Thursday, May 27, 2010

၂၀၁၀ ရွေးကောက်ပွဲကို မြန်မာနိုင်ငံသားများ ကန့်ကွက်မဲ စတင်ပေး

ရဲရင့် / ၂၇ မေ ၂၀၁၀

နအဖကျင်းပမည့် ၂၀၁၀ ရွေးကောက်ပွဲကို ကမ္ဘာလုံးဆိုင်ရာလှုပ်ရှားမှုအနေဖြင့် ကန့်ကွက်ဆန္ဒထုတ်ဖော်ပွဲများကို နိုင်ငံတကာ၌ ယနေ့စတင်ကျင်းပရာ ထိုင်းနိုင်ငံ မဲဆောက်မြို့တွင် မြန်မာအလုပ်သမားမျာက ကန့်ကွက်မဲများ ပေးကြသည်။

ယနေ့ ကျရောက်သော အမျိုးသား ဒီမိုကရေစီ အဖွဲ့ချုပ်၏ ၁၉၉၀ ပြည့်နှစ် ပါတီစုံ ရွေးကောက်ပွဲ အနိုင်ရ အနှစ် (၂၀) ပြည့် အထိမ်း အမှတ် နေ့၌ မြန်မာ့ ဒီမို ကရေစီရေး လှုပ်ရှား ဆောင်ရွက် နေသည့် အဖွဲ့ကြီး (၁၀) ဖွဲ့မှ ကမကထပြု ကျင်းပသည့် ကမ္ဘာလုံးဆိုင်ရာ ကန့်ကွက် ဆန္ဒ ထုတ်ဖော်ပွဲတွင် မြန်မာ အလုပ်သမား များက လာရောက် ဆန္ဒ ထုတ်ဖော်ခဲ့ကြခြင်း ဖြစ်သည်။



ကန့်ကွက်ဆန္ဒထုတ်ဖော်ပွဲ၏ သဘာပတိအဖွဲ့ဝင် မြန်မာအလုပ်သမားအရေး ဆောင်ရွက်နေသည့် (JACBA) အဖွဲ့ဥက္ကဋ္ဌ ဦးမိုးကြိုးက “စစ်အုပ်စုရဲ့မတရားဖိနှိပ်ချုပ်ချယ်မှုတွေကို အလုပ်သမားတွေက နည်းစနစ်ကျကျ သဘောပေါက်ပြီး အသည်းကြားက မဲတပြားဟာ ကိုယ့်ရဲ့ ရွေးချယ်ပိုင်ခွင့်ဖြစ်တယ် ဆိုတာကို မှန်မှန်ကန်ကန်အသုံးချပြီး ဘယ်လိုတရားမျှတအောင် ဖော်ဆောင်မှာလည်းဆိုတာ သိရှိနိုင်ဖို့ ရည်ရွယ်ချက်နဲ့ မြန်မာအလုပ်သမားတွေကို ဖိတ်ကြားတာ ဖြစ်တယ်” ဟု ပြောသည်။

ဆန္ဒထုတ်ဖော်ခဲ့ကြသည့် အလုပ်သမားများကလည်း ၂၀၁၀ ရွေးကောက်ပွဲကို မိမိတို့တတ်နိုင်သည့်ဘက်က ၀ိုင်းဝန်းဆန့်ကျင်ကြခြင်းဖြစ်ပြီး ပြည်တွင်းရှိ အလုပ်သမားများနှင့် လူထုတရပ်လုံးကို တိုက်တွန်းနိုးဆော်လို၍ဖြစ်သည်ဟု ခေတ်ပြိုင်သို့ ပြောကြားသည်။

မယ်ပအထည်ချုပ်စက်ရုံမှ ကိုလှမောင်က “ပြည်တွင်းပြည်ပက အလုပ်သမားထုရဲ့အားက အာဏာရှင်ကို ဆန့်ကျင်တိုက်ဖျက်ရာမှာ အဓိက အင်အားကြီးတရပ်ဖြစ်တယ်။ ပြည်ပမှာ ကျနော်တို့ တတ်နိုင်တဲ့ဘက်က ဆန့်ကျင်ကြသလို ပြည်တွင်း အလုပ်သမားထုတွေကလည်း ဒီရွေးကောက်ပွဲ ဆန့်ကျင်မှုမှာ ပူးပေါင်းပါဝင်နိုင်ဖို့ နိုးဆော်တာဖြစ်တယ်" ဟု ပြောသည်။

