မြန်မာ့နိုင်ငံရေးနှင့် ပတ်သက်ပြီး ဆွေးနွေးမည့် အမေရိကန် အစိုးရ ကိုယ်စားလှယ် အဖွဲ့သည် ယနေ့ နံနက် ၁၀း၂၀ နာရီတွင် နေပြည်တော်သို့ ရောက်ရှိသွားကြောင်း ရန်ကုန်မြို့ အမေရိကန် သံရုံးက ဧရာဝတီကို ပြောသည်။အမေရိကန် ကိုယ်စားလှယ် အဖွဲ့တွင် အရှေ့အာရှနှင့် ပစိဖိတ်ရေးရာ လက်ထောက် နိုင်ငံခြားရေးဝန်ကြီး မစ္စတာ ကာ့တ် ကမ်းဘဲလ်၊ အာဆီယံရေးရာ သံအမတ် မစ္စတာ စကော့မာရှယ်တို့ ဦးဆောင်ပြီး တခြား အရာရှိ ၂ ဦး ပါဝင်ကြောင်း သိရသည်။
“ဒီနေ့ တနေ့လုံး သူတို့ မြန်မာအစိုးရ တာဝန်ရှိသူတွေနဲ့ တွေ့ဆုံ ဆွေးနွေးပါလိမ့်မယ်၊ မနက်ဖြန်မှာ ရန်ကုန်ကို လာပြီးတော့ ဒေါ်အောင်ဆန်းစုကြည် အပါအ၀င် တခြား နိုင်ငံရေး ခေါင်းဆောင်တွေနဲ့ တွေ့ပါမယ်” ဟု အမည် မဖော်လိုသူ အမေရိကန်သံရုံး အရာရှိက ဧရာဝတီသို့ ပြောသည်။
ကိုယ်စားလှယ်အဖွဲ့သည် နယူးယောက်တွင် တွေ့ဆုံခဲ့ဖူးသည့် မြန်မာ စစ်အစိုးရ ကိုယ်စားလှယ်များနှင့် ယနေ့ ထပ်မံ တွေ့ဆုံမည် ဖြစ်ကြောင်း သံရုံး အရာရှိက ဆက်လက် ပြောဆိုသည်။
စက်တင်ဘာလကုန်ပိုင်းက အမေရိကန်၏ မြန်မာနိုင်ငံ ဆိုင်ရာ မူဝါဒသစ် ထွက်ပေါ်လာပြီးနောက် မစ္စတာ ကမ်းဘဲလ်သည် သိပ္ပံနှင့် နည်းပညာဝန်ကြီး ဦးသောင်းနှင့် နယူးယောက်မြို့တွင် တွေ့ဆုံခဲ့သေးသည်။ ထိုသို့ တွေ့ကြရာတွင် အရေးယူ ပိတ်ဆို့မှု ရုပ်သိမ်းရေး၊ ၂၀၁၀ ရွေးကောက်ပွဲတွင် ဒေါ်အောင်ဆန်းစုကြည် အပါအ၀င် နိုင်ငံရေး အင်အားစုများ ပါဝင်နိုင်ရေး တို့နှင့် ပတ်သက်ပြီး ဆွေးနွေးကြကြောင်း သိရသည်။
ယခု မြန်မာပြည် ခရီးစဉ်အတွင်း မစ္စတာ ကာ့တ် ကမ်းဘဲလ်သည် စစ်အစိုးရ ခေါင်းဆောင် ဗိုလ်ချုပ်မှူးကြီး သန်းရွှေနှင့် တွေ့ဆုံရန် အလားအလာ မရှိကြောင်း သုံးသပ်သူများက ဆိုသည်။
ခရီးစဉ် မတိုင်မီ မြန်မာနှင့် အာဆီယံ နိုင်ငံများမှ လူထု အခြေပြု လူမှုအဖွဲ့အစည်း ၅၀ က မစ္စတာ ကမ်းဘဲလ် ထံသို့ အိတ်ဖွင့်ပေးစာ တစောင် ပေးပို့လိုက်သည်။
အိတ်ဖွင့် ပေးစာတွင် မြန်မာပြည် ဒီမိုကရေစီ အပြောင်းအလဲနှင့် အမျိုးသား ပြန်လည် ရင်ကြားစေ့ရေး အတွက် အမေရိကန်၏ ကြိုးပမ်းမှုက တစုံတရာ အထောက်အကူ ပေးနိုင်လိမ့်မည်ဟု ယုံကြည်ကြောင်း ဖော်ပြထားသည်။ ထို့အပြင် ဒေါ်အောင်ဆန်းစုကြည် အပါအ၀င် နိုင်ငံရေး အကျဉ်းသားအားလုံးကို လွှတ်ပေးရေး၊ တိုင်းရင်းသား အဖွဲ့အစည်းများကို တိုက်ခိုက်မှုများ ရပ်ဆိုင်းရေး၊ ၂၀၀၈ အခြေခံဥပဒေကို ပြန်လည်သုံးသပ်ရေး၊ အားလုံးပါဝင် နိုင်သည့် တွေ့ဆုံဆွေးနွေးပွဲ ပြုလုပ်ရေးတို့အတွက် စစ်အစိုးရကို ဖိအားပေးရန် တောင်းဆိုထားသည်။
ထိန်းသိမ်းခံနေရသည့် ဒေါ်အောင်ဆန်းစုကြည်ကလည်း ယခု အမေရိကန် အစိုးရကိုယ်စားလှယ် အဖွဲ့၏ ခရီးစဉ်ကို စောင့်ကြည့်နေသည်ဟု မကြာသေးမီက ထုတ်ဖော် ပြောကြားခဲ့သည်။
No comments:
Post a Comment