အမျိုးသား ဒီမိုကရေစီ အဖွဲ့ချုပ် (NLD) ပါတီရပ်တည်ခွင့် အထူးအယူခံကို နေပြည်တော် တရားရုံးချုပ်က ယနေ့ ပယ်ချလိုက်သည်။အဆိုပါ အယူခံ ပယ်ချခံရမှုနှင့် ပတ်သက်၍ နေပြည်တော်သို့ ရောက်ရှိနေသည့် NLD ရှေ့နေ ဦးကျော်ဟိုးက“တရားရုံးပိုင်း ဆိုင်ရာ အမြင့်ဆုံးအဆင့်ပယ်ချခံရတာပါ။ ဒါပေမယ့် တရားသူကြီးချုပ်ထံ အယူခံတင်နိုင်ခွင့်ရှိနေပါသေးတယ်။ တရားသူကြီးချုပ်ထံ အယူခံ တင်မတင်ကိုတော့ NLD ဥပဒေ အထောက်အကူပြုအဖွဲ့နဲ့ ဗဟိုအလုပ်အမှုဆောင်အဖွဲ့တို့ ဆွေးနွေးတိုင်ပင်ပြီးမှ ဆုံးဖြတ်မှာပါ”ဟု ဧရာဝတီသို့ ပြောသည်။
နေပြည်တော် တရားရုံးချုပ်က NLD ပါတီရပ်တည်ခွင့် အထူးအယူခံကို ဇန်န၀ါရီ ၂၄ ရက်က နှစ်ဘက် လျှောက်လဲချက်များ ကြားနာ ခဲ့ပြီးနောက် ယနေ့ တွင် NLD ရှေ့နေ ဦးဉာဏ်ဝင်း ၊ ဦးကျော်ဟိုးနှင့် ဗဟို အလုပ်အမှုဆောင် ကိုယ်စားလှယ် ဦးဝင်းမြင့် တို့အား အထူးအယူခံ ပယ်ချသည့် စီရင်ချက် နောက်ဆုံး စာမျက်နှာကို ဖတ်ပြခဲ့ကြောင်း သိရသည်။
“တရားရုံးမှာ စီရင်ချက် ဖတ်တုန်းက စီရင်ချက်က ရှည်တယ်ဆိုပြီး နောက်ဆုံး စာမျက်နှာကိုပဲ ဖတ်သွားတဲ့ အတွက် ဘာအကြောင်းပြချက်နဲ့ ပယ်ချတယ် ဆိုတာကို သဲသဲကွဲကွဲ သိနိုင်ဖို့ စီရင်ချက်ကို ကျနော်တို့ မိတ္တူကူးနေပါတယ်”ဟု ဦးကျော်ဟိုးက ပြောသည်။
၁၉၉၀ ရွေးကောက်ပွဲအနိုင်ရ NLD ပါတီကစစ်အစိုးရ ကျင်းပပေးမည့် ရွေးကောက်ပွဲသည် တရားမျှတမှု မရှိနိုင်သည့်အပြင် ၂၀၀၈ ဖွဲ့စည်းပုံကိုလည်း လက်မခံနိုင်ဟုဆိုကာ နိုင်ငံရေး ပါတီအဖြစ် ဆက်လက်တည်ထောင်ခွင့် မလျှောက်ထားရန် ၂၀၁၀ ခုနှစ် မတ်လ ၂၉ ရက်နေ့က ဆုံးဖြတ်ခဲ့သည်။
ထို့နောက် နအဖ စစ်အစိုးရ၏ ၂၀၁၀ ရွေးကောက်ပွဲကော်မရှင်က NLD ပါတီနှင့် ၁၉၉၀ ရွေးကောက်ပွဲဝင် ပါတီ(၁၀) ခုကို တရား ၀င် ပါတီအဖြစ်မှ ရပ်စဲကြောင်း ၂၀၁၀ခုနှစ် စက်တင်ဘာ(၁၄) ရက်တွင် ကြေညာခဲ့သည်။
NLDပါတီ ရပ်တည်ခွင့်အထူးအယူခံ ပယ်ချခံရမှုနှင့်စပ်လျဉ်း၍ ၂၀၁၀ ရွေးကောက်ပွဲဝင် ရခိုင် တိုင်းရင်းသား တိုးတက်ရေးပါတီ (RNDP)ဥက္ကဌ ဒေါက်တာအေးမောင်က“ဒီ အထူးအယူခံပယ်ချခံရတာနဲ့ ပတ်သက်ပြီး ကျနော်တို့ သတင်းအပြည့်အစုံ မသိရသေး ဘူး။ ကျနော့် တသီးပုဂ္ဂလအမြင် ပြောရရင်တော့ ပါတီတရပ်ဟာ နိုင်ငံရေး ဆောင်ရွက်မှုတွေကို အားကောင်းကောင်း လုပ်နိုင်ဖို့ ၊
ပြည်သူနဲ့ အဆက်မပြတ်ဖို့ဆိုရင် တရားဝင် ရပ်တည်နိုင်ဖို့လိုအပ်ပါတယ်။ သူတို့လည်း အခြားနည်းလမ်းတွေနဲ့ ကြိုးစားကြဦးမယ် ထင်ပါတယ်”ဟု ပြောသည်။