လုံခြုံရေးအခြေအနေအရ ကန့်ကွက်ပွဲသို့ လာရောက်ရန် အခက်အခဲရှိသည့် စက်ရုံအလုပ်ရုံများမှ မြန်မာအလုပ်သမားများက ၎င်းတို့ လက်မှတ်ရေးထိုးထားသည့် ဆန့်ကျင်ကန့်ကွက်သည့် မဲလက်မှတ်များကို အလုပ်သမားအရေး ဆောင်ရွက်နေသူများ မှတဆင့် ပေးပို့ခဲ့ကြသည်။

အဆိုပါ ဆန့်ကျင်ကန့်ကွက်ပွဲများကို အမေရိကန်၊ ဂျပန်၊ သြစတြေးလျ၊ ကနေဒါ၊ ထိုင်း၊ အင်ဒိုနီးရှား၊ ဖိလစ်ပိုင် အပါအ၀င် နိုင်ငံပေါင်း (၁၅) နိုင်ငံတွင်လည်း ယနေ့ တပြိုင်တည်း ကျင်းပပြုလုပ်သည်ဟု တပ်ပေါင်းစု (၁၀) ဖွဲ့၏ ညှိနှိုင်းရေးမှူး ကိုသွင်လင်းအောင်က ပြောသည်။

၎င်းက “ဒီနေ့လှုပ်ရှားမှုကတော့ ကမ္ဘာလုံးဆိုင်ရာလှုပ်ရှားမှုပဲ။ နအဖစစ်အုပ်စုက လုပ်နေတဲ့ ရွေးကောက်ပွဲဟာ လူထုလိုအပ်ချက်တွေနဲ့ ကိုက်ညီမှုမရှိဘူး။ မြန်မာပြည်မှာရှိနေတဲ့ နိုင်ငံရေးပြဿနာတွေကို ဖြေရှင်းပေးနိုင်ခြင်းမရှိဘူး။ အဲဒီရွေးကောက်ပွဲကို ဆန့်ကျင်ပြီးတော့ ကျနော်တို့ လိုလားတဲ့ ရွေးကောက်ပွဲကို လိုချင်တယ်ဆိုတာကို ပြည်သူလူထုကနေပြီး ဆန္ဒဖော်ထုတ်တဲ့ပွဲကို ဒီနေ့ လုပ်တာဖြစ်တယ်” ဟု ပြောသည်။

ကမ္ဘာလုံးဆိုင်ရာ ဆန့်ကျင်ကန့်ကွက်ဆန္ဒ ထုတ်ဖော်ပွဲမှရရှိသည့် ကန့်ကွက်မဲများကို သက်ဆိုင်ရာနိုင်ငံများ၏ အစိုးရများမှတဆင့် ဖိအားပေးတောင်းဆိုမှုများ ပြုလုပ်နိုင်ရန်နှင့် အာဆီယံဒေသတွင်းမှ မဲပြားများကို အာဆီယံ အထွေထွေအတွင်းရေးမှူးချုပ် ဒေါက်တာဆူရင်ပစ်ဆူဝမ်ထံသို့ ပေးပို့မည်ဖြစ်သည်။

ဆန့်ကျင်ကန့်ကွက် ဆန္ဒထုတ်ဖော်ပွဲသို့ မြန်မာ့ဒီမိုကရေစီအရေး ဆောင်ရွက်နေသည့် တပ်ပေါင်းစု (၁၀) ဖွဲ့မှ ခေါင်းဆောင်များလည်း တက်ရောက်ခဲ့ကြပြီး ကန့်ကွက်မဲများ ပေးခဲ့ကြသည်။

အမျိုးသားဒီမိုကရေစီအဖွဲ့ချုပ် (အန်အယ်လ်ဒီ) က နအဖ တဖက်သတ်ရေးဆွဲထားသည့် ဥပဒေပါ စည်းကမ်းချက်များမှာ ဒီမိုကရေစီနည်းမကျသည့်အတွက် တရားမျှတမှုမရှိသည့် ဥပဒေအရ ၂၀၁၀ ရွေးကောက်ပွဲအတွက် ပါတီမှတ်ပုံတင်ခြင်းကို လက်မခံကြောင်း ကြေညာခဲ့သည်။

No comments: