၂၂၅ နှစ်မြောက် ရခိုင်ဘုရင့် နိုင်ငံတော် အချုပ်အခြာ အာဏာကျဆုံးသည့်နေ့ အခမ်းအနား ကို ရခိုင်လူမျိုးများက စုပေါင်းပြီး နော်ဝေ နိုင်ငံ၏ ဒုတိယမြို့တော် Bergen မြို့ တွင် ကျင်းပခဲ့သည်။ ဦးဆောင် ကျင်းပရာတွင် ပါဝင်သူ တဦး ဖြစ်သူ ကိုအောင်မင်းစိုးက “အခမ်းအနားကို အဲဒီမြို့မှာရှိတဲ့ Rafto Humanright House မှာ နံနက် ၁၁ နာရီက နေ့လည် ၂ နာရီထိ ကျင်းပခဲ့ကြတာ ဖြစ်ပါတယ်။ အခမ်းအနားကို ရခိုင်အမျိုးသားတွေ သာမက တခြား မြန်မာ တိုင်းရင်းသား တွေလည်း တက်ရောက်ခဲ့ကြပါတယ်။ စုစုပေါင်း အင်အား ၆၀ ကျော်ရှိပါတယ်” ဟု ပြောသည်။
အခမ်းအနားကို ရခိုင့် နိုင်ငံတော်သီခြင်းကို သံပြိုင် သီဆိုပြီး ဖွင့်လှစ်ခဲ့ကြပြီး ၎င်းနောက်ပိုင်း ခေတ်အဆက်ဆက် ရခိုင် တော်လှန်ရေး အတွင်း တိုက်ပွဲဝင်ရင်း ကျဆုံးခဲ့ကြသော ရခိုင့် တော်လှန်ရေး အာဇာနည် ခေါင်းဆောင်များကို တစ်မိနစ်ခန့် ငြိမ်သက်စွာ ဦးညွတ် အလေးပြုခဲ့ကြသည်။
အခမ်းအနား သဘာပတိအဖွဲ့ ဝင်တစ်ဦးဖြစ်သူ ရခိုင်သမိုင်း သုတေသီ ဦးခိုင်မင်းမောင်က ရခိုင်ပြည်၏ နောက်ဆုံး မင်းဆက်ဖြစ်သော မဟာသမ္မတ ရာဇာမင်းလက် ထက်တွင် ဗမာ ဘုရင်မောင်ဝိုင်း၏ စစ်တပ်မှ စစ်ကြေညာခြင်း မရှိဘဲ ၀င်ရောက် ကျူးကျော် သိမ်းပိုက်ခဲ့ သဖြင့် ရခိုင်လူမျိုးတို့ သူ့ကျွန်ဘ၀ ကျရောက်ရပုံနှင့် ဗမာ ကိုလိုနီဘ၀မှ လွတ်မြောက်အောင် ရခိုင်လူမျိုး အဆက်ဆက်တို့မှ မည်သို့ မည်ပုံ ပြန်လည် ခုခံ တိုက်ခိုက် ခြဲ့ကပုံတို့ ကို တက်ရောက်လာသူများကို အကျယ်တ၀င့် ရှင်းလင်းပြောကြားခဲ့သည်။
ထို့ နောက် အခမ်းအနားစီစဉ်သူတစ်ဦးဖြစ်သော ကိုသန်းထွန်းမှ ၂၂၅ နှစ်မြောက် ရခိုင်ဘုရင့်နိုင်ငံတော် အချုပ်အခြာ အာဏာ ကျဆုံးသည့်နေ့ အခမ်းအနား ကျင်းပရခြင်း ရည်ရွယ်ချက်ကို ရှင်းလင်း ပြောကြားပြီး၊ ကိုမျိုးဆွေမှ သူဖြတ်သန်းခဲ့ရသော ရခိုင့် တော်လှန်ရေး အတွေ့ အကြုံများကို ပြောကြားခဲ့သည်။
အခမ်းအနားစီစဉ်သူ နောက်တစ်ဦး ဖြစ်သူ ခိုင်ထွန်းထွန်းမှ ဗမာ ကိုယ်လိုနီအောက် ရခိုင့်လူနေမှု ဘ၀ အခြေအနေများကို ဓာတ်ပုံများတကွ ရှင်းပြောကြားခဲ့ရာ တက်ရောက် လာကြသော ဧည့်ပုရိတ်သတ်များက အထူးစိတ်ဝင်တစား အားပေးကြည်ရှု့ခဲ့ကြသည်ဟု သိရသည်။
အခမ်းအနားတွင် ဓာတ်ပုံပြပွဲ တခုကိုလည်း ရခိုင့်ရှေးဟောင်းယဉ် ကျေးမှု အမွေအနှစ်ကဏ္ဍ၊ ယနေ့ ခေတ် ရခိုင့် လူနေမှု ဘ၀ကဏ္ဍ စသဖြင့် အခန်းကဏ္ဍများဖြင့် ဝေေ၀ဆာဆာ ပြသခဲ့ရာ တက်ရောက် လာသောဧည့်သည်များက အထူး စိတ်ဝင်တစား ကြည့်ရှု့ အားပေး ခဲ့ကြသည် ဟုသိရသည်။
အခမ်းအနား အပြီးတွင်တက်ရောက် လာသော ဧည့်ပရိတ်သတ်များကို ရခိုင်ရိုးရာ မုန့် တီဖြင့် ဧည့်ခံ ကျွေးမွေးခဲ့ကြသည်ဟု သတင်းရရှိသည်။
No comments:
Post a Comment