လွတ်လပ်သောမွန်သတင်းအေဂျင်စီ
ထိုင်း နိုင်ငံတွင် လက်ရှိဖြစ် ပေါ်နေသည့် ရေကြီး မှုသည် ဘန်ကောက် တမြို့လုံး ရေလွှမ်းမိုး နိုင်ကြောင်း ယမန်နေ့ ညနေပိုင်း တွင်ထိုင်း ဝန်ကြီး ချုပ်က ကြေငြာ ခဲ့ပြီး မြို့ခံများ ရေဘေး လွတ်နိုင်သည့် နေရာသို့ ပြောင်းရွှေ့ နေကြသည်။
ထိုင်းဝန်ကြီးချုပ် ယင်းလပ်ရှင်နာဝပ်က ရေကာတာပေါက်ခြင်း၊ တာကျိုးခြင်းနှင့် ခန့်မှန်းထားသည်ထက် ပင်လယ်ရေ တက်ရောက်လာခြင်းကြောင့် ရေလမ်းကြောင်းများကို မကာကွယ်နိုင်သည့်အခြေအနေရောက်ရှိနိုင်ပြီး ဘန်ကောက်မြို့တွင်း၌ ၁၀ စင်တီမီတာကနေ ၁ မီတာခွဲအထိ ရေမြင့်တက်လာနိုင်သည်ဟု ထိုင်းရုပ်သံဌာနကနေ အရေးပေါ် ကြေငြာထားသည်။
၎င်းပြင် ရေလွှမ်းမိုးခံထားရသည့် ခရိုင်အားလုံးရှိ အစိုးရရုံးများကိုလည်း အောက်တိုဘာ ၂၇ ရက်နေ့မှ ၃၁ ရက်နေ့ထိ ပိတ်ထားမည်ဖြစ်ကြောင်းကိုလည်း ကြေငြာထားသည်။
ဘန်ကောက်မြို့တွင် နေထိုင်သူများအားလုံး ရေဘေးလွတ်နိုင်သည့် အမြင့်ပိုင်းနေရာများဆီသို့ ပြောင်းရွှေ့ထားရန် ဝန်ကြီးချုပ်က ပြောထားသည်။
“အရေးပေါ်ကြေငြာထားတော့ လူတွေက လွတ်နိုင်တဲ့ နေရာတွေဘက်ကို ပြောင်းရွှေ့ကြတာပေါ့ ရေကလည်း တက်လာနေတယ်၊ ကျနော်တို့ အိမ်ရှေ့မှာဆိုရင် ရေက ရင်ခေါင်းလောက်ရှိနေပြီ၊ ကျနော်တို့က မပြောင်းသေးဘူး၊ အခြေအနေကြည့်နေတုန်း” ဟု ထိုင်းနိုင်ငံဖွားမွန်လူမျိုး နိုင်မွန်အေး ဝံစီရာမာန်က ပြောသည်။
ရေဘေးဒုက္ခသည်စခန်းချထားသည့် ဒွန်မောင်းလေဆိပ်ကိုလည်း ပိတ်ထားခဲ့ရပြီး ဒုက္ခသည်များကို ဘန်ကောက်မြို့ အထက်ပိုင်းနေရာသို့ ပြောင်းရွှေ့ထားရကြောင်း ထိုင်းရုပ်သံသတင်းဌာနများတွင် အချိန်နှင့်တပြေးညီထုတ်လွှင့် လျှက်ရှိသည်။
ဘန်ကောက်ရှိ မွန်အမျိုးသမီးတဦးကလည်း “ဒီနေ့ဆို ရေက တော်တော်တက်လာနေတယ်၊ အောက်ထပ်တခုလုံး ရေက ပြည့်နေပြီ၊ ကျမတို့က အပေါ်ထပ်မှာ နေနေရတယ်၊ ရေအခြေအနေကိုတော့ ကြည့်နေတုန်း” ဟု ပြောသည်။
ထိုင်းနိုင်ငံတွင် နှစ်လကျော်ကြာ မိုးဆက်တိုက်ရွာသွန်းခဲ့တာကြောင့် ဆည်ရေဖောက်ကာ ခရိုင်အတော်များများ ရေမြုပ်ပြီး သန်းနှင့်ချီ၍ ဒေသခံများရေဘေးကြုံတွေ့နေရသည်။
ရေမြုပ်နေခြင်းကြောင့် ထိုင်းနိုင်ငံတွင် အလုပ်လုပ်နေကြသည့် မြန်မာရွှေ့ပြောင်းအလုပ်သမားများလည်း နယ်စပ် လမ်းကြောင်း အသီးသီး ၌ တနေ့လျှင်ရာနှင့်ချီ၍ပြန်နေကြကြောင်းလည်း သိရသည်။
No comments:
Post a Comment