မျိုးချစ်သူ / ၂ နိုဝင်ဘာ ၂၀၀၉
ရန်ကုန်တွင် ဗုံးပေါက်မည်ဟူသော သတင်းကြောင့် ပြီးခဲ့သည့် အောက်တိုဘာလကုန်ပိုင်းမှစ၍ လုံခြုံရေးများ တိုးမြှင့်ချထားကြောင်း ရန်ကုန်တိုင်းရဲတပ်ဖွဲ့မှ ရဲအရာရှိတဦးက ပြောသည်။
“ကမ္ဘာအေးဘုရားလမ်းဘေးမှာ လက်နက်အပြည့်နဲ့ ရဲ (၂) ယောက်အပြင် ဆက်သွယ်ရေးစနစ် ဝေါ်ကီတော်ကီနဲ့ ရဲတယောက်ကိုပါ ပူးတွဲထားရှိပါတယ်။ မြို့ရဲ့လုံခြုံရေးအတွက် အဓိကလမ်းမကြီးတွေမှာ ၀တ်စုံပြည့်ရဲတွေကို ဘတ်စ်ကားမှတ်တိုင်တခု အနီးနားတွေမှာ ချထားတာပါ။ ပြီးတော့ မီးပွိုင့်တွေမှာလည်း ယာဉ်ထိန်းတပ်ဖွဲ့က ရဲတွေအပါအ၀င် အခြားရဲတွေကိုပါ တာဝန်ချထားပါတယ်။ ဒါဟာ ပြည်ထဲရေးဝန်ကြီးဌာနရဲ့ အမိန့်ပါ” ဟု အဆိုပါရဲအရာရှိက ပြောသည်။
ပြီးခဲ့သည့်လက လှိုင်သာယာစက်မှုဇုန်နှင့် ရွှေပြည်သာစက်မှုဇုန်တို့တွင် ဗုံး (၆) လုံး ဆက်တိုက်ပေါက်ကွဲခဲ့မှုနှင့်ပတ်သက်၍ ယင်းအဖြစ်အပျက်အား အစိုးရက တစုံတရာဖော်ထုတ်ခြင်းမရှိသဖြင့် ပြည်သူတို့က အစိုးရ၏လုပ်ကြံမှုအဖြစ် တီးတိုးဝေဖန် ပြောဆိုခဲ့ကြကြောင်း ရန်ကုန်မြို့ခံများက ပြောသည်။
ရန်ကုန်မြို့တွင်း နေထိုင်သူတဦးက “လုံခြုံရေးတွေက နေရာတကာမှာပါပဲ။ လေဆိပ်အ၀င်တွေမှာ၊ ကမ္ဘာအေးဘုရားလမ်း တလျှောက်၊ ပြီးတော့ ကန်တော်ကြီး ကန်ပတ်လမ်း၊ ရွှေဂုံတိုင် စတဲ့နေရာတွေမှာ အများဆုံးပဲ။ ရဲတွေကို တွေ့ရတာကတော့ တမြို့လုံးအနှံ့ပဲ။ ဒါပေမယ့် ခုဏက ပြောတဲ့နေရာတွေမှာ ချတဲ့ လုံခြုံရေးက ပိုများတယ်” ဟု ပြောသည်။
ရန်ကုန်ရှိ ဧည့်လမ်းညွှန်တဦးကမူ ရန်ကုန်တွင် ယခုလသည် နိုင်ငံခြားသားများ လာရောက်လည်ပတ်မှု များလာကြောင်း၊ ယင်းသို့များလာချိန်တွင် ယခုကဲ့သို့ လုံခြုံရေးများကို နေရာအနှံ့ချထားသည့်အတွက် အနှောင့်အယှက်ဖြစ်ရကြောင်း ပြောသည်။
“တနေ့ကလည်း ကျမတို့ ရွှေတိဂုံက ပြတိုက်ကိုသွားတာ လုံခြုံရေးတွေက နေရာအနှံ့ချထားတယ်။ တချို့က အရပ်ဝတ်နဲ့ လုံ ခြုံရေးတွေ၊ မေးတာ မြန်းတာ လာလုပ်သေးတယ်။ အစိုးရရဲတွေက အရပ်ဝတ်နဲ့ ခုလိုမျိုး မေးလို့ရလားတော့ မသိတော့ဘူး။ အခုလိုလုပ်တာကို နိုင်ငံခြားသားတွေကတော့ စိတ်ထဲမှာ တခုခုဖြစ်မှာပဲ။ ကျမတို့လည်း သိက္ခာကျတယ်လေ” ဟု ပြောသည်။
No comments:
Post a Comment