ပြည်နယ် ဝန်ကြီးချုပ် ခရီးစဉ် အတွင်း ဒေသဖွံ့ဖြိုးရေးနှင့် ဆင်းရဲနွမ်းပါးမှု ပပျောက်ကြောင်း ပြသလို၍ ဘုရားသုံးဆူမြို့ပေါ်တွင် ဖွင့်ထား သည့် လောင်းကစားဝိုင်းများကို မြို့နယ်အုပ်ချုပ်ရေးမှူး အမိန့်ဖြင့် ကြိုတင် ပိတ်ထားခိုင်းသည်။
ဖေဖော်ဝါရီလ ၁၈ ရက်မှ ၂၅ ရက် ကြားကာလအတွင်း ထိုင်းနိုင်ငံမှတဆင့် နယ်စပ်ဘုရားသုံးဆူမြို့သို့ ကရင်ပြည်နယ် ဝန်ကြီးချုပ် ဦးဇော် မင်း ရောက်ရှိဖွယ် ရှိသည်ဟု မြို့နယ်အုပ်ချုပ်ရေးမှူးရုံး ဝန်ထမ်းများအတွင်း သတင်းပျံ့နေပြီး၊ လူမြင်ကွင်းတွင် ဖွင့်ထားသည့် လောင်းက စား ဝိုင်းများကို ရပ်ကွက်လူကြီးများမှတဆင့် လွန်ခဲ့သည့် သုံးရက်ခန့်က ပိတ်ထားခိုင်းခြင်း ဖြစ်သည်။
“မြို့ထဲက လမ်းတွေကို ပြင်နေတယ်။ အိမ်ရှေ့မှာ ပန်းသီးပုံးတွေကို လုံးဝ မမြင်ရတော့ပါဘူး၊ အိမ်နောက်ဖေးကို ပြောင်းထားတယ်၊ ယာ ယီ ပါပဲ” ဟု သုံးဆူဒေသခံတဦးက ပြောသည်။
ဘုရားသုံးဆူမြို့ပေါ်တွင် ပန်းသီးပုံး ခေါ် အော်တိုလျှပ်စစ်လောင်းကစားနည်း၊ အနီထောင်၊ အန်ဂလုံ၊ ဖဲ စသည့် လောင်းကစားဝိုင်းများ မြို့ပေါ်နေရာအနှံ့တွင် နေ့စဉ် ဖွင့်ထားခဲ့ပြီး ၎င်းတို့အနက် ပန်းသီးပုံးမှာ အတွင်ကျယ်ဆုံး လောင်းကစားနည်း ဖြစ်သည်။
ပန်းသီးပုံးကို ထိုင်းစီးပွားရေး လုပ်ငန်းရှင်တဦးက လွန်ခဲ့သည့် ၅ နှစ်ကျော်က လာရောက်ဖွင့်လှစ်ခဲ့ပြီး နောက်ပိုင်းတွင် တိုင်းရင်းသား စီး ပွားရေးလုပ်ငန်းရှင်များလည်း ဖွင့်လှစ်လာခဲ့ကာ လက်ရှိတွင် မြို့ပေါ်၌ လောင်းကစားစက် အလုံး ၅၀၀ ခန့် ရှိသည်။
ဒေသဖွံ့ဖြိုးရေးနှင့် ဆင်းရဲနွမ်းပါမှု ပပျောက်ရေး ခေါင်းစဉ်ဖြင့် သုံးဆူရှိ ပြည်ခိုင်ဖြိုးပါတီက မြို့ပေါ်ရှိ လောင်းကစားဝိုင်းများကို ပိတ်ပစ် ရန်နိုင်ရေးအတွက် လွန်ခဲ့သည့်လက မြို့နေပြည်သူတို့၏ ဆန္ဒကို နှစ်ကြိမ်တိုင် ကောက်ယူပြီး မြို့နယ် အုပ်ချုပ်ရေးမှူးထံသို့ တင်ပြခဲ့ သော် လည်း ထူးခြားမှု မရှိခဲ့ပေ။
လောင်းကစားဝိုင်း မပိတ်ပစ်နိုင်ခြင်းမှာ မြို့နယ်အာဏာပိုင်များက လောင်းကစားဝိုင်းမှ ငွေကြေးများစွာ ရယူပြီး ခွင့်ပြုထားခြင်းကြောင့် ဖြစ်ကြောင်း မြို့ခံများက ပြောသည်။
ပန်းသီးပုံး ဖွင့်ခွင့်ရရန်အတွက် အကောက်အဖြစ် မြို့နယ်အာဏာပိုင်များအား တပုံးလျှင် ထိုင်းငွေ ၅၀၀ ဘတ် လစဉ် ပေးသွင်းရသည်ဟု လောင်းကစားဝိုင်း ပိတ်နိုင်ရေးအတွက် ကြိုးပမ်းနေသူတဦးက ပြောသည်။
“သူတို့က အကောက်ရနေတယ် ဆိုတော့ မပိတ်ဘူးပေါ့။ မပိတ်ပေးဘူးဆိုရင် ကျနော်တို့က ဒီအတိုင်း ငြိမ်နေမှာ မဟုတ်ဘူး၊ ဆန္ဒပြတဲ့ အဆင့်ထိ ဖြစ်လာနိုင်တယ်” ဟု သူက ပြောသည်။
လောင်းကစားဝိုင်းကြောင့် မြို့အတွင်း ခိုးဆိုး လုယက်မှု ပေါများပြီး၊ လူငယ်များ အကျင့်စာရိတ္တ ပျက်ပြားလာခြင်းကြောင့် အာဏာပိုင် များ အနေနှင့် လောင်းကစားဝိုင်းကို ပိတ်သင့်ကြောင်း မြို့ခံတဦးက ပြောသည်။
“တနေ့ကတောင် ကလေးတယောက် နေ့လည် ကြောင်တောင် ပိုက်ဆံအိတ် ခိုးတယ်။ ဖမ်းမိတော့ ကျနော်ပန်းသီးပုံး ရှုံးလို့ ခိုးမိတယ်လို့ ပြောတယ်” ဟု အထက်ပါမြို့ခံက သာဓက ပြကာ ရှင်းပြသည်။
ကရင်ပြည်နယ် ဝန်ကြီးချုပ် ခရီးစဉ်အတွင်း နယ်စပ်ဒေသဖွံ့ဖြိုးရေးကိစ္စကို အဓိကထား လေ့လာဖွယ် ရှိပြီး၊ အထူးသဖြင့် ဘုရားသုံးဆူ ပတ်ဝန်းကျင်အတွင်း သတ္တုတူးဖော်ရေးလုပ်ငန်းနှင့် စက်မှုဇုန် တည်ဆောက်နိုင်ရေးကိစ္စကို လေ့လာဖွယ် ရှိသည်ဟု မြို့ပေါ်ရှိ စီးပွားရေး လုပ်ငန်းရှင်များက ခန့်မှန်းကြသည်။
No comments:
Post a Comment