကူညီ ဆောင်ရွက်ရန် ကျောင်းဆရာ/ဆရာမ ၄-၅ ယောက် ပါသည့် ၁၀ ယောက်ကျော်အဖွဲ့က ကွင်းဆင်းလုပ်ပေးနေခြင်း ဖြစ်သည်ဟု ဆို၏။
“နိုင်ငံရေး စစ်ရေး အခြေအနေကြောင့် တခြားဒေသခရီးသွားလာလွယ်ကူ အဆင်ပြေအောင် မှတ်ပုံတင်လုပ်ဖို့ ဒေသခံတွေ စိတ်ဝင်စားကြတယ်၊ လာလုပ်ပေးတဲ့ဝန်ထမ်းတွေကိုတောင် မှတ်ပုံတင်ကဒ်ရချင်သူတွေက အစားအသောက်တွေ ဘီယာ တွေ အဖါလိုက် လက်ဆောင်သွားပေးတယ်။”- မှတ်ပုံတင်သွားလုပ်သူတဦးက ပြောပါသည်။
နိုင်ငံသားစိစစ်ရေးကဒ်ပြားအတွက် မိုင်းလားတပ်ဖွဲ့ထိန်းချုပ်ဒေသအတွင်း ဇန်န၀ါရီ ၁ ရက်နေ့မှစ၍ ကွင်းဆင်းလုပ်ပေး ခဲ့ရာ တရက်လျှင် ၅-၆ ယောက်နှုန်းဖြင့် ယနေ့အထိ အယောက် ၅၀-၆၀ ခန့်ပြီးစီးသွားပြီဖြစ်ကြောင်း နီးစပ်သည့် အသိုင်းအ၀ိုင်း ကဆို၏။
မိုင်းလားတပ်ဖွဲ့ ၃၆၉ ဌာနချုပ် အာဏာပိုင်များက သက်ဆိုင်ရာကျေးရွာ တိုက်နယ်အသီးသီးသို့ သွားခွင့်မပြုဘဲ ဆီလူးမြို့ စာသင်ကျောင်းဝင်းအတွင်း၌ သာလုပ်ခွင့်ပြုသောကြောင့် ကဒ်ပြားသစ်သွားလုပ်သူများ နည်းပါးရခြင်းဖြစ်နိုင်သည်ဟု အကဲခတ်များသုံးသပ်ကြသည်။
ထိုင်းနယ်စပ် နိုင်ငံရေးစစ်ရေးစောင့်ကြည့်သူတဦးက အပစ်ရပ်ဒေသအတွင်း နအဖတို့ နိုင်ငံသားစိစစ်ရေးကဒ်ပြား ကွင်းဆင်းလုပ်ဆောင်ပေးခြင်း၏ အခြားရည်ရွယ်ချက်မှာ - အနည်းဆုံး အပစ်ရပ်များ၏ စစ်ရေးပြင်ဆင်မှုအခြေအနေ၊ လူအင်အားစာရင်း တို့ကို အကဲခတ် ထောက်လှမ်းနိုင်ကြောင်း၊ ထို့အပြင် လာမည့်ရွေးကောက်ပွဲအတွက် ထောက်ခံမဲရရန် ဒေသခံလူထုအား စည်းရုံးနေခြင်းလည်းဖြစ်နိုင်ကြောင်း သျှမ်းသံတော်ဆင့်သို့ သုံးသပ်ပြပါသည်။
No comments:
Post a Comment