မူလတန်းမှ အထက်တန်းအထိ ပုံနှိပ်စာအုပ် ၁၁,၁၁၉စုံကို ရွှေ့ပြောင်းမြန်မာကျောင်းအလုံး (၄၀)နှင့် အိုင်ဒီပီကျောင်း (၃၇) ကျောင်းအတွက် မြန်မာရွှေ့ပြောင်းပညာရေးဖောင်ဒေးရှင်းမှတဆင့် လာရောက်လှူဒါန်းခြင်းဖြစ်ပြီး ယင်းပုံနှိပ်စာအုပ်များကို သက်ဆိုင်ရာ ကျောင်းအသီးသီးမှ တင် ပြလာသည့် အုပ်ရေစာရင်းအတိုင်း ပေးဝေသွားမည်ဟု ဓမ္မဒူတဆရာတော် ဒေါက်တာ အရှင်ဆေကိန္ဒကိုယ်စား လာရောက်ပေးဝေသူ ကိုဇော်သူရက ပြောသည်။
“ကျနော်တို့ ရွှေ့ပြောင်းမြန်မာကျောင်းတွေရဲ့ လိုအပ်ချက်တစ်ခုဖြစ်တဲ့ မြန်မာသင်ရိုးညွှန်းတမ်းဖတ်စာအုပ်တွေကို ဆရာတော် (အရှင်ဆေကိန္ဒ)ကနေပြီးတော့ ဒီကျောင်းတွေရဲ့ အခက်အခဲကို ကူညီသောအားဖြင့် တစ်ဖက်တစ်လမ်းက ၀ိုင်းဝန်းဖြည့်ဆည်း ပေးတာ ဖြစ်တယ်”ဟု ကေအိုင်စီသို့ ပြောသည်။
အဆိုပါလှူဒါန်းသည့် ပုံနှိပ်စာအုပ်များအနက် အချို့ကို နယ်စပ်ရှိ ပြည်တွင်းဌာနေမဲ့ကျောင်းများသို့ ၎င်းတို့ကိုယ်တိုင် မကြာခင် သွားရောက် ပေးဝေလှူဒါန်းသွားမည်ဖြစ်ကြောင်းလည်း ကိုဇော်သူရက ဆက်ပြောသည်။
ဆာမူထော်ရွှေ့ပြောင်းမြန်မာကျောင်းမှ ဒု-ကျောင်းအုပ်ဖြစ်သူ ဦးကောင်းမြတ်က “ကျနော်တို့ ရွှေ့ပြောင်းကျောင်းတွေ ဘတ်ဂျက် (ထောက်ပံ့မှု)ကျတဲ့အချိန်၊ ရပ်တည်မှု ခက်ခဲလာတဲ့အချိန်မှာ အခုလို လာရောက်လှူဒါန်းတဲ့အတွက် ကျနော် အထူးပဲ ၀မ်းသာပါ တယ်။ ဆရာ၊ ဆရာမအနေနဲ့ကလည်း တန်ပြန်သက်ရောက်မှုအနေနဲ့ ပိပိရိရိ သင်ကြားပေးကြပါ။ ကျောင်းသူကျောင်းသားတွေ ကလည်း အကျိုးရှိစွာ အသုံးချကြပါလို့ မေတ္တာရပ်ခံချင်ပါတယ်”ဟု ပြောသည်။
ယနေ့ကျင်းပသည့် ပုံနှိပ်စာအုပ် ဖြန့်ဝေပေးအပ်လှူဒါန်းပွဲသို့ မြန်မာရွှေ့ပြောင်းပညာရေး ဖောင်ဒေးရှင်းမှ တာဝန်ရှိသူများ၊ မြန်မာ ရွှေ့ပြောင်းအလုပ်သမားများပညာရေးကော်မတီ (BMWEC)မှ တာဝန်ရှိသူများ၊ မဲဆောက်မြို့အခြေစိုက် မနောဖြူစင် ရေလှူအ သင်းမှ တာဝန်ရှိသူများ၊ ပုံနှိပ်စာအုပ်လက်ခံယူသည့် မြန်မာရွှေ့ပြောင်းများမှ ကျောင်းဆရာနှင့် ကျောင်းသူကျောင်းသားများ အပါအ၀င် စုစုပေါင်း ၅၀၀ကျော် တက်ရောက်ခဲ့သည်။
ကလေးများ ဖွံ့ဖြိုးရေးစင်တာ(စီဒီစီ)ကျောင်းမှ န၀မတန်းကျောင်းသား စောထူးကပေါ်မူးက “မဲဆောက်မှာ ပုံနှိပ်စာအုပ်တစ်စုံကို ၀ယ်ရရင် ဘတ် ၂၀၀ကျော်လောက်ကုန်မယ်။ ၀ယ်စရာမလိုဘဲ အခုလို အခမဲ့ လာရောက်လှူဒါန်းအတွက် အရမ်းဝမ်းသာပါ တယ်။ ပြီးတော့ လာရောက်လှူဒါန်းပေးတဲ့လူကော၊ ဆရာဆရာမတွေကော အားလုံးကို ကျေးဇူးတင်ပါတယ်”ဟု ပြောသည်။
မြန်မာနိုင်ငံ၏ တက္ကသိုလ်ဝင် စာမေးပွဲတွင် ၀င်ရောက်ဖြေဆိုကြသည့် မဲဆောက်အခြေစိုက် ကျောင်းသူကျောင်းသားများကို ပံ့ပိုး ကူညီပေးခဲ့သူ ဓမ္မဒူတဆရာတော် ဒေါက်တာ အရှင်ဆေကိန္ဒသည် ၂၀၁၂-၁၃ပညာသင်နှစ်ကလည်း မဲဆောက်ဒေသရှိ မြန်မာ ရွှေ့ပြောင်းကျောင်းများအတွက် သီးသန့် ပုံနှိပ်စာအုပ်အစုံ ၈ထောင်ကျော် လှူဒါန်းခဲ့သေးသည်။
ထိုင်း-မြန်မာနယ်စပ် မဲဆောက်ဒေသတွင် မြန်မာရွှေ့ပြောင်းအလုပ်သမား ပညာရေးကော်မတီ (BMWEC) ကွပ်ကဲမှုအောက်ရှိ မြန်မာရွှေ့ပြောင်းစာသင်ကျောင်းပေါင်း ၇၀ကျော်တွင် ရွှေ့ပြောင်းမြန်မာကျောင်းသူကျောင်းသားဦးရေ ၂သောင်းကျော်ရှိသည်ဟု သိရသည်။
No comments:
Post a Comment