မွန်ပြည် နယ်တွင် လျှပ်စစ် ဓါတ်အား ဖြန့်ဖြူးရေး ဌာနက လာမည့် နှစ်အတွင်း လျှပ်စစ် မီတာ ခနှုန်း တိုးမြှင့် ကောက်တော့ မည်ဟု အသိပေး ထားကြောင်း ဒေသခံ များက ပြောသည်။ယခင်က အိမ်သုံး မီတာခ တယူနစ်လျှင် ၂၅ ကျပ် ပုံမှန် ကောက်ခံ ရာမှ ၂၀၁၂ ခုနှစ် မှစပြီး တိုးမြှင့် ကောက်ခံ သွားမည်ဟု လျှပ်စစ် ဓာတ်အား ဖြန့်ဖြူးရေး ဌာနက ယခင်လ ကတည်းက အသိပေး ထားကြောင်း မွန်ပြည်နယ် မော်လမြိုင်မြို့ ခံတဦးက ပြောသည်။
၎င်းက “နောက်လ ကျရင် ဒီနှုန်းခ ထက်တိုး ပြီးတော့ ကောက်ခံ မယ်လို့ပြော သွားတယ်၊ ဒါပေမယ့် ဘယ်လောက်ထိ တိုးကောက် မယ်ဆိုတာ ကိုတော့ မပြော သေးဘူး” ဟုပြောသည်။
မြန်မာ နိုင်ငံ လျှပ်စစ် ဓာတ်အား ဖြန့်ဖြူးရေး အမှတ် (၂) လျှပ်စစ် စွမ်းအား ဝန်ကြီး ဌာနမှ လာမည့်နှစ် ဇန်နဝါရီလ ၁ ရက်နေ့မှ စတင်၍ အိမ်သုံး မီတာ တယူနစ်လျှင် ၅၀ ကျပ်၊ လုပ်ငန်းသုံး မီတာတယူနစ် လျှင် ၁၀၀ ကျပ်နှုန်းဖြင့် တိုးမြှင့် ကောက်ခံ သွာမည်ဟု မြန်မာပြည် တွင်းထုတ် Weekly Eleven ဂျာနယ်တွင် ဖော်ပြ ထားသည်။
အမှတ်(၂) လျှပ်စစ် စွမ်းအား ဝန်ကြီး ဌာန အနေဖြင့် အမှတ် (၁) လျှပ်စစ် စွမ်းအား ၀န်ကြီး ဌာနမှ ရေအား လျှပ်စစ် တယူနစ် လျှင် ၂၀ ကျပ်နှုန်း၊ ဓာတ်ငွေ့ တာဘိုင် အတွက် တယူနစ်လျှင် ၁၂၇ ကျပ် အကုန် ကျခံကာ ဖြန့်ဖြူး ပေးနေ ရခြင်းကြောင့် အရှုံးပေါ်လျက်ရှိ သဖြင့် ဓါတ်အားခ နှုန်းထားများ ပြောင်းလဲ ကောက်ခံ ရခြင်း ဖြစ်ကြောင်း လည်း ပါရှိသည်။
လျှပ်စစ်ဖြန့်ဖြူးရေးဌာနက ၂၀၀၆ ခုနှစ် ဇန်နဝါရီလမှစ၍ အိမ်သုံးမီးတာ တယူနစ်လျှင် ၂၅ ကျပ်၊ စီးပွားရေးနှင့် စက်မှုလုပ်ငန်းသုံး မီတာခ တယူနစ်လျှင် ၅၀ ကျပ်နှုန်းဖြင့် စတင်ကောက်ခဲ့ ခြင်းဖြစ် သည်။
ယင်းသို့ သတ်မှတ်ထားသော်လည်း မွန်ပြည်နယ်ရှိ မြို့နယ်တချို့တွင် သတ်မှတ်နှုန်းထားထက် ပိုမိုပေးဆောင်နေခဲ့ရကြောင်း ဒေသခံ များက ပြောသည်။
မုဒုံမြို့နယ်၊ နှီးပဒေါ်ကျေးရွာမှ ကိုအောင်က “အခုမီတာခ ထပ်တိုးမယ်ဆိုတာကိုတော့ မကြားသေးဘူး၊ ဒါပေမယ့် ကျနော်တို့မှာက ၂၀၀၆ ခုနှစ်ကတည်းက မီးစယူထားကတည်းက မီတာခကို တယူနစ် ၅၀ ပေးနေရတယ်” ဟု ပြောသည်။
မွန်ပြယ်နယ်ရှိ ဒေသများအတွင်း ဖြန့်ဖြူးသည့် လျှပ်စစ်မီးသည် ပုံမှန်လာခြင်းမရှိကြောင်း၊ မီးလာသည့်အခါတွင်လည်း မီးအား မပြည့်ဖြစ် နေသော်လည်း မီတာခကိုမူ တယူနစ်လျှင် ၆၀ ကျပ်အထိ ပေးဆောင်နေရကြောင်း ရေးမြို့နယ်မှ မြို့ခံများကလည်း ပြောသည်။
No comments:
Post a Comment