ဗိုလ်ချုပ်မှူးကြီး သန်းရွှေ မိသားစု ဦးဆောင် ပြုပြင်မွမ်းမံခဲ့ ပြီးနောက် မကြာခင် ပြိုကျခဲ့သော ရန်ကုန်တိုင်း ဒလမြို့နယ်ရှိ ရှေးဟောင်း သမိုင်းဝင် ဓနုတ် စေတီကြီး ပြန်လည် ပြုပြင်ရန် စတင် လုပ်ဆောင် နေကြောင်း သိရသည်။ဓနုတ် စေတီကြီး ပြုပြင်ရန် အတွက် ရွှေသံလွင် ကုမ္ပဏီက လေ့လာမှုများ ပြုလုပ်နေပြီ ဖြစ်သော်လည်း ဗိုလ်ချုပ်မှူးကြီး သန်းရွှေ မိသားစုက ဦးစီး လှူဒါန်းမှုများ ပြုလုပ်တော့မည် မဟုတ်ကြောင်း စေတီ ဂေါပက အဖွဲ့နှင့် နီးစပ်သူ တဦးက ပြောဆိုသည်။
ဒလ ဒေသခံ အာဏာပိုင် တဦးကလည်း “ဒီတခေါက် စေတီ ထီးတင်တာ၊ စိန်ဖူးတော် တင်တာတွေကို နိုင်ငံတော် အကြီးအကဲ မိသားစုဝင် တွေက လုပ်မှာ မဟုတ်ဘူး၊ ဒေသခံ အာဏာပိုင် လူကြီးတွေ၊ ရပ်ရွာက လူတွေကပဲ ဦးစီး လုပ်ကြဖို့ ရှိတယ်”ဟု ဧရာဝတီသို့ ပြောဆိုသည်။
“ဓနုတ်စေတီပြန်တည်ဖို့ မြေတိုင်းတာတွေ စလုပ်နေပြီ၊ အဓိက က မြေသား အပျော့အမာ စစ်ဆေးတာတွေ ရွှေသံလွင် ကုမ္ပဏီက လုပ်နေတယ်”ဟုလည်း ၎င်းကဆိုသည်။
ယင်း သမိုင်းဝင် ဓနုတ်စေတီကြီးကို ၂၀၀၉ ခုနှစ် မေလ ၇ ရက်နေ့တွင် ဗိုလ်ချုပ်မှူးကြီးသန်းရွှေ၏ ဇနီး ဒေါ်ကြိုင်ကြိုင် ဦးစီး၍ ထီးတော် တင်လှူပြီးနောက်၂၃ ရက် အကြာ မေလ ၃၀ ရက်နေ့ ညနေ ၃ နာရီ ၅ မိနစ်ခန့်တွင် ပြိုကျခဲ့ခြင်း ဖြစ်သည်။
ဓနုတ်စေတီကြီးပြိုကျခဲ့စဉ်က ထူးခြားသော လက္ခဏာများဖြစ်သည့် ရုတ်တရက် အမှောင်ကျခြင်း၊ မီးလုံးအနီကြီးများ ဖြတ်သန်း ခြင်းနှင့်မပြိုကျမီ ညပိုင်းအချိန်များက စေတီကြီး ၏အရိပ်သည် ထီးတော်မပါဘဲ ကောင်းကင်တွင် ဖူးတွေ့ရခြင်းများဖြစ်ပေါ်ခဲ့ ကြောင်း ဒေသခံများက ပြောပြသည်။
ထို ဓနုတ်စေတီကြီးကို ရှေးဘုရင်အဆက်ဆက် ပြုပြင်ထိန်းသိမ်းခဲ့ပြီး ဗိုလ်ချုပ်မှူးကြီး သန်းရွှေ ၏ ဇနီး ဒေါ်ကြိုင်ကြိုင်က ယတြာချေ သည့်အနေဖြင့် ထီးတော်တင်လှူခြင်းဖြစ်ကြောင်းလည်း ဒလဒေသခံများအကြား ပြောဆိုမှုများရှိခဲ့သည်။
“ဒီစေတီကြီးကို ဘုရင်မကြီး ရှင်စောပုကိုယ်တိုင်ပြုပြင်ထိန်းသိမ်းခဲ့ဖူးတယ်။ ဒေါ်ကြိုင်ကြိုင် ကလည်း ဘုရင်မတပါးအဖြစ် သူ့ကိုယ် သူ သတ်မှတ်ပြီး ယတြာသဘောနဲ့ ထီးတော်တင်ခဲ့တာကြောင့် ပြိုကျတာဆိုပြီး လူတွေကြားမှာ ပြောဆိုကြတယ်”ဟု ဒလဒေသခံ တဦးက ပြောသည်။