ဝါရင့်နိုင်ငံရေးသမားကြီး သခင်ချန်ထွန်းကမူ NLD ပါတီသည် အထူးအယူခံ ပယ်ချခံရသော်လည်း နိုင်ငံရေးလှုပ်ရှားမှုများ ဆက် လုပ် နေကြလိမ့်မည်ဟု သုံးသပ်သည်။
“တရားဝင် ပါတီအဖြစ် ရပ်တည်ခွင့်မရတော့ဘူးဆိုလည်း ဒေါ်အောင်ဆန်းစုကြည်အိမ်မှာ သဘောထားတူသူတွေ စုဝေးလို့ ရနိုင်သေး တာပဲ။ နိုင်ငံရေးလှုပ်ရှားမှုတွေ ရှိနေဦးမှာပါ။ အရင်လိုတော့ လူစုလူဝေးအများကြီးနဲ့ လုပ်နိုင်ဖို့တော့ ခက်သွားမှာပေါ့။ ပါတီဖျက်ခံရတာနဲ့ နိုင်ငံရေးလှုပ်ရှားမှုတွေ ရပ်တန့်သွားမှာတော့ မဟုတ်ပါဘူး။ ရှိတော့ ရှိနေဦးမှာပါပဲ။ အပြင်ကကြည့်ရင်တော့ NLDဟာ အေးစက်စက်ကြီးလုပ်နေတယ် ထင်ရပေမယ့်။ တကယ်လုပ်နေတဲ့သူတွေက အသိဆုံးပါ။ လုပ်နိုင်တဲ့ နည်းလမ်းတွေလည်း ရှိနိုင်ပါတယ်”ဟု သခင်ချန်ထွန်းက ဆိုသည်။
နေပြည်တော်တရားရုံးချုပ်က ပါတီရပ်တည်ခွင့် အထူးအယူခံပယ်ချလိုက်ချိန်တွင် ရန်ကုန် ရွှေဂုံတိုင်ရှိ NLD ပါတီရုံးချုပ်၌ ဒုတိယ ပင်လုံညီလာခံ ကျင်းပနိုင်ရေးနှင့်စပ်လျဉ်း၍ ပင်လုံညီလာခံအကြောင်း ဟောပြောမှုများ ပြုလုပ်နေကြောင်း သိရသည်။
“အဓိကကတော့ ဒုတိယ ပင်လုံ သဘောတူညီချက် တခု ရဖို့အတွက် ကြိုးပမ်းဆောင်ရွက်နေတာဖြစ်ပါတယ်။ ဗိုလ်ချုပ်တို့ရေးဆွဲခဲ့တဲ့ ပထမပင်လုံညီလာခံမှာ သဘောတူခဲ့တဲ့ ပင်လုံစာချုပ်ဆိုတာရှိပါတယ်။ ဒီသဘောတူညီချက်နဲ့ ပင်လုံစာချုပ်ကို အခြေခံပြီး တော့ ဒုတိယ ပင်လုံသဘောတူညီချက်တခုရဖို့ ဆောင်ရွက်နေတာပါ”ဟု NLD ဒု ဥက္ကဌ ဦးတင်ဦးက ပြောသည်။
ယနေ့ကျင်းပသည့် ပင်လုံညီလာခံဟောပြောပွဲတွင် ဇိုမီး အမျိုးသားကွန်ဂရက် ဥက္ကဌ ဦးပူကျင့်ရှင်းထျန်နှင့် ရှမ်း တိုင်းရင်းသား ဒီမိုကရေစီ အဖွဲ့ချုပ် အတွင်းရေးမှူး ဦးစိုင်းစောအောင်တို့က ပထမ ပင်လုံညီလာခံနှင့်ပတ်သက်သည့် သမိုင်းကြောင်းများ ၊ ပင်လုံ စာချုပ်ပါ အချက်အလက်များကို ဟောပြောခဲ့ကြကြောင်း သိရသည်။
အဆိုပါ ဟောပြောပွဲသို့ NLDပါတီဝင်များ၊ တိုင်းရင်းသားပါတီဝင်များနှင့် လူငယ်ပရိသတ် ၁၀၀ ကျော်တက်ရောက်၍ ပြန်လှန်ဆွေးနွေးမေးမြန်းမှုများ ပြုလုပ်ခဲ့ကြောင်း NLD ပြောခွင့်ရ ဦးအုန်းကြိုင်က ပြောသည်။
“ပါတီ အထူးအယူခံ ပယ်ချခံရတာနဲ့ ပတ်သက်ပြီး အသေးစိတ်မသိရသေးပါဘူး။ ပါတီရုံးချုပ်မှာ ပင်လုံညီလာခံဟောပြောပွဲ အေး အေးဆေးဆေးပဲ ပြီးသွားပါပြီ။ လာမယ့် ဖေဖော်ဝါရီ ၁၂ ရက်မှာ ကျရောက်တဲ့ ပြည်ထောင်စုနေ့ အခမ်းအနားကိုလည်း ပါတီ ရုံးချုပ် မှာပဲ ပြုလုပ်သွားမှာပါ”ဟု ဦးအုန်းကြိုင်က ဆိုသည်။
No comments:
Post a Comment