စေတီပြိကျမှုကြောင့် လူ ၂၀ ထက် မနည်း သေဆုံးပြီး ၁၀၀ ကျော်ဒဏ်ရာရခဲ့သည်ဟု ဒေသခံများက ပြောဆိုခဲ့ကြသော်လည်း စစ်အစိုးရက လူ ၂ ဦး သေဆုံးပြီး ၃၄ ဦး ဒဏ်ရာ ရသည်ဟု ထုတ်ပြန်ခဲ့သည်။
စစ်အစိုးရပိုင် သတင်းစာများတွင် ဘုရားပြိုကျခြင်းသည် စေတီပြုပြင်သူများက ဘုရားကြီးကို မူလပုံစံအတိုင်း ဖြစ်စေလိုသည့် ကြိုးပမ်း တည်ဆောက်ရာမှ မျှော်မှန်းမထားသည့် ၀န်ပိုများကြောင့် စေတီတော် ကိုယ်လုံးတော်ပိုင်းဆိုင်ရာ ထိခိုက်ပြီး ပြိုကျ ပျက်စီးခြင်းဖြစ်ကြောင်းနှင့် မိုးမကျမီ စေတီတော်ကြီးအပြီးသတ် ပြင်ဆင်နိုင်ရေး အမြန်ကြိုးစား မွမ်းမံ တည်ဆောက်ကြရာတွင် အရည်အသွေးဆိုင်ရာ လိုအပ်ချက်များ ရှိခဲ့သည့်အတွက် ပြိုကျရခြင်းဖြစ်သည်ဟု လည်းထုတ်ပြန်ခဲ့သည်။
ဓနုတ်စေတီကြီးကို သာသနာ သက္ကရာဇ် ၂၄၀ ပြည့်နှစ်တွင် မြတ်စွာဘုရားဆံတော် နှစ်ဆူနှင့် ဓာတ်တော် ၂၄ ဆူကို ဌာပနာပြီး လေးသည်ရွာတွင် သထုံမင်း စူဠသီရိမာသောက အထောက်အပံ့ ဖြင့်တည်ထားခြင်းဖြစ်ကြောင်း၊ စတင်တည်ထားချိန်က ဒုန္နိဂ္ဂဟ စေတီ ဟူသော ဘွဲ့အမည်တွင်ပြီး နောင်တွင် ဓနုတ်စေတီဟု ပြောင်းလဲလာခြင်း ဖြစ်ကြောင်း ဘုရားသမိုင်းတွင် ဖော်ပြထားသည်။
ဓနုတ်စေတီကြီးကို ဘုန်းတန်ခိုးကြီးမားသော ဘုရင်မင်းအဆက်ဆက်က ပြုပြင်ကိုးကွယ်ခဲ့ရာ မြန်မာ သက္ကရာဇ် ၇၁၅ ခုနှစ်တွင် ဟံသာဝတီ ဘုရင် ဗညားဦးက လည်းကောင်း၊ ၇၅၆ ခုနှစ်တွင် ဘုရင် သုတသောမ ရာဇဓိရာဇ် က လည်းကောင်း ပြုပြင်တည်ထား ကိုးကွယ်ပြီး သက္ကရာဇ် ၈၁၉ ခုနှစ်တွင် ငလျင်လှုပ်ပြိုကျရာ ရှင်စောပု ဘုရင်မကြီးက ပြန်လည်ပြုပြင်ကြောင်း၊ သက္ကရာဇ် ၈၁၉ ခုနှစ် တွင် ဓမ္မစေတီမင်း က လည်းကောင်း၊ သက္ကရာဇ် ၉၀၁ ခုနှစ်တွင် တောင်ငူဘုရင် တပင်ရွှေထီး ကလည်း ကောင်း၊ ၉၂၆ ခုနှစ်တွင် ဘုရင့်နောင် က လည်းကောင်း၊ ၁၀၀၆ ခုနှစ်တွင် သာလွန်မင်းက လည်းကောင်း၊ ၁၀၄၁ ခုနှစ် တွင် မင်းရဲကျော်ထင် က လည်းကောင်း၊ ၁၁၇၃ ခုနှစ်တွင် ဘိုးတော်မင်းတရား က လည်းကောင်း အသီးသီးပြုပြင် တည်ထားခဲ့ကြကြောင်း မှတ်တမ်းများ အရ သိရသည်။
No comments:
Post a Comment